Чуғынҷах мал ағырии Тазоба пилтірінде сығысхан
22.11.2023
Хабарлар
![Чуғынҷах мал ағырии Тазоба пилтірінде сығысхан Чуғынҷах мал ағырии Тазоба пилтірінде сығысхан](/upload/iblock/7b9/50a2dswjgwt88ms073rc3v6ellm46qdm.jpg)
Сергей Труфанов, Гульнара Керимова
Брифинг. Киҷее Хакасияның аал хонии паза ас-тамах министерствозында узелковай дерматит чуғынҷах ағырығ тарапчатханына чарыдылған брифинг ирткен
Чарыс айының 11-ҷі кӱнінең сығара тиксі Хакасияда сағыбаан саай режимі кирілген. Анзы Боградта узелковай дерматит мал ағырии сығысханынаң палғалыстығ. Ол аалдағы прай маллар чох иділген дее ползалар, кічіг хырлас айында Боград аймаандағы Знаменка аалда маллар ағырыбысханнар. Ирткен тынағ кӱнінде Ағбан пилтірі аймаандағы Тазоба пилтірі аалда пуох ағырығнаң хойлар ағырыбысханы сығысхан. Боградта ағырығ паза аны чухтырып алар прай інектер, хойлар паза сосхалар чох иділген дее ползалар, узелковай дерматит ноға пасха орыннарда сығысча?
Хакасияның аал хонии паза ас-тамах министрі Сергей Труфанов ағырығ хайдағ сылтағларнаң тарапчатханынаңар паза аны тохтадар хайдағ тоғыс апарылчатханнаңар чоохтап пирген:
– Боград аал чӧбі ағырығны чох идерінҷе паза аны таратпазынҷа тоғыс апарча. Маллар турған орыннар арығлалча, анда дезинфекция иртірілче. Амды Знаменкада ағырығ сығысхан. Анда хай пірее чуртағҷылар малларына вакцина турғыстырбиныбысханнар. Боградта ағырығ сығысханда, кем-де Знаменка аал чуртағҷыларына хойларын садыбысхан. Ағырығ хойларны пір орамадағы хойларнаң хада хадарғаннар. Мындағ оңдайнаң ағырығ 210 пас малға паза хойға тарап парыбысхан.
Тазоба пилтірінде узелковай дерматит ағырығ 400 азыра пас хойға паза 39 пас інекке тарап парыбысхан. Анда ағырығ сығысханының сылтаа – Тувадаң ағырығ хойлар ағылғаны. Хонҷых республикадаң алылған хойларға пір дее пічік чох полған. Оларны мал имҷілері сыныхтаанда, илееде ағырығ таап алғаннар. Хакасияның аал хонии паза ас-тамах министерствозы пу кирек хоостыра істезіг органнарынзар сурыныс пічиин пас салған.
Таныхтирға кирек, Боград аалда узелковай дерматит ағырығ сығысханда, хыриндағы паза 30 километрге теере орныхчатхан прай ааллардағы малларға пу ағырығдаң тоғыр вакцина иртірерденер чарадығ алылған. Че прайзы малларына прививка турғыстырарға ынабаан. Амды вакцинация иртпеен мал ағырыбысса алай ол ағырығ малнаң палғалыстығ полза, аны чох иткен ӱчӱн компенсация пирілбес. Пічікке кирілбеен мал ӱчӱн ідӧк ахча тӧлелбинче. Боград чуртағҷылары малларын, пирерге ынабин, чазырчалар. Кічіг хырлас айының 20-ҷі кӱнінде анда пір пуға паза ікі сосха табылған. Олар пір дее чирде саналбинчатханнар. Амды ветеринар устанызының тоғынҷылары Боградта кӧп квартиралығ тураларны даа сыныхтапчалар. Карантин хатап 30 кӱнге узарадылған.
Хакасияның аал хонии паза ас-тамах министерствозының ветеринария департаментінің устағҷызы Гульнара Керимованың чооғынаң, Тазоба пилтірінде ағырығ сығысхан орамадағы маллар чох иділер, пасха орамалардағы паза хонҷых ааллардағы малларға вакцина турғызылар. Вакцинация ирткен прай маллар хайығда поларлар. Знаменка аалда ідӧк пір ле орамадағы маллар чох иділер.
Ағырығ пасха аймахтарзар тарабас ӱчӱн, аал чуртағҷыларынаң чыылығлар иртірілче паза оларға хайди тудынарынҷа чӧптер пирілче.
Сом Альбина Чистогашевани
Автор :
Оксана Челтыгмашева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде