Ізенген тағда киик полбинча
02.02.2024
Хабарлар
Ойын хыызында парча
Спорт. 31 январьда «Саяны» команда «Мурман» хоккей ӧмезінең тоғасхан. Пу пістіңнернің 18-ҷі ойыны
Россия чемпионадының ікінҷі хурчааның матчтары хынығ иртчелер. Ол таңнастығ ойыннарға пай. 18 январьда Хабаровсктағы «СКА-Нефтяник» клуб «Кузбасс» ӧмее 2:10 саннаң утыр салған. Сах андох тылаас тараан: «Чемпион унада саптырыбысты!» Ікі неделя пазынаң, тізең, утырыс пілбинчеткен кемеровтағылар «Водник» командаа 4:6 саннаң чиңдірібіскеннер. Амды ікі хоккей ӧмезінің 51-ер сан. Олар тиңнең тиңе парчалар. Алында специалисттер «Кузбасс» 2023/2024 чыллар сезонының чемпионы хайди даа полар тіп ухаанҷылааннар. Че ойын тузында кирек сағыбаан оңдайнаң парыбысча. Аның ӱчӱн кізілер меспектіг хоккейге хынчалар.
«Саяны» командадаңар чоохтаза, 31 январьда хоккеисттерібіс «Мурман» ӧменең ойнааннар. Тоғазығ Ағбанда ирткен. Мурмансктағы клуб амғы сезонда кӧрігҷілерін ӧріндірче. Команда, 11 январьда «Енисейні» 3:1 саннаң утып, прайзын ӱрӱктірген. Пістіңнер «Мурманға» утырғаннарох. 13 декабрьда ойын 0:7 саннаң тоозылған. Амды оолларыбыс хайди ойнабызарлар ни? Ибде стенелер дее полысча тидірлер. «Саяныға» оң полар тіп ізенерге халча.
Чарғыҷы cығырғандох, ікі ӧменің хоккеисттері пуста ӧткін хайын сыхханнар. Чиңіс кирек. Кӧрігҷілер хоккеисттерге хысхырыстарнаң полысчалар. 7-ҷі минутада «Саянының» хаалхазынзар меспек учухча. Сан – 0:1. Хайтпас. «Саяны» узы-пазына сығып алар. Команда матчтарның илеедезін іди пастапча. Че 22-ҷі минутазында «ыырҷы» пазох голны кире сабысты. 0:2 саннаң утырчабыс. Пістіңнер ойнирға сағынчалар ба? Халғанҷы матч 18 январьда ирткен. Андада хоккеисттерібіс «Старт» ӧменең тоғасханнар. Ікі неделя аразына кӱс алынып аларға чарир. Алай, иртіре тынанып, пос салыныбысханнар ба? «Саянының» хомай ойынына тренерлер дее ӱрӱккеннер. Ікінҷі гол соонда команда тайм-аут алған. Анзы полысхан. Хоккеисттерібіс «Мурманға» сала ла гол кире сабыспааннар. Кирек киліспеді. Хакасияның командазы пазох атакаа парча. 28-ҷі минутада Руслан Гавричков арғызы Виталий Шнайдернің полызиинаң гол кирібіскен. Сан – 1:2. «Ағырчатхан» улустың ӧрінізі пу чир нимес.
Сизінгенде, «Саяныға» ікінҷі тайм сидік иртче. Хоккеисттерібіс матчтың пастағы чардығында прай кӧңнін салып ойнабыссалар, ікінҷі таймға кӱстері читпинче. 31 январьда пазох андағ кирек пол парған. 50-ҷі минутада «ыырҷы» Хакасиядағы ӧменің хаалхазынзар ӱзінҷі меспекті кире сабысхан. Оолларыбыс кӱстенгеннер, че «Мурман» клубты тохтадарға сидік полған, неке. Аннаңар 72-ҷі минутада сан 1:4 полған. «Саяны» пос чазызында утырчатса, ачырғастығ. Салтарында матч 2:4 саннаң тоозылған. Анзы Олег Селивёрсткиннің чидии. Пасты Руслан Гавричков читірген. Халғанҷы спортсменні махтирға кирек. Ол полған на ойында командаа туза ағыларға харасча. Пасхазы іди кӱстенген полза, салтарлар даа ӧріндірерҷік.
Пір cаринаң, хайди хомзынмассың, «Саяны» Иркутсктағы «Байкал-Энергиянаң» морсымнығ ойнаан. Хоккеисттерібіс аалҷыларға пір дее маң пирбееннер. Олар кӧрігҷілерні устарынаң аптааннар. Чон андағ хоккей ӱчӱн матчтарға чӧрче. 11 январьда иркутсктағыларнаң ойнаан ӧме хайдар кірді?
«Саяны-2» чылны чорыхтарнаң пастаан. Ирткен айда чиит хоккеисттер ӱс команданаң тоғазарға маңнанғаннар. 22-23 январьда олар «Байкал-Энергия-2» ӧменең чиңіc ӱчӱн харбасханнар. Пастағы матч 1:11 саннаң тоозылған, ікінҷізі – 2:4. Аның соонда чииттер командазы Хабаровсксар чол тутхан. «Саяны-2» ӧме «СКА-Нефтяник-2» клубха унада саптырыбыстыр. Чир-суғҷыларыбыс 5:9, 1:13 саннарнаң утыр салғаннар. Пасхазынаң тиңнестірзе, «Востокнаң» ойыннар хомай нимес ирткеннер. 30 январьда матч 0:6 саннаң тоозылған, 31 январьда – 1:4 саннаң. Голларны Руслан Галеев, Даниил Богатченко, Александр Захваткин, Иван Гопп, Тимофей Ващук паза Лев Тимофеев кире сапханнар.
Сом «Саяны» клубти
Автор :
Майя Кильчичакова
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде