Ыстырған чонның пӱӱнгi амыр чуртазы
01.02.2024
Хабарлар
Ольга Ефимова (сол саринда пастағызы турча) немецтернiң национальнай костюмын кизiп, чазан салған
Хакасия – прайзыбыстың ибi. Хакас чирiнде чуртапчатхан немецтернiң халых организациялары 1989 – 1990 чылларда тӧстелгеннер
Пӱӱн андағ пис пiрiгiс тоғынча. Оларның пiрсi – Генрих Батцтың адынаң немец культуразы кiнi. Пу регионның халых организациязынаң, директор полып, 2022 чылдаң Ольга Ефимова устапча. Ол орындағы немецтернiң культуразынаңар, кибiрлерiнеңер чоохтаан.
– Мин немец культуразы кiнiнзер, студент полчатхандох, чӧр турғам, – ол чооғын пiди пастаан. – Хакас хазна университедiнде пасха хан тiллерi факультедiнде ӱгренгем. Анаң, вузты тоосханда, кiнде немец тiлi ӱгретчiзi полып iстен сыххам. Iди 2003 чылдаң пiстiң организацияның ӧткiн араласчызы полчам. Iдӧк анда аймах-пасха этнокультурнай мастер-класстар иртiргем, кӧзiдiмге, Россиядағы немецтернiң ас-тамаан тимнирiнде. Пу кiнде мин халых тоғызын толдырчам. Ӧӧн тоғызым Хакас хазна университедiнде полған. «Тӧремiл педагогика ӱгредиинiң институды директорының наукаҷа орынҷызы полып, 2023 чылның декабрьына теере iстенгем. Анда ам даа преподаватель полчам, педагогикаҷа пiлiстер пирчем. Позырахтарда немец тiлiне культура кiнiнде ӱгретчем, анда минiң группамзар 18 кiзi ӱгренерге чӧрче.
Ам, пӧлiктегi ӧӧн эксперт полып, «Россиядағы олған-саарбах кiнi» федеральнай хазна бюджет учреждениезiнде тоғынчам. Позым – орыспын. Че родымда немецтернiң ханы парох. Университет соонаң Германияда пiр чыл стажировка ирткем. Гёте институттың стипендиязына ӱс хати турысхам.
Пастап халых организациязы «Видергебурт» адалған (орыс тiлiне «возрождение» тiлбестелче). Ол 1989-1990 чылларда тӧстелген. Андада аның ӧӧн пӧгiнi полған: Россияда чуртапчатхан немецтер ӧбекелер чир-суунзар матап кӧс сыхханда, оларға кирек пiчiктернi тимнирге полызарға. Че соонаң ол чон пасха хан чирiнзер iди тың кӧспинiбiскен, хайзы-да орындох халарға чаратхан. Олар Россияны хаҷаннаң сығара Ада чир-сууна санапчалар нооза. Аннаңар пiстiң организацияның пӧгiнi дее алыс парған, амды ӧӧн тоғыс Россиядағы немецтернiң кибiрлерiн, культуразын паза тiлiн хайраллирынҷа апарылча. Амғы туста Германиядағы немецтернiң кибiрлерi дее, тiлi дее алыс парған. Че пiстiң хазнада ааллардағы немецтернiң диалекттерi хайраллал халған.
Халых пiрiгiзiнең, кнес полып, 1994 чылдаң Владимир Граф устаан. Соонаң Генрих Батцтың адынаң немец культуразы кiнi адал сыхханда, директор полған. Ол анда 2022 чылның апрельiне теере iстенген, республика культуразының тилiзiне улуғ хозым иткен. Владимир Викторович – Хакасия искусстволарының саблығ деятельi. Ағбандағы музыка училищезiнде чиит улусты ӱгреткен, соонаң – ХГУ-ның музыка колледжiнде. Iдӧк М.Шрамконың адынаң орыс чон хорының оркестр ӧмезiнең устаан. Анаң В.Г.Чаптыковтың адынаң Хакас филармониязында iстенген. Хакас чирiнде немец культуразы кӱннерiн иртiрчеткен ӱчӱн, ол ФРГ хазнаның ӧӧн консулының Аарластығ паза алғыстас пiчiктерiнең таныхтатхан. Пылтыр ах чарыхтаң парыбысхан.
Россияда немецтер нинҷе-нинҷе чӱс чыл чуртап парирлар. Олар хан ӱлгӱзi тузындох кӧс килгеннер. Аннаңар олар постарын Россиядағы немецтер тiп аданчалар. Че ирткен чӱс чылдағы репрессиялар тузында пу чонға уғаа хатығ чуххан. Оларның автономиязы чох идiлгенде, немецтер Поволжье чирiнең Казахстанзар паза Сибирьзер ыстырыбысханнар. Депортация тузында Хакасиязар даа ызылғаннар. Орындағы чон iди хыйыхтатханнарны чылығ удурлаан, наа чирде чурт салынарға полыс турған. Амғы туста Хакасияда кӧп немец чуртапчатхан аал-городтар ам даа пар. Кӧзiдiмге, Бородино (Боград аймаа), Пирiкчул (Асхыс аймаа), Пии ааллар, Ағбан, Харатас паза Саяногорск городтар. Хакас чирiнде ӧӧнiнде Саратов облазынаң кӧзiрiлген немецтер чуртапчаттырлар.
Ағбанда орныхчатхан немец культуразы кiнi 2010 чылларда паза «Видергебурт» адалбиныбысхан, Генрих Батцтың ады пирiл парған. «Видергебурт» тiп, республикада ӱс кiн (Ағбанда, Саяногорскта, Бородино аалда) паза Минсуғдағы кiн адалғаннар. Ағбандағызының адын алыстырарға чаратханнар.
– Генрих Батцтың ады пiстiң кiнге тиктең не пирiлбеен. Ол – писатель, хоосчы, Хакасияа кӧп хозым иткен кiзi. Ол пiстiң кiнзер кил парҷаң, книгаларынаң таныстырҷаң. Репрессияа хабылған чонының сидiк чуртас чолын позы тобырған, Алтай аймаандағы Очыр аалда 1967 чылдаң чуртаан, – чоохтаан ол.
Пу кӱнде чон ӧӧнiнде орыстап чоох алысча. Итсе-де, улуғ тӧл тӧреен тiлiн пiлче. Ольга Евгеньевна кiнде, устағҷы полып, iдӧк «Синьорлар клубы» кружок иртiрче, хайзында улуғ частығлар айғасчалар. Ӧмезер саңай ла ууҷалар чӧрчеттiр. Олар – пасха-пасха диалекттернең чоохтасчатхан улус. Диалекттерi Саратов облазының ноо чардығында чуртаанынаң пик палғалыстығ. Кӧзiдiмге, ӱстӱне унах тооладылған пирогты «ривелькухэн» тiпчелер, пасха диалектте «кривель» адапчалар. Иң не улуғ частығ ууҷа – 81 частығ. Пiр ууҷа полған на позырахта Пирiкчул аалдаң Ағбанзар кил парча.
– Кiнде улуғ тоғыс тӧрт кӧстегҷе апарылча: тiл сурии, этнокультура, социальнай паза чииттернең тоғыстар. Тiлнi ӱгренчеткеннер тӧрт группаа пӧлiлчелер – школаа чӧргелек олғаннар (ӱс ӧме), ӱгренҷiлер (ӱс ӧме) паза улуғлар (пiр ӧме). «Кӱмӱс частығларның» iкiнҷi ӧмезiн тӧстирбiс.
Этнокультура кӧстегҷе тоғынчатхан клубтар санында Ағбандағы «Забава» теелбек клубы пар. Анда 13 часха читкелек олғаннарны теелбектернең айғастырча устағҷы, таланттығ хореограф Надежда Суркова. Ағбан пилтiрiндегi Солнечнай аалда «На крыльях мечты» театр клубы тоғынча, устағҷызы – Ольга Лопатина. Андағ клубтарда кибiрлернi ӱгренчелер, город пазы республика синiндегi мероприятиелерде аралазып, чайаачы устарын кӧзiтчелер. Iдӧк аймах ӱлӱкӱннер иртiрiлчелер, кӧзiдiмге, Кӧлееде (Вайнахтэн), Хызыл нымырха (Остэрн) паза Ӱртӱн тойы (Эритэданкфэст). Анда немецтернiң культуразынаң танызарға сағынчатхан ноо даа кiзее аралазарға чарир. Паза чон кибiрлерiне чарыдылған мероприятиелер полчалар. Кӧзiдiмге, сӧбiре тоғазығлары, шпрухтар тимнирiнҷе мастер-класстар. Шпрух – ол Худай книгазынаң алылған хыйға чоох. Чиит хыс андағ хыйға чоохты ах исте чiбекнең хоостаҷаң, анаң ол ӧзiмнер паза пасха даа ниме хоостап, сiлiглеҷең. Полған на сӧбiреде пос тимнеен шпрух полҷаң, ол кiзiнi чуртас тооза арачылапча тiп киртiнҷеңнер. Iдӧк ол кiчiг паланың орғаны хыринда алай хызыл пулуңаста хызылҷаң. Пурунғы готика немец шрифтiнең пазылған текст полҷаң. Аны чуртас тооза хайраллаҷаңнар паза ол тӧлдең тӧлге пирiлҷең. Аны тимнирi сӧбiре кибiрi полча.
Паза пiрее мастер-класста ибдегi иргi тудынҷаң-хабынҷаң нимелердеңер чоохтасчабыс. Ах хайах ӱсчең iдiстер, ирҷiк паза пасха даа нимелердеңер чапсых чоохтар полча. Пiрееде немец кухнязынаң таныстырчабыс. Палаларнаң рецептче чиистi тимнепчебiс.
Социальнай кӧстегҷе тоғынып, пiс чуға чуртапчатханнарға полысчабыс. Санаторий-курортта имненерiне путёвка пирiлче. Россиядағы немец чонның хумартхылас кӱнiне удур (ол 28 августта таныхталча) репрессияа хабылған кiзiлерге ас-тамах пирiп полысчалар. Оларға имнег аппарадын (тонометр, глюкометр) садыс пирчелер. Анзы чылда пiр ле хати идiлчеткен полызығ полча.
Пу кӱнде пiстiң кiнде тиксi 12 клуб тоғынча. Андағы 10 ӱгретчiнiң прайзына чал ахчазы тӧлелче. Хайзы-да iкi клубта тоғынарға маңнанча. Оларға чал ахчазы гранттар пастыра тӧлелче. Гранттар немец культуразының чоннар аразындағы пiрiгiзiнең (Москвада орныхча) пирiлче, – теен устағҷы.
Кӧлееде паза Хызыл нымырха хайди даа сӧбiренең таныхталча. Немец чоны Кӧлееденi 24 декабрьдаң ӱлӱкӱннеп пастапча, анаң 25 паза 26 декабрьда пайрамналча. Оларның кибiрiнең, сыйыхтар Кӧлеедеде сыйлалча. Прай сӧбiренең стол кистiнде одырып таныхтапчалар. Ағбанда олар, аны ӱлӱкӱннирде, пастап лютеранскай пiрiгiстiң тигiрибiнзер Худайға пазырарға пар килчелер, анаң ибде чыылысчалар. Лютеранскай пiрiгiсте мының алнында Германиядағы абыстар чонны Худайға пазыртчаңнар, Худай сӧзi немец тiлiнең хығырылҷаң осхас. Киртiнiзi хоостыра олар католиктер полчалар.
Кӧлееде чағдап одырза, аны ноябрьның халғанҷы кӱннерiнде 24 декабрьға теере сахталчатхан тус «адвентсайт» адалча. Ол – тӧрт позырах изере сахталчатхан тус. Пастағы позырах – пастағы адвент. Андада пiр свечi тамызылча. Iкiнҷi адвентте iкi свечi тамысчалар. Ӱзiнҷiзiнде – ӱс свечi. Тӧртiнҷiзiнде прай тӧрт свечi кӧйдiрiлзе, Кӧлееде пасталыбысхан тiп саналча. Полған на адвентте, тигiрибзер чӧр килiп, иирде ибде пайрамнығ стол салылча.
Хакасияда чуртапчатхан немецтернiң саны, олар мыннаң матап кӧс сыхханда, пiлдiрте хызырылған, че олар олох ла ӱзiнҷi орында халғаннар. Чон 2020 чылда саналғанда, регионда пастағы орында орыстар саналчалар – 356325 кiзi (82,1 %), iкiнҷi орында – хакастар 55144 кiзi (12,7 %), ӱзiнҷiзiнде – немецтер 2831 чуртағҷы (0,7 %).
Немец чоны позының национальнай кип-азаан кис чӧрбинче. Итсе-де, ибде андағ костюмнары прайзының даа пар полтыр. Кiндегiлер алындағы чыл ипчiлернiң паза иреннернiң сiлiг костюмнарын тiктiрiп алғаннар. Ипчiнiң кип-азаа: узун юбка, узун нииннiг блузка, аның ӱстӱне жилет алай сарафан, фартук кизiп алчалар. Хызыҷахтарның кип-азаа кружевалығ даа тiгiлче. Пылтыр олар костюмнарына килiстiре национальнай cумкаҷахтар тiгерге чахыбысханнар, ол чiбекнең сiлiглелiп хоосталған. Ольга Евгеньевна Россиядағы немец чонның этнографиязын iстесчеткен Елена Артнаң танызып алтыр. Ол Саратов облазында чуртапча. Аның чооғынаң, ипчiлернiң юбкалары, кип-азаа чiбекнең хоосталбаҷаң осхас. Че cумканы чiбекнең хоостирға чарир.
2023 чылда кiн, республиканың национальнай паза территориальнай политика министерствозының грантын утып алып, социальнай программаларны чуртасха кирген. Проектi «Хакасия чоннарының нымахтарында – Россияның пiрге тудынызы» адалча. Аны хоостыра республикада тӧрт мероприятие иртiрiлген, пастап «тегiлек стол». Ол тоғазығ «Нымах – олғаннарны паза чииттернi патриотизмге паза чон культуразына ӱгретчең оңдай» темаҷа апарылған.
– Анаң пiс, iкiнҷi мероприятиезiн чуртасха кирiп, ӱс воргшоп (виртуальнай семинар) иртiрерге пӧгiнгебiс. Че салтарында андағ тӧрт семинар полған. Кӧлеткiлiг театрны хайди посха идiп аларын ӱгреткеннер. Нымах тимнелчетсе, аны сценада орта ӱннендiрерге паза актер узын тилiдерге киректелче. Андағ ӧнетiн мастер-классты Томсктағы театр студиязындағылар иртiргеннер. Воргшоптар ӧнетiн тӧстелген сайтсар сығарылғаннар. Кiннiң «ВКонтакте» сетьтегi страницазында 300 кiзi санға алылған, олар видеороликтi алай инсценировканы хайди тимнирдеңер кӧрiп алғаннар.
Анаң пiс регион мариин иртiргебiс. Хакасияда чуртапчатхан чоннарның нымахтары хоостыра хысха видео тимнебiзерге киректелген. Кӧклӧ театрындағы осхас ойыннаңар 58 хысхаҷах видео ыс пиргеннер. Ол чайаачы тоғыстар сайтта пар. Олар ӱс номинацияҷа паалалғаннар: кiчiглер, ӱгренҷiлер паза студенттер. Полған на номинацияда ӱс паза аннаң даа кӧп кiзi таныхталған.
Халғанҷы чардығында, «Нымахтар хороводы» концертте, чиңiсчiлернi сыйыхтаабыс. Улуғ видео тимнелген, хайзында марығдағы нымахтар кӧзiдiлген. Паза аймах-пасха диаспоралар ыр-сарыннар кӧглеп ӧрiндiргеннер. Грант хоостыра часхыда пасталған тоғызыбыс улуғ концертнең ноябрьда тоозылған, – таныхтаан устағҷы.
Пу культура кiнiнiң iзии ноо даа чуртағҷаа азых тудылча, анда прайзын ӧрчiлiг удурлапчалар. Немец чоны iдӧк республикадағы пасха национальностьтағыларның мероприятиелерiнде ӧткiн араласча. Оларның тiлiн паза культуразын ӱгренерге сағынчатханнарға ӱгредiг курстары тикке иртiрiлче.
Сом Ольга Ефимованың архивiнең
(Хакасияның правительствозы, национальнай паза территориальнай политика министерствозы полызиинаң сығарылған)
Автор :
Инора Боргоякова
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде