Николай Огородников ӱреен
15.11.2023
Хабарлар
Киҷее, кічіг хырлас айының 14-ҷі кӱнінде, ӱр ағырған соонаң имнег туразында Хакасияның саблығ хабарҷызы, «Хакасия» газетаның ӧӧн редакторы полған Николай Дмитриевич Огородников ӱреен. Ағаа 73 час полған.
Николай Огородников 1950 чылда 11 майда Ағбан пилтірі посёлокта тӧреен. Иркутсктағы хазна университедінде журналистика факультедін паза Новосибирсктегі партияның пӧзік школазын (ВПШ-ны) тоосхан. Ағбан пилтірі аймаандағы «Путь к коммунизму» газетада сомҷы паза литература тоғынҷызы полып істеніс чолын пастаан. 1975 чылдаң сығара «Красноярский комсомолец» крайдағы чииттер газетазының редакциязында тоғынған, 1979 чылдаң — «Красноярский рабочий» край газетазында, 1982 чылдаң сығара «Советская Хакасия» область газетазының редактор орынҷызы полған. Николай Дмитриевич 15 чыл, 1994 чылдаң пасти 2009 чылға теере, «Хакасия» республика газетазының ӧӧн редакторы полып тоғынған. Аның устаанынаң редакциязар опыттығ паза чиит хабарҷылар алылған, кӧбізі пӱӱнгі кӱнге теере республика газетазында істенерін узаратча. Тиксі алза, Николай Огородников Хакасияның СМИ тилізіне улуғ хозым ит салған.
Аннаң пасха, Н.Д.Огородников хазнаның паза республиканың ӱлгӱ паза халых чуртазында ӧткін араласхан: 1990—1993 чылларда Россияның чон депутады, Россияның Ӧӧркі Чӧбінің Национальностьтар Чӧбінің члені, чоннар аразындағы киректерҷе паза тастындағы экономика палғалыстарынҷа комитет кізізі полған.
Туған-чағыннары искіриинең, Н.Д.Огородниковты тӱгенҷі чолына пу пятницада, кічіг хырлас айының 17-ҷі кӱнінде, 14.20 часта пу адресче ӱдезерлер: Ағбан г., Кожевеннай ор., 34, кічіг залда.
«Хакас чирі» республика газетазының редакция ӧмезі Николай Огородников ӱреенінең «Хакасия» газетаның редакция ӧмезінің паза туған-чағыннарының чобаанаң ӱлесче.
Сом «Хакасия» газетаның сайтынаң
Автор :
«Хакас чирі» республика газетазының редакция ӧмезі
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
