Хакасияда – Россия чемпионадының Суперлигадағы ойыннары
29.11.2023
Хабарлар
![Хакасияда – Россия чемпионадының Суперлигадағы ойыннары Хакасияда – Россия чемпионадының Суперлигадағы ойыннары](/upload/iblock/cc2/10ibjkfnxwww4xkos65edq05fmt65pod.jpg)
«Саяны» ӧме алнынзар парча
Меспектіг хоккей. «Саяны» команда пастағы ибдегі ойынны иртірді. Пістің ооллар «Старт» ӧменең (Нижний Новгород) тоғасханнар
Пайрамнығ чардых
Хакасияда меспектіг хоккейҷе Россия чемпионадының ойыннары иртче. Пу киректі «ағырчатхан» улус он чыл сағыды. Пастағы ибдегі матчты республика харнаң удурлаан. Анзы хоккеисттерге ойнирға харығ полтыр. Че кӧрігҷілернің кӧңнін тӱзірбеен. Кізілер ойынға чахсы чыылысханнар. Прайзы ӧрчіліг кӧңніліг. «Саяны» Суперлигада ойнапча нооза.
Матч пайрамни азылған. Анда саблығ хоккеисттерні паза тренерлерні сағысха киргеннер. Россияның спортында улуғ іс артысханнар Виктор Менжуренко, Андрей Галеев, Евгений Ерахтин, Евгений Баженов, Виктор Лабун, Александр Хрисоненко, Андрей Калинин, Евгений Ткачук паза пасхазы. Амғы хоккеисттердең алты хати тилекей чемпионын Алан Джусоевті таныхтирға кирек. Пӱӱнгі кӱнде Алан Адамович «СКА-Нефтяник» команда ӱчӱн турысча. «Енисей» ӧменің «чылтызына» Илья Лопатин саналча. Саннар хоостыра Хакасияда меспектіг хоккейнең ікі муң артиинаң пала айғасчаттыр. Оларның піреезі саблығ спортсменнернің чолын пазар тіп ікінҷілес чоғыл.
Чыылған чонға чылығ сӧстер улуғ аалҷылар читіргеннер. Ӧӧркі Чӧп кнезі Сергей Сокол, чоох тудып, теен:
– Ағбанның пустығ чазызынзар Суперлиганың матчтары айландылар. Аннаң команданы, тренерлерні паза «ағырчатхан» улусты алғыстапчам. «Саяныға» чиңіс алғапчам, «Старт» командаа – хынығ ойын.
Алғыстастарға Хакасия пазы орынҷызының тоғызын толдырчатхан Михаил Побызаков хозылған. Ол таныхтаан:
– Пу кӱннерде Хакасияда улуғ марығлар иртчелер. Чӱгӱрікчілер Тӧӧ пазында Россия кубогында устарын кӧзітчелер. Ағбан Россия чемпионадының ойыннарын удурлапча. Пістің хоккеисттернің Cуперлигада ойнир кӱзі пар. Оларға киртінчебіс.
Кӧрігҷілер Хакасияның меспектіг хоккей федерациязының президенті Юрий Шпигальскихті ізіг айа сабызынаң удурлааннар. Юрий Александрович чоохтаан:
– Арғыстар, сағынған сағызыбыс толды. «Саяны» Суперлигада! Ол прайзыбысха улуғ нандырығ полча. Піс унада саптырбасха кирекпіс. Командаа хабас пиреелер. «Саяны», алнынзар!
Чӱрексіністіг матч
25 ноябрьда Хакасиядағы ӧмее «Старт» команданаң ойнирға ӱлӱc тӱcкен. Нижний Новгородтағы клубтың тархыны пай. 1932 чылда тӧстелген ӧме совет тузындох ырахха саблан парған. «Старт» СССР-ның кубогын утхан, чемпионатта ікінҷі орынға сыххан. Амғы тустаңар чоохтаза, клуб Россия чемпионаттарында ікі хати кӱмӱс медальлар, ӱс хати хола медальлар холға кирген. 2018/2019 чылларның сезонында, тізең, команда Тилекей кубогында ӱзінҷізі полыбысхан. Кӱстіг «ыырҷынаң» пістіңнерге ойнирға сидік полар, неке. Итсе, анзын ойын на кӧзідер.
Хоккеисттер, пуссар сыххандох, ӧткін хайын сыхханнар. Трибунадаң стадионға толдыра хысхырыстар. Ӧмедегілер исчелер, уламох табырах чӱгӱрчелер. Че 7-ҷі минутада санны «ыырҷы» асхан. Ӱр дее полбаанда, «Саяны» нандыр пирген. Меспекті Денис Соловьёв арғызы Виталий Шнайдернің хабазиинаң кире сабыстыр. Кӧрігҷілернің ӧрінізі пу чир полбаан. Таныхтирға кирек, пустығ чазызар хар чаап парғаннаңар, хоккеисттерге ойнирға оой полбиндыр. Пастағы таймда спортсменнер меcпекті пусча нимес, кииҷе учухтырғаннар. Анзы «ӱстӱнҷе ойниры» адалчаттыр. Че пістің оолларны тохтат полбассың. 24-ҷі минутада пазох гол. Сан – 2:1. Анзы Иван Касаткиннің чидии. «Ағырчатхан» улустың хысхырыстарын прай Ағбан искен полар.
