Иң артых депутаттар чӧбі табылар
29.12.2023
Хабарлар
Ӧӧркі Чӧп. Хакасияның Ӧӧркі Чӧбі кнезiнің пастағы орынҷызы Пётр Воронин устаанынаң 2023 чылның халғанҷы президиум чыылии иртті
Кӱн суриина 10 сурығ сығарылған, ол санда пір республика закон проекті, Хакасия Ӧӧркі Чӧбінің 2023 чылға паза 2024 чылға тоғыс планнары, федеральнай закон проекттеріне пис ӱндезіг паза пір закон сығарҷаң пастаға хабазығ.
Уғаа тузалығ закон проектін тимнебістір республиканың прокуратуразы. Хакасия прокуроры Сергей Фирсов «Административнай право сайбағларынаңар» республика законына алызығлар кирер пастағнаң сыхча. Ол чуртағҷыларға социальнай полызығларны читірчеткен пірігістерге теелер, ӧӧнінде кем полызығларнаң тузаланчатхан кізінең чӧптезіглерні тузында итпинче паза тоғыстарны сӧӧ тартча. Пӱӱнгі кӱнге теере пу кӧстег федеральнай синде дее, республика синінде дее хайыға алылбаан полтыр.
Президиум Хакасия Ӧӧркі Чӧбінің 2023 чылның тоғыс планына алызығлар кирерінең чарасхан. Іди алында кирілген читi закон проекті суурылған: пизінҷе Хакасия пазы закон сығарҷаң пастағҷы полған, iкiзiнҷе – Ағбан пилтірі аймааның депутаттар чӧбі. Че ӱзӱріге 24 закон проекті кирілген: 16-ны Хакасия пазы кирген, читiні – Ӧӧркі Чӧп депутаттары паза пірні – Райковтар аал чӧбінің депутаттар чӧбі. Ідӧк 2024 чылға тоғыс планы чарадылған. Аны хоостыра килчеткен чылда Хакасия пазының закон сығарҷаң пастаанаң пастағы чарым чылда тоғыс закон проекті тимнелер, ікінҷізінде – читi. Республика парламенті депутаттарының тоғыс планында пастағы чарым чылда 34 закон проектін тимнирі кӧрілче, ікінҷі чарым чылда – 25, тиксі чылға – 59. Закон сығарҷаң пасха пастағҷылардаң iкi ле закон проекті ӱзӱріге сығарылар. Тиксі пастағҷылардаң 2024 чылда 77 закон проекті ӱзӱріге сығарары чарадыл парған.
Президиум араласчылары пис федеральнай закон проектіне чахсы ӱндезіг пирерге чаратханнар. Оларда мындағ алызығлар кирердеңер чоох парча: табығ кампанияларында арған сағысты тузаланарға чарадардаңар, ниикке чӧрҷең машиналарның экологияа ӱрег ағылчатхан синін налог тӧлирінде санға алардаңар, хазна чахиин толдырчатхан пірігіc позынаңар сын нимес искіріг искіргені чӧптезіг иділген соонаң ілезіне сығарылза, чахығҷаа чӧптезігні тохтадарға чарадардаңар паза инжиниринг, промышленность дизайн оңнағларны орталирдаңар. Президиум араласчылары Хабаровск крайының закон сығарҷаң думазының закон сығарҷаң пастаана хабазарға чаратханнар. Край депутаттары посха аар тутчатханнарға арығда чирні чарым чылға (чайғы тусха) пирер пастағнаң сыхча.
Хакасия Ӧӧркі Чӧбінің орындағы пос устанысча, халых пірігістерінҷе паза чоннар аразындағы хайызығларҷа комитет кнезі Роман Челтыгмашев президиум ӱзӱриине «2024 чылда муниципальнай пӱдістернің депутаттар органнарында тоғысты иң артых толдырғаны» Хакасияның депутаттар чӧптері паза депутаттар аразындағы марығның оңдайларынаң таныстырған. Президиум пу комитет депутаттары пастаанаң чарасхан, пӱӱнгі кӱнде уғаа кирек марығ тіп таныхтаан.
– Пу марығ пастағызын на иртірілер. Піс иң артых депутаттар чӧптерін паза депутаттарны таллирбыс. Пасха регионнарда, ол санда Хызылчар крайында, мындағ марығлар пар. Олар депутаттар чӧптері аразында ла иртірчетселер, піс ідӧк депутаттар аразында иртірербіс. Прай марығда читі номинация кӧріл парған: 2000-наң асхынах чуртағҷылығ аал чӧптерінің депутаттар чӧптері, 2000 азыра чуртағҷылығ аал чӧптерінің депутаттар чӧптері, аймахтарның паза городтарның депутаттар чӧптері аразында; аалларның, аймахтарның паза посёлоктарның, городтарның депутаттары аразында, – чарытхан Роман Абрекович. – Пу марығ Хакасияда чахсы, ӧткін депутаттар чидіспинчеткен ӱчӱн иртірілче. Ізенчебіс, марығны чыл сай иртірзебіс, депутаттар чӧптерінің паза депутаттарның тоғызы хай-хай чахсыланар.
Президиум пу марығдаңар чарадиин республика газеталарында сығарарға чарат салған, аннаңар кемге кирек, хайығда тудыңар.
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
