Волонтёрлардаңар закон тӱптестірілер
02.02.2024
Хабарлар
Ӧӧркі Чӧп. Хакасияның Ӧӧркі Чӧп президиумы теестегі чыылиин иртірген
Президиум чыылиин Хакасияның Ӧӧркі Чӧп кнезінің пастағы орынҷызы Пётр Воронин апарған. Анда ӱзӱрілген ӧӧн сурығларның пірсі – «Хакас Республикадағы пос кӧңнінең полысчаң (волонтёр полҷаң) сферадағы алынҷа хайызығларны оңдайлирынаңар» республика законынзар алызығлар кирчеткен закон проекті.
Закон проектін «Единая Россия» фракцияның депутаттары тимнееннер: Леонид Быков, Александр Пащенко паза Роман Челтыгмашев. Кирілчеткен алызығларҷа Хакасия правительствозының пос кӧңнінең полысчаң (волонтёр полҷаң) сферадағы полномочиелері алғыдылча. Чоох парча толдырығлығ ӱлгӱ органнарының, оларның холындағы хазна учреждениелерінің пос кӧңнінең полысчаң (волонтёр полҷаң) тоғыснаң айғасчатхан пірігіcтернең пірге тоғынар оңдайны чарадыға алардаңар. Іди ол сферадағы хайызығлар право саринаң тӱптестірілер тіп кӧрілче.
– Аннаң пасха, алызығлар хазна хабазиин алчатхан пірігістернің санын ӧскіреріне кӧстелгеннер, – таныхтаан Ӧӧркі Чӧптің чииттер политиказынҷа, туризмҷе, физическай культураҷа паза спортча комитедінің кнезі Александр Пащенко, закон проектінең таныстырып.
Іди хазна ӱлгӱзі органнарының пос кӧңнінең полысчаң (волонтёр полҷаң) тоғысты тимнееннерге ле нимес, че ідӧк прайзына, кем пос кӧңнінең полысчаң паза волонтёр полҷаң чӧрімнең айғасча, хабазарынҷа полномочиелері пар полар.
Таныхтирға кирек, пос кӧңнінең полысчаң (волонтёр полҷаң) чӧрім халғанҷы чылларда улуғ кирексіністе полча. Коронавирус тымозы тузында волонтёрлар имҷілерге чахсы полысханнар, амды ӧнетін чаа операциязында араласчатханнарға хабасчалар. Аннаңар Ӧӧркі Чӧп президиумы пу закон проектінең талас чох чарас салған. Закон проекті чағынғы сессияның кӱн суриинзар кирілер.
Мыннаң пасха президиумдағылар «Хакас Республиканың табығлардаңар, референдумнардаңар паза табығ комиссияларынаңар алынҷа законодательнай акттарынзар алызығлар кирердеңер» закон проектін ӱзӱрібіскеннер.
Закон проектінең Хакасияның Табығ комиссиязының кнес орынҷызы Ираида Чустеева таныстырған. Хайди ол чарытхан, кирілчеткен алызығларҷа республика законнары федеральнай законодательстваа килістіре тӱптестірілчелер. Тиксі республиканың пис законынзар тӱзедіглер кирілер.
Ідӧк Ӧӧркі Чӧп президиумы «Хакас Республикадағы муниципальнай службадаңар» республика законынзар алызығлар кирчеткен закон проектінең танысхан.
Ӧӧркі Чӧптің орындағы пос устанысча, халых пірігістерінҷе паза нациялар аразындағы хайызығларҷа комитедінің кнезі Роман Челтыгмашевтің искіриинең, алызығлар ікі сылтағнаң кирілчелер: пастағы сылтағ – республика законын федеральнай законодательстваа килістіре тӱптестірері, ікінҷізі – комитет иртірген мониторингтiң салтарларынҷа. Алызығларның пірcі – орындағы пос устаныс органнарына муниципальнай тоғынҷынаң служба контрактын азынада тохтадарынҷа хоза полномочиелер пирілчеткені. Іди «Россия Федерациязындағы муниципальнай службадаңар» федеральнай законзар алызығлар кирілгені хоостыра (закон 2024 чылның 12 мартынаң сығара кӱзіне кірер) тоғыс пирчеткеннер саринаң контракт тохтадылар:
– тоғынҷы муниципальнай службаа кірчеткен алай аны иртчеткен туста позынаңар тайма искіріглер (хайзылары ағаа пу должностьта тоғынарға чарадылчатханын киречілепче) пирген полза;
– андағ кирчілепчеткен искіріглерні саңай пирбеен полза.
Президиум пу закон проекттері Ӧӧркі Чӧпсер кирілген тіп санирға чарадығ алған. Олар чағынғы сессияның кӱн суриинзар ідӧк кирілер тіп кӧрілче.
Сом Ӧӧркі Чӧп сайтынаң
Автор :
Альберт Толмашов
| Пн | Вт | Ср | Чт | Пт | Сб | Вс |
| 27 | 28 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
