Наа чол – хоза наа оңдайлар
24.01.2024
Хабарлар
Алексей Туманин ӧнетін тахта трестінің монтажнигі Роман Костяковха Аарластығ пічік читірген
Танығлығ кирек. Пу кӱннерде Асхыс аймаанда тимір чолның Хамыстығ – Ӱӱ тағ, Хааң кӧл – Кирбі кизектерінде ікінҷi чол пайрамни азылған
Ол Хызылчар тимір чолы устаа пастаанаң «Увеличение пропускной способности участка Артышта – Междуреченск – Тайшет» инвестиция проектi хоостыра пӱдірілген. Прай тоғысты чарым чылға азынада толдырыбысханнар. Тимірчолҷыларны алғыстирға Хакасияның транспорт паза чол хонии министрiнiң орынҷызы Михаил Евтушенко, Асхыс аймаа пазының орынҷызы Николай Асочаков, Хызылчар тимір чолы пастығы Алексей Туманин килгеннер.
Пастағы сӧс Алексей Туманинге пирілген. Аның таниинаң, тимір чолның кизектерінде азылған ікінҷi чол уғаа кирек. Ол ікі объекттең тимір чолның Ағбан – Междуреченск – Тайшет кидеркі кизегі пӱдіріл парды. Амды Ағбан паза Междуреченск аразындағы тимір чолда энергетика объекттерін турғыс саларға паза Чартых – Хамыстығ станциялар аразындағы тимір чолда улуғ нимес тоғыстар толдырыбызарға халды. Ідӧк Хамзас паза Писхамҷы станцияларны нааҷылабызарға киректелче. Че ӧӧн тоғысты тимірчолҷылар тузында толдырыбысханнар – 50 километр артиинаң тимір чол салылған, читі улуғ объект пӱдірілген. Ағаа 25 миллиард салковай артиинаң позыдылған.
– Таарлағларның 87 %-і тимір чол транспортынаң сығарылчатханда, регион паза хазна экономиказы тилізіне ол объекттер уғаа киректер. Пу проектті толдырғаннарға улуғ алғызым читірчем. Наа чидіглер алғапчам, – таныхтаан Алексей Туманин.
Чооғын тоозып, ол тимірчолҷыларға сыйыхтар читірген. Аарластығ пічіктер алғаннар санында ӧнетін тахта трестінің монтажниктері Роман Костяков, Александр Пакачаков, линия механигі Анатолий Спирин полғаннар.
Хакасияның транспорт паза чол хонии министрінің орынҷызы Михаил Евтушенко, улуғ тоғыс толдырыбысхан тимірчолҷыларны алғыстап, теен:
– Пӱӱнгі кӱнде Россия экономиказы чолын іскер алыстырча. Аны хоостыра кӧп таарлағны ол саринзар ызарын ӧскірерге киректелче. Аннаңар іскеркі полигонны тилідер мероприятиелер хазна правительствозының улуғ хайиинда полчалар. Наа объектті тузаланысха кирчеткені экономиканы тыыдарына наа хаалағ полча.
Михаил Евтушенко Хакасия пазының алғызын читірген. Ағаа турысханнарның санында аймахтағы чарытхы сетьінің пастығы Роман Тюдешев полған.
Асхыс аймаа пазының орынҷызы Николай Асочаковтың таниинаң, пӱӱл Асхыс аймаа 100 чазын таныхтир. Наа ла тӧстелчеткенде, аймахта 18 аал саналған. Че, тимір чол пӱдіріліп пастаанда, аймахтың тилізі айнып сыххан. Тимір чол станциялары хыринда наа поселоктар пӱткеннер. Амғы туста чуртағҷылар санынаң Асхыс поселок аймах кінінең не халча. Аймахтың экономиказы ӧӧнінде тимір чолнаң палғалыстығ, ол кӧп тоғыс орнын пирче.
Асхыс аймаа устағ-пастааның Аарластығ пічиине турысханнар санында улуғ электромеханик Артур Косточаков полған.
Хызыл чалама хыплал парғанда, тимір чолның кизектеріндегі ікінҷі чолҷа пастағызын на поезд ирт парыбысхан. Хайди таныхтаан Николай Асочаков, толдырылған проект Асхыс аймаана уғаа кирек. Аймахча тимір чолның улуғ сетьі иртче. Писхамҷыда паза Асхыс поселокта аймах материалларны таарлапчалар паза тӱзірчелер. Аймах iдӧк хара тасты кӧп тартарға пӧгінче, мыннаң Кемеров облазынзар топливо ызылча. Тимір чолның кизектерiндегі ікінҷі чол хоза тоғыс орнын пирер.
Сом авторни
Автор :
Антон Чертыков
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 29 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
