Парыс – иң хайхастығ ачын аң
23.11.2023
Хабарлар
Чорых араласчылары парысха чарыдылған музейде
Чапсых чорых. Хакасияның паза Хызылчарның туроператорларына паза хабарҷыларына Шушенскайдағы музейзер пар килер оңдай полды. Анда пӱӱл иң сiлiг паза Чоннар аразындағы Хызыл книгаа кирiлген аңа чарыдылған экспозиция азылған
«Cаяно-Шушенский» заповедник 1976 чылда тӧстелген, 1985 чылда, тiзең, ол ЮНЕСКО списогына кирiлген. Аның улии – 390 муң квадрат метр. Анда кӧп аң-хус чуртапча. Ол тағ ӧскілері, сыыннар, табырғалар, чохыр аңнар паза даа пасхазы. Iдӧк Чоннар аразындағы Хызыл книгаа кирiлген аң чуртапча – ол парыс. Заповедниктiң инспекторлары оларны сыбыра хайығда тутчалар, чуртастарын iстесчелер. Амды анда тоғыс парыс чуртапча. Тиксi тилекейде, тiзең, оларның саны iдӧк кӧп нимес. 2020 чылдағы сананыстарҷа, 2,7–3,4 муң хоосха полған. Парысха прай хазналарда аңнирға чарадылбинча паза нинҷе-де хазна «Глобальная программа по сохранению снежного барса и его экосистем» программа алған, хайзы пу ачын аңны паза аның чуртапчатхан орнын хайраллирына кӧстеглiг, ӧӧнiнде браконьерлердең.
Пӱӱл «Cаяно-Шушенский» заповедниктiң паза «Шушенский бор» национальнай парктың устағ-пастағ-экскурсия комплексiнде пу хайхастығ аңа чарыдылған музей азылған. Ол «Парыстың чурты» адалча. Аны азар ӱчӱн музей комплексiнiң устағ-пастаа 10 чыл азыра тимнеглiг тоғыс апарған. Чӧптезiглер, сурығлар, сананыстар кӧп полған. Орыс география пірігізі паза «Возрождение природы» полызығлығ фондтың хабазиинаң мындағ чапсых музей пӱӱл туристтерге iзиин асты. Экспозиция «Парыс iзiнҷе» адалча.
Анда ниме кӧрерге чарир? Хабарҷыларның паза экскурсоводтарның алнында олаңай ах пластиктең идiлген iзiк турча, кӧзенектерi хара ПВХ-даң тимнелген. Iстiндегi ниме-ноо пiр дее кӧрiнминче.
Ол iзiк азыл парғанда, пiс парыс чуртапчатхан чирзер кiр парған чiли пiлдiр парған. Музейнiң специалисттерi экспозицияның 150 квадрат метрiнiң полған на сантиметрiн паза миллиметрiн ипти сағынып пӱдiр салтырлар. Аалҷылар «Саяно-Шушенский» заповедниктегi тирең «хуйуларзар» тӱскеннер, чiке хайалығ «тағларзар» сыхханнар, парыс, тағда оттапчатхан табырғаа чидiп, аны ыра тартчатханын кӧргеннер паза аның хазыр ыыранчатханын искеннер. Iдӧк оларға тойлығ парысты китеп аларға оң полған. Аны заповедниктiң инспекторлары фотоловушкаа суурып алғаннар. Таныхтирға кирек, мындағ оң оларға удаа полбинча. Аннаң пасха, музейде парыстың iстерiн, тӱктерiн, чiтiг тырғахтарын кӧрiп аларға чарир. Iдӧк интерактивнай экранда аның аңнапчатханын, чуртапчатхан орнын кӧрiп аларға чапсых полған.
Экспозицияларны «За природу» компанияның специалисттерi, прай сағынып, чуртасха киргеннер. Олар амғы тусха прай килiстiрелер.
Музей cпециализi Альбина Склярның искiриинең, заповедниктегi парыстарның кӧбiзi iргек, iкi ле тiзi. Итсе-де, нинҷе-де чыл мының алнында анда пiр ле парыс халған полған – Ихтиандр. Аннаңар «Парыстарның санын хозардаңар» федеральнай программаҷа 2018 чылда Таджикистан президентi Россияа пiр iргек паза пiр тiзi парыс сыйлап пирген. Пу хазнада ачын аңны хайраллирынҷа кӧп тоғыс апарылча, аннаңар анда оларның саны кӧп арах.
Таджикистаннаң ағылған аңны «Саяно-Шушенский» заповедниксер позытханнар. Ол наа орынға ниик кӧнiгiп алған. Аны заповедниктiң специалисттерi Таджичка тiп адап алғаннар. 2020 чылда аның iкi хоосхаҷах тӧреен, ирткен чылда, тiзең, ӱс. Амды заповедниктiң тоғынҷылары Таджичка ӱзiнҷi хати хоосхаҷахтар хозарын сахтапчалар. Аннаңар амды инспекторлар фотоловушкаларҷа аны китеп одырчалар. Арса, iҷе, харанмин, палаҷахтарын кӧзiт пирер. Заповедникте хоосхаҷахтар хозыл парған полза, чахсы поларҷых.
Парыстарның чуртазын iстезiп, ученайлар хайхастығ чазыттар азып одырчалар. Амға теере олар iргек паза тiзi парыстар тӧреміл хада тудынминчалар тiп санаҷаңнар. Арса, ол андағ даа полар. Че «Саяно-Шушенский» заповедникте чуртапчатхан парыстар постарын пасхаҷыл тудынчалар. Хайди кӧзiтчелер iстезiглер, Таджичканың пастағы паза iкiнҷi хати тӧреен хоосхаҷахтары Ихтиандрни полтыр. Мына мындағ хайхастығ чазыттарны пiрееде азарға килiсче ученайларға.
Парыстарның аттарынаңар хоза чоохтирға кирек. Заповедник ээлерiнiң полғанының на номерi пар. Кӧзiдiмге, SL-7 алай ба SL-15. Че заповедниктiң специалисттерi оларны пос аразында пасха иде адапчалар. Аннаңар ачын аңнарның аразында Монгол пар (ол ам чоғыл). Аны iди хазыр кӧрiзi ӱчӱн адап салғаннар. Клеопатра алай ба Клепа андағ атха абахайы ӱчӱн турысхан, Сойан парох. Оларны заповедник тоғынҷылары кӧре ле танып салчалар. Полғанының на позының ӧңi паза ойығы. Хылиинаң даа олар пасхалалчалар.
«Парыстың чурты» музейде чӧр килгенiбiсте, пiске сынап парыс чуртапчатхан орында полғанға тӧӧй пiлдiрткен.
– Пiстiң организация хаҷанох туризмнең айғасча. Пiс Хакасияның, Хызылчарның, Туваның туристтерiн хайхастығ орыннарҷа ал чӧрчебiс. «Парыс чурты» музей ӱр ниместе азылған, аннаңар пiс андар читпеен полғабыс. Амды андар пар килгенде, аны пос хараанаң кӧрiп алғанда, чонны пеер ағыларға кирек тiп сағынчабыс. Хайди пiс сизiнгебiс, амды олғаннарға паза саарбахтарға сӱлейке кистiндегi, тасхахтардағы экспонаттарны кӧрерге тың хынығ нимес. Оларға экспонаттарны тутхлирға, истерге, кӧрерге, чыстирға кирек. Аннаңар «Парыс ізінҷе» интерактивнай экспозиция оларға чапсых полар тiп сағынчам, – таныхтаан Минсуғ городтағы «Шев Тур» ООО-ның специализi Алина Шевергина.
Парыс Чоннар аразындағы Хызыл книгаа кирiлген полза даа, чылдаң чылға аның саны хызырылча. Анзына кӧп сылтағ пар. Ӧӧнi – ол браконьерлер. Пу ачын аңның теерiзi «хара» рынокта пӧзiк паалалчатханда, ағаа матап аңнапчалар. Iдӧк пу хайхастығ аңнар туйғахтығ аңнарға турғызылған хахпаннарға удаа кiрглеп парчалар. Аннаң пасха, аңнар саны хызырылчатханы климат алысчатханынаң палғалыстығ. «Саяно-Шушенский» заповедник тоғынҷыларының ӧӧн пӧгiнi, тiзең, парыстарның санын хозары. Заповедниктiң 400-ке чағын квадрат метрiнде 20 хоосхаа орын пар, чиистең дее олар хызылбастар.
Сом Альбина Чистогашевани
Автор :
Оксана Сунчугашева
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде