Чахсы киректері ӱчӱн таныхтааннар
15.11.2023
Хабарлар
«Сакураның» ӧмезі: Таисия Сагалакова (сол саринаң), Нина Захарова, Анастасия Кунц, Тарина Миллер паза Елена Костина
Кӧзідіг. Л.Р.Кызласовтың адынаң Хакас национальнай чир-суғ ӱгренҷең музейде «Чахсы киректер мозаиказы» ӧткіннернің кӧзідіг-ярмарказы ирткен
Хакасияның Халыхтар палатазы коммерческай нимес пірігістернің чахсы киректерінің кӧзідиин ікінҷі чылы иртірче. Олох кӧзідіг-ярмаркада региондағы чахсы киректер марииның салтарлары иділче. «ДА» марығ полтыр ідӧк пастағызын иртірілген паза чуртағҷыларның кӧңніне кірген. Марығ оңдайларынҷа араласчылар санына чахсы киректер итчеткен кізілерні паза халых пірігістерін хынған на чуртағҷаа кирерге чарир. Аннаңар піреезіне «ДА» марығда араласчатханы чапсых таа сыйых полған полар. Олар постарының чахсы киректерінеңер тың суулабинчалар, олаңай тоғысха чіли хайчалар паза аны чахсы синде толдыр саларға кӱстенчелер. Аннаңар оларның пу тоғызын турыстыра паалирға мындағ марығ туза полча.
Музей туразынзар кіргендӧк, ол суум-саамнаң удурлаан, олаңай кӱннерде, тізең, мында сымзырых поладыр. Коммерческай нимес пірігістернің ӧткіннерінің піреезі позының кӧзідиин тимнеп салтырҷых, піреезінің ам на килгені харахха тасталчатхан. Тӧрдең ырах таа парбаабыс, «Пай чир» халых пірігізінің устағҷызы Раиса Абдина Хакасияның национальнай паза территориальнай политика министерствозының грантына сығарған алғыстас открыткаларын паза алындағы чыл сығарылған «Хакас кухнязының чиизі» чыындызын кӧзідіге сығар салғанын кӧр салғабыс. Аның искіриинең, «Пай чир» халых пірігізі 2018 чылда тӧстелген.
– Піс 2023 чылда аймах ӱлӱкӱннернең чонны хакас паза орыс тіллерінең алғыстастаҷаң открыткаларны сығарыбысхабыс. Хоостарны олғаннар чайааннар. Паза куаркодча иртсе, ол алғыстастарны хакас тілінең истіп аларға чарир. Пір чыындаа 18 открытка кирілген. Тиксі 300 экземпляр сығарылған, – хоза чарытхан Раиса Петровна.
Ағбан пилтіріндегі «Таңдағызынзар хаалағ» социальнай проекттерге хабазығ чыындызы чахсы киректерін киречілепчеткен сомнарны сығартыр. Халых пірігізінің ӧткін араласчылары Юлия Берестенёванаң Надежда Чернованың чооғына, ибіркі чирлерні арығлирына паза иптиріне ӱгренҷілер, чииттер паза улуғ частығлар тартылчалар. Олар Илбек Ада чаа араласчыларына чарыдылған «Сабланыс» хумартхы тас ачығын, Ким суғ хазын паза пасха орыннарны сыбыра арығлапчалар, ағастар одыртчалар. Халых пірігізі 2020 чылдаң сығара тоғын парча.
Асхыс аймаандағы «Сакура» социальнай полызығ службазы кӧзідіге прайзынаң артых тимнен килген тиирге чарир. Тоғынҷылар паза араласчылар, аймах чон кип-азаана чазанып, чиис тимнеп килтірлер: хакас чонның талғаны, орыс чонның плинелері паза немец чонның кухазы. Аннаң пасха оларның столларында социальнай полызығнаң тузаланчатханнарның пос холынаң чайаан тоғыстары кізі хайиин тартхан.
– «Сакура» полған на ай пірер мероприятие иртірче, полызығларнаң тузаланчатхан чуртағҷылар анда хынып араласчалар. Полызығлар аймах кӧстегліг: иб аразында, имнег, психология, ӱгредіг, істеніс, право паза пасха. Наа ла тӧстелгенде, халых пірігізі аймахтағы 250 чуртағҷыны, ол санда чалғыс халған улуғ частығларны, кинектерні, ветераннарны, хайыға алған. Пӱӱнгі кӱнде олар Асхыс аймааның прай даа аалларында чурттығ 350 кізее полысчалар, – чарытхан «Сакура» АНО ЦСО-ның директоры Тарина Миллер.
«ДА» региондағы чахсы киректер мариинда тиксі ӱс номинация чарлалған. Марыға Ағбаннаң, Абазадаң, Саяногорсктаң, Харатастаң, Асхыс, Боград, Таштып паза Шира аймахтарынаң 40 сурыныс пічии кірген. Прай араласчылар диплом алған полза, сыйыхтығ орынға турысханнар паза чиңісчілер – сыйыхтар. Оларның санында полғаннар СВО араласчыларына полызығ чыыпчатханнар, адайлар приюдына полысчатханнар, ибіркі чирні арығлапчатханнар, олған-узахнаң паза улуғларнаң тоғынчатханнар. Ідӧк «Чахсы киректер мозаиказы» кӧзідіг-ярмарканың араласчылары алғыстас пічіктерінең таныхтатханнар. Сыйыхтас соонаң НКО кізілеріне тузалығ семинар ирткен – ӧткін чуртағҷыларға коммерческай нимес пірігістернің тиліҷең оңдайларынаңар, азых поларынаңар, саннығ оңдайларны кирердеңер паза медианаң тузаланардаңар, право, грант паза пасха хабазығлардаңар чоохтааннар.
Чахсы киректернең айғасчатханнар оларға мындағ хайығ салылчатхан ӱчӱн Хакасияның Халыхтар палатазын паза НКО-ның ресурс кінін алғыстирға киректер. «Чахсы киректер мозаиказы» кӧзідіг-ярмарка паза «ДА» марығ – оларның тоғызы.
– Мин ізенчем, чылдаң чылға пу ӱлӱкӱн тилир, марығ иртіріл турар. Пӱӱл араласчылар саны ирткен чылдағызынаң асчатханы анзын киречілепче. Улуғ алғыс наа сағыстарың, чахсы киректерні чуртасха кирерге сағыссырапчатхан, пір сағыстығларны піріктірчеткен ӱчӱн. Хазнабыста амыр чуртас полар ӱчӱн полғаныбысха ла нандырарға киректелче, – теен Хакасияның Халыхтар палатазының кнезі Ольга Левченко.
Сом Дмитрий Сунчугашевти
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
