Хар хайылғанҷа марығласханнар
22.11.2023
Хабарлар
Сол саринаң Иван Безматерных, Александр Терентьев паза Иван Горбунов
Спорт. Тынағ кӱннерінде Асхыс аймаандағы Тӧӧ пазы поселокта саналығ чарысча Хакасияның кубогы ирткен
Кибір хоостыра Хакасия cаналығ чарысча пастағы марығларны удурлапча. Алында пістің республикада иртчеткен арға-мӧрійлерде чииттер кӱстерін cынаҷаңнар. Че 2022 чылда Россия спортсменнерінең тоғыр хатығластар кирілгенде, оол-хыстарға олимп чемпионнары паза призерлары хозылғаннар. Итсе, олар полған на турнирге сыхпинчалар. Кӧбізінің ӧӧн пӧгіні – тренировкалар иртіріп, кӱс алынып алары. Пӱӱл Хакасиязар сборларға иң кӱстіг cпортсменнер – Александр Большунов, Алексей Червоткин, Денис Спицов, Наталья Терентьева (Непряева), Татьяна Сорина, Вероника Степанова, Иван Якимушкин, Александр Терентьев – учух килгеннер. Олимпиецтернің піреезі Хакасиядағы тунирлерде аралазар ни?
Хакасияның кубогы ікі чарыстаң пӱткен. Чечіме кӱнде классика оңдайлығ спринт ирткен. Позырахта, тізең, спортсменнер саналығ чарыста устарын кӧзіткеннер. Абахайлар 5 километрні тобырғаннар, иреннер – 10 километрні. Республиканың СМИ-ларында істенчеткен хабарҷылар 18 ноябрьда полған марығны пос хараанаң кӧріп алғаннар.
Чоохтирға кирек, Тӧӧ пазы полған на сай чапсытча. Кізілер чир-чайаанға, арығ кииге, тирең харға аптаттырчалар. Пӱӱл поселок улуғ нимес наңмырнаң паза хайылчатхан харнаң таңнатты. Пір саринаң чылығ, олох туста мындағ оңдайларда спортсменнер саналығ чӱгӱр поларлар ба?
Пічіктер хоостыра пӱӱл спринтте 281 кізі узын сынаптыр, олардаң 182 ирен паза 99 ипчі. Анзы пылтырғызынаң кӧп. 2023 чылда пас меетке 230 спортсмен сыххан. Абахайлар 1,6 километр чӱгӱргеннер, иреннер – 1,7 километр. Марығ оңдайларынҷа чӱгӱріктер пастап квалификация иртчелер. Олардаң азах мееттің тӧртінҷі чардығына 30-ар кізі сыхча. Чарым финалда 12-ер спортсмен араласча, азах меетте – 6-ар кізі.
Ипчілер аразында олимпиецтер чох полған. Позым чоннар аразындағы класстығ спорт узы Алиса Жамбалованың ӱчӱн «ағырғам». Пӱрӱт чонның хызы чарым финалға иртіп алған, че азах меетке сығар кӱзі читпиндір. Ізестіг спортсменге Арина Кусургашева саналча. 21 частығ хыс Тағлығ Алтайдаң. Пӱӱл аның чидіглерге пай чыл. Арина, 10 километрні конёк оңдайынаң тобырып, Сибирьнің паза Ыраххы Востоктың мариинда чиңіс тутхан, пуох дистанцияда Россия первенствозында ӱзінҷі орынға сыххан. Россия чемпионадының марафонында (аның узуны 50 километр) пизінҷізі полыбысхан. Алтай хыс саналығ чӱгӱріcнең толдыра кӱзінең 2019 чылдаң на айғасча, аннаңар Кусургашеваның салтарлары тренерлерні чапсытчалар. Ол Россияның піріктірілген командазынзар кірче. Алтай абахайы Хакасияның кубогының ікі мариинда араластыр. Спринтте ағаа оң полбаан, чарыста Алина 36-ҷы орынға сыххан. Жамбаловадаңар чоохтаза, 5 километрні тобырып, ол 20-ҷізі полыбыстыр. Хыстарның салтарларына хомзынарға кирек чоғыл. Сезон ам на пасталча. Алнында пас мееттер кӧп.
Спринтсер айланза, прайзын асхан Алёна Баранова. Ол 1,6 километрні 4:13:88 тусха чӱгӱрібіскен. Ольга Сергеева кӱмӱс медаль утхан, Дарья Непряева – хола медаль. Хайди таныхтаан Баранова, марығлазарға сидік полбаан. Наталья Терентьева (Непряева) чӱгӱрген полза, хатығ чуғарҷых.
Иреннер аразында чиңізінең Александр Терентьев ӧріндірген. Ағбандағылар Тӧӧ пазынзар аның ӱчӱн «ағырарға» ӧнетін килтірлер. 24 частығ оол – Олимп ойыннарының хола призеры. Саналығ чӱгӱріснең 3 частаң айғас парир. Пылтыр Терентьев, квалификацияны прайзынаң чахсы чӱгӱрібізіп, чарым финалға ирт полбаан. Андағ ниме полбазын тіп, спортсмен тренері Юрий Бородавконаң хада прай программаны алыстырған. Чиит кізі алтын медальына прай чӱреенең ӧрінчеткен. Ікінҷі орынға сыххан Иван Безматерных, ӱзінҷі орынға – Иван Горбунов.
19 ноябрьда саналығ чарыс полған. Анда 338 спортсмен кӱзін сынаптыр. Ӱс хати Олимп чемпионы Александр Большунов Хакасияның кубогында араласпас тееннер. Че, арғыстарының марығласчатханын кӧріп, сыдаспаан, неке. Ол, 10 километрні 21:49 тусха чӱгӱрібізіп, чиңіc тутхан. Ипчілердең Алина Пеклецова алтын медаль холға кирген.
Олимп резерві училищезінің (техникумының) устағ-пастаан махтирға кирек. Директор Денис Какояков Тӧӧ пазынзар 30 студентті ағылтыр. Кӧбізі поселокта пастағызын на полтыр. 23 – 26 ноябрьда саналығ чарысча Россия кубогының І чардығы иртер. Спорт министрінің тоғызын толдырчатхан Сергей Кочан чуртағҷыларны марыға хығырған.
Сом Альбина Чистогашевани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