Аалҷылар удурласчалар. Олар «Саянының» хаалхазынзар меспекті нинҷе-де хати сала ла кире сабыспадылар. Хаалха хадағҷызы Яков Гах тоғызын чахсы итче, меспекті тут халча. Чиит кізі Кемеров облазынаң полтыр. Амғы тусха «Кузбасс-2», «Кировец» командаларда ойнирға маңнанған. Трибунадағыларны истерге хынығ. Пістің оол меспекті тудып алза, ол «чахсы табан», аалҷыларның хадағҷызы, тізең, «Саяныға» чиңіс тударға харығ полчаттыр. 26-ҷы минутада сан 3:1 пол парды. Аның авторы – Денис Петров. Пастағы тайм тоозылчатханда, Денис Соловьёв хатап ӧріндірген. Спортсменібіс 12 метрдең меспекті «ыырҷының» хаалхазынзар кире сабысты. Сан – 4:1. Кізілер ойынға тиктең килбиндірлер, «Саяны» утча.
Че ікінҷі таймда кӧрігҷілерге «Старттың» прай чидіглерін сағысха кирерге киліскен. Аалҷылар наа тыныс алып алған осхастар. Олар пістіңнерге соон сӱрістіре ӱс меспек кире сабысханнар. 82-ҷі минутада сан 4:4 пол парды. Сынны чоохтаза, кӱстіг хоккеисттер пуста морсымнығ кӧрінчелер. Ойынның халғанҷы минуталары хазыр ирткеннер. Ікі хати «Саяны» меспекті кире сабысхан тіп пілдірген. Алҷаастабысхабыс. Тренерлер Ерахтиннең Ткачук постары пуссар сығарға тимделер. Сан олох халған.
Пресс-конференция
Россия чемпионадында полған на матч соонда пресс-конференция иртче. Анда командаларның ӧӧн тренерлері ойынның салтарларын итчелер, хабарҷыларның сурығларына нандырчалар. «Старт» ӧме чоннар аразындағы класстығ спорт узы Андрей Рушкиннің устаанынаң ойнапча. Андрей Анатольевич, сағыстарынаң ӱлезіп, чоохтаан:
– Пастағы таймда пус хомай полған. Аның ӱчӱн піc ікі сан чідір салғабыс.
Рушкиннің соонда хабарҷыларнаң «Саянының» ӧӧн тренері Евгений Ерахтин тоғасхан. Хайди таныхтаан Евгений Владимирович, команданың турыстыра ойнир кӱзі паза опыды читпинче. Ӧмедегілернің аразында Суперлигада пір дее араласпаан хоккеисттер пар, че матчтаң матчха спортсменнернің узы ӧсче. Анзын ойын тузында сизінерге чарир. Ағаа хоза, ооллар ибде 27 кӱн полбиндырлар. Ойын 25 ноябрьда ирткен, хоккеисттер Ағбанзар 24 ноябрьда иртен читкеннер, тынанарға маңнанмааннар. Ікінҷі таймда «Саяны» ойнабаан тиирге чарир. Ӧме, чиңіс ӱчӱн харбазар орнына, утырбасха кӱстенген. Пресс-конференция тузында Первоуральскта ирткен матчты сағысха киргеннер. «Саяны», орындағы «Уральский трубник» клубты 4:1 саннаң утчадып, 4:5 саннаң утыр салған. Евгений Ерахтин «Стартнаң» тоғазығ ол матчха тӧӧй полған тіп чарасхан. Ӧмедегілер, салтарлар идіп, алҷаастарны тӱзедерлер.
Турнир таблицазында прайзының алнында «Кузбасс» ӧме парча, аның 18 cан. «Саяны» 11-ҷі орында. Команда 4 сан тоғынып алтыр. Киҷее иирде хоккеисттерібіс «Волга» ӧменең тоғасхан. Ойын хайди ирткеннеңер килер номерде чоохтирбыс.
Спорт министерствозы сурынызынаң пазох искірчебіс. Кӧрігҷілерні cтадионзар билеттерҷе кирчелер. Оларны ойын иртер кӱнде 18.00 часта садарға пастапчалар. Кассада билеттерні «тіріг» ахчанаң алай QR-кодча садызып аларға чарир. Карта полызиинаң санас полбассар.
Сомнар Дмитрий Сунчугашевти
Автор :
Майя Кильчичакова
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде