Хабаровсктағыларнаң ойнааннар
12.01.2024
Хабарлар
![Хабаровсктағыларнаң ойнааннар Хабаровсктағыларнаң ойнааннар](/upload/iblock/5be/acoqxewvnhm1p46916tvafaqsk4wmlf7.jpg)
Пуста Хакасиядаң сыххан 6 хати тилекей чемпионы Алан Джусоев
Спорт. «Саяны» команда14 -ҷі ойынын иртірді. 8 январьда хоккеисттер «СКА-Нефтяник» ӧменең тоғасханнар
Наа чылдаң меспектіг хоккейҷе Россия чемпионадының ікінҷі хурчаа пасталған. Командалар удур-тӧдір ікінҷі хати ойнапчалар. Кӧзідімге, «Саянының» паза «СКА-Нефтяниктің» пастағы матчы 9 ноябрьда Хабаровскта ирткен. Андада пістің ооллар 0:8 саннаң утыр салғаннар. Пу понедельникте, тізең, хоккей ӧмелері Ағбандағы пуста чиңіс ӱчӱн харбасханнар.
«СКА-Нефтяник» – кӱстіг клуб. Ол 1947 чылда СССР маршалы Р.Я.Малиновскийнің чахиинаң тӧстелген. Хабаровсктағы хоккей ӧмезі хазна чемпионаттарында 1954 чылдаң тӧреміл араласчаттыр. «СКА-Нефтяниктің» чидіглер илееде. Клуб пис хати Россия чемпионы атха турысхан, СССР-ның кӱмӱс призеры пис хати полған, хола призеры – он артиинаң хати. 2022 чылдаң командада Алан Джусоевнең Семён Чупин ойнапчалар. Хоккеисттер улуғ спортсар пастағы хаалағлар Ағбанда иткеннер. Алан Адамовичті меспектіг хоккейге хынчатхан улус чахсы таныпча. Осетин чонның оолғы алты хати тилекей чемпионы атха турысхан нооза. Спортсмен Хакасиянаң пик палғалыс тутча. Пістің республикада Россияның саблығ спорт узы Алан Джусоевтің сыйыхтарына турнир иртірілче. Аның ӧӧн пӧгіні – олғаннарға узын тилідер оңдай пирері. Семён Чупиннеңер чоохтаза, ағаа 26 час. Чиит кізінің пастағы тренері – чир-суғҷыбыс Валерий Аршанов. Алында Чупин «Енисей» клубта ойнаан. Хоккеист 2021 паза 2023 чылларның Россия чемпионы полча, 2018 чылның – кӱмӱс призеры.
Ойынзар айланза, ол чапсых ирттір. Кӧрігҷілернің кӧбізі «Саяныны» пастағы таймдох унада саптырыбызар сағынған одыр. Че хоккеисттерібіс, пуста ӧткін хайынып, матап арачыланғаннар. Ол сылтағнаң тайм 0:1 саннаң тоозылған полар. Хомзындырған Никита Терёхин. «Саянының» ойынҷызы 12 метрдең голны кире саап полбиндыр. Матчтың ікінҷі чардығында «СКА-Нефтяник» команда, позын Россия чемпионы полчатханын сағысха киріп, таң, ағбандағыларға кӧзітчең ниме кӧзіт пирген. «Саянының» хаалхазынзар соон сӱрістіре хоза пис меспек учух килген. Сан – 0:6. Аалҷыларның капитаны Алан Джусоев позының адына пір меспек пас салған, ағаа хоза, ол, пас пиріп, арғыстарына ӱс гол сабызарға полыс пирген.
Пір cӧснең, 8 январьда «Саяныға» оң полбады. Ағбандағылар утыр салар тіп прайзы пілген. «Ыырҷының» хаалхазы хуруғ тур халғаны хомзындырча. Алында пістіңнернің «Динамоға» (Москва) ӱс меспек кире сабызарға кӱс читкен, «Водникке» (Архангельск) – ікі меспек. Оңдай чох полған полза саңай даа. 82-ҷі минутада Денис Соловьёв 12 метрдең кире сапхан меспекті «СКА-Нефтяниктің» хаалха хадағҷызы тудып алған.
Пресс-конференция тузында Хабаровсктағы клубтың тренері Александр Савченко, сағыстарынаң ӱлезіп, позын матап чӱрексеен тіп чоохтаптыр. Полған на сан ӱчӱн харбазығ парча, хоккеисттері, ойнир орнына, пуста турчалар тирге чарир. Ойынның салтарлары киречілепче, пастағы тайм соонда тренер кирек сӧстер тапхан.
Турнир таблицазын кӧрзе, командалардаң иң чахсы «Кузбасс» ойнапча. Кемеровтағыларның пір утырыс таа чоғыл. Кӧрігҷілер олар амғы сезонда чиңіс тударлар тіп ухаанҷылапчалар. Ікінҷі орында «Водник» (Архангельск) парча, ӱзінҷі орында – «Динамо» (Москва). «Сибсельмашты» махтирға кирек. Новосибирсктегі ӧмені кӧп сайбағ итче тіп пыролапчалар. Клуб 9-ҷы орынға сығып алды. Команда, узы паза талааны читсе, плей-оффха сығып алар оңдайлығ. «Саяны», 7 сан чыып алып, 14 ӧме аразында 13-ҷі орында парча. Кирек алызар ни? Алай Хакасияның ӧмезі пу орыннаң пӧзік кӧдірін полбас па?
Сом Дмитрий Сунчугашевти
Автор :
Тимнеен Майя Кильчичакова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде