Владимир Путин: «Орта чолҷа парчазар, арғыстар»
20.12.2023
Хабарлар
Россия президенті Владимир Путин паза программаны апарған Екатерина Березовская
Чыл салтарлары Владимир Путиннең хада. Хакасияның ӱс хабарҷызы: «Хакас чирі» республика газетазының ӧӧн редактор орынҷызы Наталья Сюптерекова, РТС телеканалның хабарҷызы Полина Назарова паза «Хакасия» ГТРК-ның хабарҷызы Константин Кравцов – «Чыл салтарлары Владимир Путиннең хада» программада аралас килділер
Пӱӱл Россия президенті Владимир Путиннің чыл сай иртірілчеткен улуғ пресс-конференциязы ідӧк чыл сай иртіріл турған кӧні палғалыснаң пір программаа – «Чыл салтарлары Владимир Путиннең хада» – піріктірілген. Ол ирткен неделяда улуғ хырлас айының 14-ҷі кӱнінде Москвада Гостинай двор туразында ирткен.
Президент араласчатхан хайдағ даа кирекке иртіп алар ӱчӱн нинҷе-нинҷе сыныхтағ иртерге киректелче, амғы туста, тізең, сыныхтағлар уламох читі хадыл иртірілчелер. Алында улуғ пресс-конференцияа 1500-ер хабарҷы чыылысчаң полза, пӱӱл – 600 азыра ла! Прай ол наа чуғынҷах ағырығларнаң паза ӧнетін чаа операциязынаң палғалыстығ. Президенттің устағ-пастаа ағаа ла нимес, тиксі чыылысхан чонға хорғыс чох поларынаңар сағыссырапча. Аннаңар программаа чыылысчатхан хабарҷылар пастап регион синінде таллағ ирткеннер, анаң оларны округта сыныхтааннар. Программа таңдади, тізең, прайзы коронавирусха ПЦР сыныхтаанаң пасха, ідӧк А/В гриппке сыныхтағ ирткеннер. Гостинай двор туразынзар, тізең, ағырбинчатхан на хабарҷылар ирт полғаннар.
Пастыхтар чыылысчатхан хайдағ даа чыылыға кізі кеен тонанча. Аннаңар пиджак-кӧгенек кизерге хынминчатхан даа арғыстар мындағ чыылығларға килістіре тонан килчелер. Пірдең, піреезі президенттің хайиин тартар пӧгіннең чарых ӧңніг кип-азах таллирға кӱстенче: хып-хызыл, сарығ алай от кӧк. Национальнай регионнарның хабарҷылары, чон кип-азаана чазанып, пасхазының хайиин тартчатханнар. Андағлар саны илееде полған, ол санда якуттар, калмыктар, башкирлер, мордвалар паза пасхазы.
– Піc Калмык чирінең килгебіс: «Калмыкия» искіріг агентствозынаң паза «Степные вести» интернет-газетадаң. Піс Россия президенті Владимир Путинге нинҷе-де сурығ тимнеп килгебіс. Оларның пірсі хазнада, ол санда Калмыкияда, буддизм тилізіне теелче. Паза пір сурығ ісчең арығ суғ хоостыра полар, – чарыт пирген калмык чонның кип-азаана чазан салған ӱс хыстың пірсі, «Калмыкия» искіріг агентствозының хабарҷызы Амуланга Найминова. Аннаң хада «Степные вести» интернет-газетаның хабарҷызы Юлия Гермашева паза «Калмыкия» искіріг агентствозының хабарҷызы Джиргала Хейчиева полғаннар.
– Піс республикадаң Якутияның ӱс СМИ адынаң килгебіс: «Саха» ГТРК-ның национальнай вещаниезінең, «Саха» медиа паза «Улус» медиа. Таныхтирға кирек, ол телевидение, интернет-сығарыс паза газета. Иң пастап, піс Владимир Владимировичті Якутсксар хығырарға сағынчабыс, ол пісте хаҷанох полбаан, килчеткен чылда чайғызын пістің регионда Чоннар аразындағы чайғы спорт ойыннары 8-ҷі хати иртер. Араласчылар спорттың 24 кӧрімінҷе марығлазарлар. Пӱӱнгі кӱнге марығда аралазарын 20 азыра хазна киречілеен, анзы марыға чон хайиин тартар. Піс сағынчабыс, Владимир Владимирович, марыға киліп, аның синін хан тигір синіне теере кӧдірерге полызар, тирбіс, – чорых пӧгіннерін чарыт пирген Олег Марков.
Аның чир-суғҷызы Чожуур Гаврильев ікі тілнең пасчаттыр: якут паза орыс.
Якут хабарҷылары: Чожуур Гаврильев (сол саринда), Олег Марков паза Юлия Филиппова
Программаны ікі ведущай апарған: Екатерина Березовская (Пастағы канал) паза Павел Зарубин (ВГТРК). Олар ӧӧнінде чуртағҷылардаң кірген сурығларны президентке пиргеннер алай хабарҷыларның сурығларына оларны хос турғаннар. Залдағы хабарҷыларны Владимир Путин позы алай аның пресс-секретарьы Дмитрий Песков таллап турған. Олох туста стенедегі экраннарда чуртағҷыларның сурығлары кӧртізілген. Оларны президент ідӧк таныхтап турған, иң ағырсымнығларға нандырған.
Чоохтирға кирек, ікі неделя аразына – улуғ хырлас айының 1 – 14-ҷі кӱннерінде – программаа тиксі 2,5 миллион айланыс кірген. Оларны сах андох тиксі Россияның Чон фронтының волонтёрлары санға алғаннар. Россия чуртағҷылары аймах сурығларнаң айланғаннар: тиксі хазнадағы сидіксіністердең пасти кічіг аалдағы сурығларға теере. Че оларның аразында олаңай айланыстар кӧп полған, хайда чуртағҷылар Владимир Путинге киртінчеткенін паза аның политиказына хабасчатханын читіргеннер. Анзы оңарылыстығ, ол хазнабыс президентіне пазағы табығларда аралазарға чарат салған. Олар, тізең, 2024 чылның кӧрік айының 17-ҷі кӱніне турғызыл парғаннар. Ідӧк хабарҷылар паза чуртағҷылар ӧнетін чаа операциязына паза аның араласчыларына хабазарына теелчеткен сурығларны пиргеннер. Хазнабыстың амғы чуртас-экономика оңдайларынаңар сурығлар полған. Хабарҷылар даа, чуртағҷылар даа Россия президентінің чуртазына теелчеткен, аның кибірліг сӧбіре хайызығларына, Наа чыл кибірлеріне паза нап-наа технологиялар тилізіне кӧрізінеңер пілерге сағынғаннар. Іди сурығлар аразында омазынаң прай Владимир Путинге тӧӧй иреннең кӧзідіг кірген: «Владимир Владимирович, изеннер! Мин студентпін, Санкт-Петербургтағы хазна университедінде ӱгренчем. Сурарға сағынчам: Сірернің сынап двойниктер кӧп пе?» Аның алнында, тізең, хызыҷах позының чочынызын президентке читірген: «Арған сағыс тиліпчеткенде, тӱрчедең кізі орнына роботтар килер, олар ідӧк іҷе-паба алай ууҷам орнына килзелер чи?» Россия президенті Аринаҷахты ізендірген: амғы технологиялар хайди даа тилізелер, ууҷаны пір дее робот алыстыр полбас. Кӧзідігдегі позына тӧӧй кізіні Владимир Путин пу чуртаста кӧрген пастағы двойнигі теен. Че, нандырыға тирең кіріп, ол теен: нап-наа технологиялар тилізі кирек, че ол сын кізіні сағызынаң паза кӱзінең аспас ӱчӱн, ол тиліcнең устирға кирек теен ол. Ізенербіс, сурығ хайыға алылар паза тиліс кізі таныхтаан чолҷа парар.
Президент хабарҷыларнаң чоохтазығда даа хазна политиказының ӧӧн кӧcтеглерінеңер ундутпаан паза пасхазына даа ундударға пирбеен. Іди пастағы сурығларны пиргеннер чааҷылар паза чаа хабарҷылары. Пілдістіг, олар ӧнетін чаа операциязына теелгеннер. Чоохтирға кирек, ӧнетін чаа операциязында киректер хомай нимес парча. Олох туста ол чааҷыларның на хозымы нимес, че ідӧк олаңай чонның хабазии. Чон пос кӧңнінең ӧнетін чаа операциязына паза аның араласчыларына хабасча. Аның ӱчӱн Владимир Путин полған на чуртағҷаа алғызын читірген. Пӱӱнгі кӱнде мылтых тутчатхан хайдағ даа чааҷының оңдайлары, оларға читірілчеткен хазна хабазии тиңнелер, ползын ол чардыхти мобилизацияҷа хығыртылған, чӧптезігҷе служба иртчеткен алай пос кӧңнінең ӧнетін чаа операциязының пӧгіннерін толдырарға сыххан чааҷы. Владимир Путин кӧбізі чуртағҷыларны сағыссыратчатхан сурыға нандырған: хоза мобилизация чарлалбас, анзына кирексініс чоғыл.
Аннаң пасха наа регионнарның хабарҷылары сурығ пир полғаннар. Оларны регионнарның мыннаң мындархы тилізі сағыссыратхан. Ідӧк Владимир Владимировичті Донбассар ааллап хығырғаннар. Президент Россияның федеральнай бюджедінде наа регионнар тилізіне чылда 10 триллион азыра салковай кӧрілчеткеніне хайығ айландырған. Ағаа хоза пу наада Донбасста полғанынаңар чоохтаан. Аның таниинаң, пу городты Москванаң тиңнестір полбассың, че андағ даа полза, тиліске кӧп ниме иділче. Хабазығлар санында – 2%-тіг ипотека, хайзы пастап наа тураларға ла теелген полза, амды – тузаланыста полған даа тураларға.
Пасха хазналарның хабарҷылары аразында даа кемге пурун сурығ пирерін президент таллаан. Іди Дмитрий Песков «Нью-Йорк Таймс» хабарҷызына сурығ пирерге сағынғанда, Владимир Владимирович пурун «Синьхуа» искіріг агентствозына сӧс пирген. Нимені ол таныхтапча? Пӱӱнгі кӱнде кидеркі хазналар Россиядаң паза аның экономиказынаң тоғыр хатығластар сығарчатханда, піс Хыдатсар, іскеркі саринзар айланыбысхабыс. Аннаңар Россияның пасха хазналарнаң хайызығларында Хыдат пастағы орынға сыға халған. Пілдістіг, хабарҷыларға даа андағ оңдай пирілче. «Синьхуа» искіріг агентствозының хабарҷызы Лю Кай Россияның паза Хыдаттың БРИКС-тағы хайызығларынаңар паза ікі хазнаның хайызығларынаң ниме сағыпчатханынаңар сурған. Владимир Путин ікі хазнаның тӱзімніг хайызығлары тиксі тилекейде пӧзік паалалчатханын паза мыннаң мындар уламох тыып одырарына ізенчеткенін таныхтаан.
Чуртағҷыларны ідӧк прай ниме-нооға паалар ӧсчеткені сағыссыратчатханы читірілген, ол санда нымырха паазына паза таңах идіне. Владимир Путин хормачыланып нандырған: «Мин аал хонии министрінең нымырхаларың хайди тіп сурғам... – анаң чооғын хатығ ӱннең узаратхан. – Нымырха иң ниик паалығ белок полған. Халғанҷы туста чон аны хынып алча, че ол кирексіністі чабарға пістің сығарыс сині читкіҷе нимес. Импортха, тізең, чарадығ тузында пирілбин парған. Мин правительство читіре тоғынмаан ӱчӱн пыросынчам паза пу чағында паалар кирее алызарына ізенчем».
Миннең хости одырған хабарҷы Дагестаннаң полтыр. Анда 10 нымырха паазы 450 салковайға чит партыр, Хакасияда ол син нымырханы 170-ҷа салковайға садызып аларға чарир.
Халғанҷы сурығны «Коммерсантъ» газетаның хабарҷызы Андрей Колесников пирген. Ол президенттең сурған: «Сірернің андағ оңдай полған полза, 2000 чылдағы Владимир Путинге ниме тирҷіксер? Хайдағ чӧп Сірер пирерҷіксер? Нименең сизіндірерҷіксер? Пірее нимее хомзынчазар ба?»
– Ниме тирҷікпін? Мин тирҷікпін: орта чолҷа парчазар, арғыстар, – нандырған Владимир Владимирович Путин. – Нименең сизіндірерҷікпін? Піске арғыс полғаннарға иртіре киртінгенінең. Чӧптер хоостыра: Илбек орыс, Россия чонына киртінерге кирек. Ол киртіністе – Россияның хати кӱс алынарына, азахта пик турарына паза тилиріне чидіг ізенізі. Алғыс.
Программа, 12.00 часта пасталып, 16.04 часта (Москва тузы) тоозылған. Аның кӧні кӧзідиин апарғаннар «Первый», «Россия 1», «Россия 24», «НТВ», «Мир», ОТР телеканаллар паза «Маяк», «Вести FM», «Радио России» радиостанциялар. 4 час 4 минута аразына Владимир Путин тиксі 32 хабарҷының паза 43 чуртағҷының 87 суриина нандыр пирген.
Президент залдаң парыбысханда, хабарҷылар сағыс-кӧріcтерінең ӱлескеннер. Башкортостандағы «Башинформ» искіріглер агентствозының хабарҷызы Ксения Калинина программа тузында залда нинҷе хабарҷаа сурығ пирілгенін санаан. Аның таниинаң, федеральнай СМИ хабарҷыларына кӧп оңдай пирілген, регионнардағыларға – сала асхынах.
– Че андағ даа полза, прайзы постарына хайығ тартарға кӱстенген. Пӱӱл піске, Ӧфӧдең килгеннерге, талаан полбады. Хайди піс сағаабыс, сурығлар ӧӧнінде СВО-ға, экономикаа, ЖКХ-ға, пенсияларға, тӧлеглерге теелгеннер. Владимир Владимирович ӧтіг, толдыра паза сын нандырығ пир турған, сурығларға толдыра нандырарға кӱстенген.
Ксения Калининаның президентке сурығ пирҷең оңдайы полған полза, ол аны 2024 чылда Ӧфӧнің 450 чыл пайрамына хығырарға сағынған паза ӧфӧдегілерге хайдағ чапсых сыйых тимнепчеткеннеңер сурарҷых. Ікінҷі сурығ Башкортостанның тастындағы экономика хайызығларына теелерҷік. Республика Казахстаннаң, Узбекистаннаң, Хыдатнаң, Беларусьнаң аймах кӧстеглерҷе хада-пірге тоғынча, аннаңар ол президенттің пу тоғысты хайди паалапчатханын піліп аларға сағынған. Ӱзінҷі сурығ чаа хабарҷыларынаңар полған: олар чааҷыларға тиңнелчелер бе паза чааҷыларнаң тиң хабазығларнаң тузаланарынҷа чарадығлар тимнелче бе?
Хакасиядағы хабарҷыларның сурығлары, тізең, тӧӧй полған: республикада экологияны чахсыландырар пӧгіннең газ тартарға алай хара таснаң одынылчатхан тураларны чарытхы полызиинаң чылыдарына кирерге. Пу ікі оңдайның хайзына президент хабазарҷых? Че пірдеезіне сурығ пирерге ӱлӱс тӱспеен. Андағ даа полза, газ паза чарытхы инфраструктуразынаңар сурығларны чуртағҷылар даа, хабарҷылар даа пиргеннер. Олар ӱлгӱ хайиина алыларға киректер. Мыннаң мындар чуртағҷылардаң кірген 2,5 миллион айланыстарнаң тиксі Россияның Чон фронты чыл ибіре тоғынар.
Сомнар авторни паза kremlin.ru сайттаң алылған
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
