Сағам – 11 кандидат
17.01.2024
Хабарлар
![Сағам – 11 кандидат Сағам – 11 кандидат](/upload/iblock/a8c/5dfb41b8bnep69owkmcn2a60xq9h04lg.jpg)
Табығлар-2024. Россия президентіне табығларға кандидаттарны сығарары тоозылған
Россия Федерациязының президентіне табығ кампаниязы 7 декабрьда пасталыбысхан. Хазна пазына табығлар пӱӱл часхызын иртер, ӱн пиріс ӱс кӱн парар: 15, 16 паза 17 мартта.
Хайди искірілче Россияның Ӧӧн табығ комиссиязының сайтында, тиксі Россия президентіне табығларға 15 кандидаттаң пічік кірген. Алты кандидатты пастағнаң сыхчатхан ӧмелер (табығҷылар ӧмелері) сығарғаннар, тоғыс кандидатты – политика партиялары.
Россия президентіне табығ кампаниязының пастағы чардығын 11 кандидат иртіп алған. Россияның Ӧӧн табығ комиссиязы сигіс политика партиязы сығарған кандидаттарның полномочиеліг кізілерін санға алардаңар чарадығлар алған. Андағ оңдайнаң партиялардаң сағам парчалар (кандидаттар алфавит хоостыра пирілчелер): Сергей Бабурин («Российский общенародный союз»), Андрей Богданов («Российская партия свободы и справедливости»), Владислав Даванков («Новые люди»), Сергей Малинкович («Коммунисты России»), Борис Надеждин («Гражданская инициатива»), Ирина Свиридова («Демократическая партия России»), Леонид Слуцкий (ЛДПР) паза Николай Харитонов (КПРФ).
Кандидат Владимир Михайловтың («Партия Социальной защиты») полномочиеліг кізілерін Россияның Ӧӧн табығ комиссиязы санға албасха чарадығ алған. Ӧӧн сылтағ – партия съезді партия уставының положениелерін паза «Политика партияларынаңар» федеральнай законны сайбап иртірілгені.
Россияның Ӧӧн табығ комиссиязы Россия президентіне кандидаттарны сығарған ӱс табығҷылар ӧмезін санға алардаңар чарадығ алған. Ол Анатолий Баташевті, Владимир Путинні паза Рада Русскихті сығарған ӧмелер.
Россия президентіне табығларға кандидаттарны сығарған ӱс табығҷылар ӧмезін Россияның Ӧӧн табығ комиссиязы санға албин салған. Ол Екатерина Дунцованы, Иван Отраковскийні паза Александра Тищенконы кандидат чіли сығарған ӧмелер. Ӧӧн сылтағлар – федеральнай законнарның кирексіністеріне тудынмааны паза кирек пічіктерні пирбеені.
Табығ кампаниязының теестегі чардығы – кандидаттарның ӱчӱн хол салғанын чыыры паза кандидаттарны пічікке киреріне Россияның Ӧӧн табығ комиссиязынзар кирек пічіктер пирері.
Закон хоостыра Россияның Хазна Думазынзар кірчеткен партиялар сығарған кандидаттарға хол салғанын чыыры кирек чоғыл, оларға пічіктер ле пир саларға киректелче. Парламент партиялары сығарған кандидаттар: Владислав Даванков («Новые люди»), Леонид Слуцкий (ЛДПР) паза Николай Харитонов (КПРФ). Россияның Ӧӧн табығ комиссиязы, оларның пічіктерін сыныхтабызып, оларны кандидат чіли санға аларға чарадығ алған. Андағ оңдайнаң пу ӱзӧлең амғы тусха «толдыразынаң, официально санға алыл парған кандидаттар» полчалар.
Хазна Думазынзар кірбинчеткен партиялар сығарған кандидаттарға 100 муңнаң ас нимес хол салғанын чыып аларға паза оларны 2024 чылның 31 январьына теере Россияның Ӧӧн табығ комиссиязынзар пир саларға киректелче. Пос посты сығарған кандидаттар (хайзылары табығҷылар ӧмелері пастыра сығарылғаннар) 300 муңнаң ас нимес хол салғанын чыып аларға киректер.
Автор :
Альберт Толмашов
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде