Чорых сағыста ӱрге халзын
21.11.2023
Хабарлар
![Чорых сағыста ӱрге халзын Чорых сағыста ӱрге халзын](/upload/iblock/eb8/w1zcllio4wyiwyasi78kass9q9bs6frz.jpg)
Хабазығ. Хакасияның хабазиинаң Червонопартизансктың 3№ школазының ӱгренҷілеріне Москвазар «Россия» чоннар аразындағы кӧзідіг-форумға пар килер оңдай полды
Иртен иртӧк кічіг хырлас айының 20-ҷі кӱнінде Червонопартизансктың 3№ школазының пис ӱгренҷізі паза класс устағҷызы улуғ чорыхха сығыбысханнар. Олар Москвазар чол тутханнар.
Хакасия пазы Валентин Коноваловтың чарадиинаң паза республиканың ӱгредіг паза наука министерствозы хабазиинаң Москвадаң палалар Хакасиязар килерлер.
– Червонопартизансктағылар Москвада экскурсиянаң чӧрерлер. Пӱӱн ВДНХ-да Хакасия кӱні таныхталча. Анда піс кӧзідіг араласчыларын регионыбыснаң таныстырарбыс. Олғаннарға анда хынығ полар тіп сағынчам. Аның соонаң олғаннар Ағбанзар чол тударлар. Мында олар кічіг хырлас айының 29-ҷы кӱніне теере чуртирлар. Олар мында городта ла нимес, ідӧк прай республикаҷа чорыхнаң чӧрерлер. Программа хоостыра олар Салбых кӱргенде, Сойан-Сус ГЭС-та пол пар килерге киректер. Ізенчем, чорых ӱгренҷілернің кӧңнілеріне кірер,–таныхтапча Хакасияның наа регионнарнаң палғалыс тударынҷа чӧп аппарадының устағҷызы Сергей Ромашов.
– Хакас Республикаа паза ӱгредіг министерствозына пістің палаларыбысты мындағ чапсых чорыхха пар килерге оңдай пирген ӱчӱн алғызым читірчем. Хакасия піске ам даа таныс нимес регион. Пістің олғаннарыбыс анда сіліг чир-чайаанны кӧріп аларлар, чир-суғ ӱгренҷең музейде пол килерлер паза хакас тілі уроктарында поларларына ӧрінчелер, – кӧңнін чазырбинча Червонопартизансктың 3№ школазының директоры Светлана Демченко. – Че иң чӱрексіністіг мероприятие – ол дипломаттар школазы азылғаны. Чорыхта араласчатхан олғаннар чахсы ӱгренчелер паза обществознание предметке хынчалар. Аннаңар дипломаттар школазының ӧткін араласчызы поларларына ізенчем.
Олғаннар даа кӧңнілерін чазырбинчалар. Илья Скорозвонның іҷезі Анна оолғын хорыхпин чорыхха позытхан:
– Ол ізестіг нанҷыларынаң хада. Ідӧк олғаннар класс устағҷының хайииндалар. Минің палам анда наа пілістер алып алар, кӧп таныстар таап алар тіп сағынчам. Хакасия – ол хайхастығ чир нооза, – таныхтаан іҷе.
– Наа олғаннарнаң танызып аларға паза чапсых орыннар кӧрерге пӧгін тутчам, – хосча Вадим Мартыненко. – Хакасиядаңар чағын піліп аларға сағынчам. Ол піске школаны тыхтаан паза аннаң андар сыйыхтар итче, пісті ӧріндірче.
Сом авторни
Автор :
Свердловск городтың паза Свердловск аймааның администрациязы
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде