Пӧк полбас сидiксiнiстер чоғыл
25.01.2024
Хабарлар
![Пӧк полбас сидiксiнiстер чоғыл Пӧк полбас сидiксiнiстер чоғыл](/upload/iblock/164/cdj0du9kkseijwv71qi8gwotru5uxahd.jpg)
Виктор Азараков
Кізі паза аның тоғызы. Таштыптағы чурт-коммунальнай хоных сурығларынаң паза муниципальнай транспортнаң чонны тартарынаң айғасчатхан «Таштыптағы автоколонна» предприятиенең пiр чылҷа Виктор Азараков устаан, амғы туста ол Таштыптағы автотранспорт предприятиезінiң (АТП) устағҷызы полча
Аны Таштыпсар Ағбаннаң хығыр килгеннер, аннаңар тоғыс кӱннерiн ол мында иртiрче, тынағ кӱннерде, тiзең, городта. Хынығох чи, хайди кiзiлер iди тоғынып алчалар. Тоғазығда сурығлар сӧбiрезiне дее, тоғызына даа теелгеннер.
– Виктор Николаевич, постарыңнаңар паза устағҷы тоғызын хаҷан пастааннаңар чоохтап пиріңер?
– Пастағы хоныхта 23 частығ оолғым пар, iкiнҷi хоныхта 5 паза 10 частығ хызыҷахтар ӧсче. Ипчiм Раиса Жуманазаровна бухгалтер-экономист ӱгредiглiг, че тоғынча ипчi сiлии саринҷа, перманентнай макияжнаң айғасча. Позым мин Таштып аймаандағы Киров аалдаңмын, iҷем Зинаида Мироновна Асхыс станциязында чуртапча. Таштыптағы автоколоннанаң мин 2023 чылның 23 январьынаң сығара устап пастаам.
– Ӱгредииңер хоостыра юрист полчазар. Ноға ол профессияны таллап алғазар паза хайда ӱгренгезер?
– Юристтер хайдағ даа орында кирек полчалар, мин 23 частығда армия соонаң на ол саринзар тартыл сыхханда, ағаа ӱгрен сыххам. 1998 – 2003 чылларда «Юриспруденция» специальнозына Хакас хазна университедiнде ӱгренгем. Анаң «Хакасский» заповедникте тӧрт чыл тоғынғам, аннаң хазиим, сӧбiре сурығлары хоостыра парыбызарға килiскен. Нинҷе-де тус «Нота» ООО-да («ВСК» садығ тураларының ӧмезiне кiрче) iстенгем. 2010 – 2022 чылларда позыма тоғынғам.
– Таштыпсар наа ла килгенде, хайдағ сурығларны пастағы теесте пӧгерге килiскен?
– Иң пастағы пӧгiн полған наа ӧменi – «Таштыптағы АТП» муниципальнай казеннай предприятиенi – тӧстебiзерге, аның ӱчӱн пічіктернең кӧп чӱгӱр чӧрерге киліскен. Пiс аны пiр сағыснаң тӧстеебiс. Таштыптағы автоколонна банкрот пол парарынаң хорғыс полза, прай техника наа ӧмеде саналар. Андада аны марығ пастыра аларға киректелбес.
– Хайди Сiрернi ӧме удурлаан? Нинҷе кiзi анда тоғынча?
– Наа тоғыс орнында ӧме чахсы удурлаан, Таштыптағы автоколоннада 67 кiзi тоғынча: кочегарлар, сантехниктер, водительлер, суғ арығлаҷаң тирiглер тоғынҷылары, ӧӧн инженер, инженер-теплотехник паза пасхазы даа. Iстенерге пiлчелер, тоғыс оой нимес, чал ахчазы пӧзiк нимес. Пос холынаң кӧп тоғынарға, хараа-кӱнӧрте сығарға килiсче. Хысхызын кочегарлар 35 муң салковайға чағын алчалар, прай хара тасты пос холынаң тастапчалар.
– Таштыптағы автотранспорт предприятиезінің ӧмезiнде нинҷе кiзi саналча, нименең айғасчалар?
– Ӧмеде алты кiзi тоғынча – мин, ӱс водитель, грейдерист паза бухгалтер. Пӱӱнгi кӱнге пiс прай тракторларны паза машиналарны Таштыптағы автоколоннаа нандыра пирiбiскебiс, ол чурт-коммунальнай хоных сурығларын чапчаң пӧгерге полызар.
Пiстiң автотранспорт предприятиезі кізiлерні муниципальнай транспортнаң аалларҷа тартча. Республиканың пасха аймахтарын кӧрзе, Таштып аймаа ла муниципальнай маршруттарҷа чӧрче паза билеттернiң паазы хай-хай ниик. Алты маршрут понедельник – среда – пятницада чӧрче: Таштып – Мадыр, Таштып – Чоғархы Таштып, Таштып – Чоғархы Сир, Таштып – Харой, Таштып – Харағай, Таштып – Арбыт. Чӧрбин халчабыс кiчiг аалларҷа – Улуғ Пор, Аңзас, Харачул, Киров, Пиҷе хол. Ам сағынчабыс, адаан маршруттарҷа кӱннiң сай хайди чӧрерге тіп. Ааллардаң илеедӧк кiзi Таштыпсар кӱннiң сай тоғысха чӧрче, оларға, автобустар кӱннiң сай чӧрзе, ниик ле пiлдiрер. Ӱр ниместе пiске тӧрт наа «ГАЗель» пиргеннер, анзы уғаа ӧрiндiрче. Оларны ӧнетiн казначейскай кредиттер программазынҷа алғаннар, ол президент чахии хоостыра пылтыр прай хазнаҷа тоғын сыххан. Анда аралазарына автотранспорт ӧмезі автобустарда кирексiнiс парын кӧзiтчең пічіктерні чыған. Ахча аларына Хакасияның транспорт министерствозы чахсы хабасхан. Пирiлген 15,5 миллион салковайны аймах устағ-пастаа тӧлебес, аны республика правительствозы кӧместең чаап одырар.
Пу «ГАЗельлер» – уғаа чахсы сыйых, пiстiң иргiлен парған «ПАЗиктерiбiс» оодыларға ла маңнанмаҷаңнар паза салонда хысхызын сӧрӧн пiлдiрҷең. Наа «ГАЗельлерде» чылығ, кӧп бензин «чiбинчелер», хайдағ даа соохтарда тоғындырылчалар. Iзенчем, муниципальнай маршруттарҷа чӧрчеткен чон нааҷыластарны хайраллир. Ӱр ниместең наа автобустар чӧр сыхханнар.
– Виктор Николаевич, Сiрер постарыңның тоғызыңардаңар ниме сағынчазар?
– Устағҷы поларға оой нимес, кiзiлернең чоох алызып аларға пiлерге кирек, хайда-да хызааннабызарға. Чазырбин чоохтаза, хайдағ-да туста тоғыстаң парыбызарым килчеткен. Че амғы туста пiлдiстiг – прай сурығларның узы-пазына сығарға чарир, пӧк полбас сидiксiнiстер чоғыл.
Кӱскӱзiн пiс хысхаҷах тусха илееде тоғыс идерге маңнанғабыс. Августта республика бюджедiнең 11,6 миллион салковай килген, ол ахчаа пiс ӧдiстернi чабысхабыс паза пӱдiрiглерге, тыхтағларға позытхабыс. Кӧп ахча хысхаа тимненеріне парыбысхан. Таштып аймаа устағ-пастаанаң хада чӧптiг тоғын парчабыс, улуғ ахча аның хоостыра килчетпес пе. Iдӧк пічіктернең хабас пирчелер, «ГАЗельлер» алып алар алында пiске экономика пӧлии специализi Наталья Михайловна Чебокчинова кӧп полысхан, iдӧк Хакасияның транспорт паза пӱдіріг министерстволарының тоғынҷылары.
Пирiлген ахчаа ниме идiбiскебiс? Таштыптағы ікі номер школаның суғ башнязын паза хырын алыстырыбысхабыс, Октябрьскай орамадағы iкi хадыллығ тураны чылытчатхан иргi котельнай орнына нааны турғызыбысхабыс. Таштып аймааның имнег туразы котельнайының хырын алыстырғабыс паза даа пасха тоғыстар толдырғабыс.
Прай нименi адап полбассың, че пiлдiстiг ползын тiп чоохтапчам: ахча пiске август айда ла читкен, анаң аукцион садығларын иртiбiзерге кирек, аның соонаң на хыймыраныс пар сыхча. Аннаңар тың маңзыраабыс, кӱскӱзiне прай ниме идiбiзерге, ол хысхаа тимненерiне кiрчеткен пӱдiрiглер полған. Пiске чурт-коммунальнай хоных паза пӱдiрiг устанызы чахсы хабасхан, андағ сурығларҷа хададаң хада ла тоғынчабыс.
– Хайди мин пiлчем, Сiрернi тоғысха аймах пазы Николай Чебодаев алған. Хайди Сiрер аннаң хада танызып алғазар?
– Пiс аннаң хада ол Асхыс аймаандағы Хамыстығ аал чӧбi пазы полчатханда танызып алғабыс. Мин чир-чайаан арачылаҷаң сурығларнаң айғасчатхам, андада Асхыс аймаанда хара тас аныпчатхан разрез азыбызарға хынғаннар. Пiс Николай Васильевичнең паза пасха ӧткiннернең тоғыр полыбысхабыс. Разрез хыриндағы чирлерде Пуланнығ кӧл аалда минiң аға-ууҷам чуртаан, андох оларны чыып салғабыс.
– Пос тусты хайди иртiрчезер?
– Саналығ чыларға хынчам, тынағ кӱннерде сӧбiренең город хыриндағы чыл чӧрҷең трассаларда тынанчабыс. Мындаа Нымырттығ холда пол килгебiс. «Шерегеш» саналығ чылҷаң курорт минің кӧңніме иң тың кiрген, ол Кемеров облазының Таштагольскай аймаанда орныхча. Iдӧк аңнирға хынчам.
– Хада тоғынчатханнарыңа ниме алғап пирерҷiксер?
– Iстенҷең орыннарың чахсыланзын, чал ахчазы турыстыра тӧлелзін, сӧбiреде прай ниме чахсы ползын.
Сом авторни
Автор :
Чоохтасхан Тарина Бутонаева
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде