Театрзар наа артисттер алылчалар
24.01.2024
Хабарлар
Тагир Челтыгмашев, Аделина Тохтобина, Денис Иптышев, Екатерина Асочакова
Чайаачыларыбыс. Пу кӱннерде «Читiген» Хакас национальнай драма паза чон сарыннары театрында тоғысха алар пӧгiннең чиит оол-хыстар аразында кастингтiң пастағы чардығы ирткен
Пастағы кӱнде кастингтi иртiрчеткен комиссия кiзiлерi – театрның директоры Ирина Чустугешева, Хакасияның чон артизi, театрның хоос устағҷызы Валерий Топоев, Хакасия искусствозының саблығ деятельi, драматург, «Читiген» театрның хоосчы-постановщигi Александр Котожеков, Хакасияның чон артизi Степанида Саможикова паза «Читiген» театрның режиссёры Каскар Чаптыков – чиит оол-хыстарнаң танысхан оңдайнаң олаңай ла чоохтасханнар. Таллағның iкiнҷi чардығында олар кастинг араласчыларының чайаачы оңдайларын паалирлар. Ноға «Читiген» театрда мындағ таллағ иртiрерге чарадығ алғаннарын режиссёр Каскар Геннадьевич чарыт пирген:
– Пылтыр пiс, театрның устағ-пастаанаң чӧптезiп, театрға «наа хан хозарға» сағыс тудыбысхабыс. Пiске чиит тӧл кирек. Олар театрда асхынахтар, чидiспинчелер. Амғы пазылған пьесалар хоостыра кӧбiзi чииттер аралазарға киректелче, аннаңар андағ сағыснаң пу таллағны иртiрчебiс. Пӱӱнгi кӱнде «Читiген» театрда чибiргiҷе артист тоғынча.
Кастингте 18 – 24 частығ оол-хыстар араласчалар. Ӧӧнi – оларға хайди даа хакас тiлiн пiлерге кирек. Iдӧк чооғын истербiс, тастындағы кӧрiмiн паалирбыс. Пiске алыптар, хакас ооллар, чидiспинче. Артисттернiң частары хоостыра «тирең оймах» пол парча. Халғанҷы чииттер театрзар килгеннең сигiс чыл ирт парған.
Таллағның пастағы чардығы театрның кӧрiгҷiлер залында ирткен. Оол-хыстарны андар чоохтазыға пiрердең киргеннер. Ол арада пiс теестерiн сахтапчатхан чииттернең фойеде чоохтазып алғабыс.
– Минiң адым – Денис Иптышев, Алтай аймаандағы Аршаннар аалынаңмын, анда 10 класс тоосхам. Анаң Ағбандағы коммунальнай хоных паза сервис техникумында инженерге ӱгренгем. Ӱгредиим тоозыбысхам, ам ибдең сығара тоғынчам, телеграмда «Хакас тiлi» группаның администраторы полчам, мультфильмнер хоостапчам. Мин кӧмес чатханнаң ойнапчам. Пу кӧг тириинең ойнирға Сергей Трофимович Чарков ӱгреткен. Iдӧк кибелicтер хығырарға хынчам, – позынаңар чоохтаан чиит оол.
Денис Иптышев «Читiген» театр кастинг иртiрчеткенiн «ВКонтакте» соцсеть пастыра пiлiп алған. Iдӧк пу кӱннерде театрда «Палака» наа ойын полған. Аны кӧрерге ӧнетiн чӧрген, спектакль кӧңнiне тың кiрген. Кастингтi иртiп алза, театрда тоғынҷаң кӧңнi пар. Аршаннар аалындағы школада ӱгренгенде, Денис ӱлӱкӱннерде нанҷыларынаң хада ойыннар кӧзiдерге хынҷаң.
– Мин Аделина Тохтобина полчам, Асхыс аймаандағы Полтах аалдаңмын, – хакас тiлiнең арығ чоохтанып, пiснең танысхан абахай хыс. – 2017 чылда школа тоосхам. Анаң Хызылчарда экономистке ӱгренерге колледжсер кiрiп алғам, че аны тооспаам, Хакасиязар нандыра айлан килгем. Саяногорсктағы техникумда юристке ӱгренгем. Аны тоозыбысхам. Ағаа хоза В.Г.Чаптыковтың адынаң Хакас филармониязында пис чыл тоғынғам, «Кӱн сузы» ансамбльда теелбектенгем. Пылтыр филармониядаң парыбысхам. Хакас культуразынаң пик палғалыстығбын. Амғы туста Ағбан пилтiрi аймаандағы Чапаев аалда чуртапчам.
Аделина Тохтобинаны кастингте аралазарға туған-чағыннары ызыбысханнар. «Хайди даа пар кил, сағаа ол кирек», – тееннер олар. Таллағның чайаачы чардығында чиит хыс сарнабызарға сағынча. Ол, 2018 чылда «Мисс Абахай» марығда араласханда, Михаил Кильчичаковтың кибелiзiне пазылған «Кирi тыт» сарынны сарнаан. Ам аныох толдырар. Прай ниме чахсы ирт парза, «Читiген» театрда тоғынҷаң кӧңнi пар.
– Арса, сӧбiреңде чайаачы кiзiлер пар? – сурғабыс пiс.
– Пабам Константин Ефимович Тохтобин хоосчы кiзi полған, паза ол ағаста чахсы киртчең. Аның туңмазы Алёна Ефимовна Топоева А.М.Топановтың адынаң Хакас драма театрында, артист полып, илееде чыллар тоғынған. Позым филармонияда тоғынғанымда, гастрольларға чӧрерге кӧп килicчең, аннаңар тилем театрзар ойыннар кӧрерге чӧрҷең тус чох полҷаң.
Кастингке паза пiр чиит оол килген, аннаң танызыбох алғабыс.
– Мин Тагир Челтыгмашев полчам, Ағбанда тӧреем, олған садына городта чӧргем. Кiчiгде Асхыс аймаандағы Оңхак аалда iҷемнiң саринаң тай ууҷамда чуртаам, анаң Индiркi Пазада – пабамның саринаң ууҷамда. Тоң хакас аалларда чуртап, мин тӧреен тiлiмнi чахсы пiлчем. Ағаа хоза, сӧбiреде iҷемнең пабам саңай хакастасчалар. Мин Н.Ф.Катановтың адынаң Хакас национальнай гимназияны тоосхам. Амды ХГУ-да пастағы курста хакас паза орыс тiллерi паза литература ӱгретчiзiне ӱгренчем, группада староста полчам. Кастингтеңер мағаа iҷем Анна Владимировна чоохтаан. Олған тузымда мин Асхыстағы музыка школазына чӧргем, анда хайлирға, хомыснаң ойнирға ӱгреткеннер. Аннаңар сценадаң хорыхпинчам.
Таллағның чайаачы чардығында Михаил Кильчичаковтың «Iкi кинек» кибелiзiн чоохтап пирерге сағынчам. Ноға аны алып алғам? Иң пастағызы, ол оой ӱгренiлче. Iкiнҷiзi, ол тирең сағыстығ кибелiс полча. Илбек Ада чаа тузында ағас чааҷаа полыс пирче. Анаң кӧп чыллар пазынаң матыр ол ағаc хайди чуртапчатханын кӧрiп аларға килче, – теен ӧткiн хылыхтығ оол Тагир Челтыгмашев.
Фойеде паза пiр чиит хыс одырчатхан. Кастингте араласчазың ма тiп сурғанда, ол ӧӧрезiн сахтапчатханынаңар искiрген, анзы аралазар теен. Ӱр дее полбаанда, ӧӧрезi чиде тӱскен. Iкi хыс, хатхырызып, ӧрчiлiг чоох-чаахха кiрiбiскен. Анаң пic театрда тоғынарға сағынчатхан чалахай хыснаң танызып алғабыс.
– Минiң адым – Екатерина Асочакова. Асхыста уғаа чайаачы сӧбiреде тӧреем паза ӧскем. Iҷем Снежана Анатольевна музыка школазында iстенген, прай чуртазын музыкаа чарыт салған. Пабам Алексей Александрович iдӧк чайаачы кiзi полған, ол аймах видеолар суурҷаң, iдӧк ол теелбектенерге хынҷаң. Улуғ ачырғасха, пӱӱнгi кӱнде iҷе-пабам изен-хазых ниместер. Туңмаларым прайзы музыка школазына чӧрчелер. Позым Ағбанда искусство институдында ӱгренчем, пӱӱл аны тоосчам. Кастингтеңер ӧӧрем Кристина Токоякова чоохтаан. Ол позы «Ӱлгер» ансамбльда сарнапча. Iдӧк мин хобырахнаң ойнирға ӱгренчем. Минi «АРОН» Арт-студияда ырҷы паза кӧгҷi Аржан Тодош ӱгретче. Кастингте «Часхы пулуттар» сарынны толдыр пирерге сағынчам, – чоохтаан чалахай хыс Екатерина Асочакова.
Мындағ ӧткiн, ачых-чарых, абахай чииттер килгеннер «Читiген» театрда таллағны иртерге. Кастингтiң iкiнҷi чардығы 26 январьда иртер. Театрзар ставка асхынах, аннаңар килген чииттерге, артыхтарның артығы полыбызарға, таллағны иртерге оой ла полбас. Оларға постың чайаачы хылиин прай сығарынарға килiзер.
– «Читiгензер» iстенерге кiрiп алған чииттернiң кӧңнiлерi пар полза, соонаң артистке дее ӱгренерлер, че заочно. Чииттер, улуғ городсар очно ӱгренерге парыбыссалар, андох халчалар, тӧреен чир-суғларынзар айланминчалар. Амғы туста кӧстеглiг программаҷа iкi хыс Санкт-Петербургта ӱгренче. Ӱс чыл пазынаң «Читiген» театрзар тоғынарға килерлер, – таныхтаан режиссёр Каскар Чаптыков.
Сом авторни
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
