Театрның iкiнҷi тынызы
07.02.2024
Хабарлар
«Нымах» кӧклӧ театрының ӧмезі
Тура тойы. 3 февральда Л.Г.Устиновтың адынаң «Нымах» Хакас национальнай кӧклӧ театры тиксі тыхтағ тоғызы соонаң iзиин асты
Субботада нааҷылалған театрзар олған-узах толдыра чыылыс парған. Прайзы, удур-тӧдiр ӧрчiлiг чоохтазып, тың сууласчатханнар. Оларның аразында 2024 чылның таңмазы Дракон Питук нанҷызынаң хада пас чӧрчеткеннер. Іҷе-пабалар иркелерiн Драконнаң паза Питукнаң хада сомға суурчатханнар. Чарых фойеде суум-саам Наа чыл ӱлӱкӱнiндегі ле чiли турған. Чыылысхан чон хайдағ-да хайхас сағыпчатхан осхас пiлдiрген.
12.00 часта кӧрiгҷiлер залының iзии азылған. Прайзын андар хығырғаннар. Оолахтар паза хызыҷахтар, мында хайдағ сiлiг пол парған тiп ала, зал иркiнiн алтааннар. Хайди хайхабас! Анда сцена, кӧзеңелер, стене-потолок, чарытхы прай наа нооза, одырҷаң сiреелер нымзах.
Чылығ залда, орыннарын таап, олғаннар истiг ле одыр салғаннар. Анаң оларға, Соох апсахты хығырчатхан чiли, ӱc хати «актёрлар!» хысхырарға тееннер. Iди хысхырған соонаң сценазар «Нымах» театрның артисттерi сых килгеннер.
Таныхтирға кирек, театрдағы тыхтағлар iкi чылға чағын парғаннар. Ол арада артисттер тоғыс чох одырбааннар, олар 12 наа спектакль, тимнеп, кӧзiткеннер, «Чир Чайаан» фестивальны иртiргеннер, гастрольларнаң Хызылчарзар, Москвазар, Находказар, Томсксар, Оренбургсар, Донецк Чон Республиказынзар, Херсон паза Запорожье областьтарынзар чӧргеннер. Iдӧк ӧрiнiстiг хабар – «Нымах» театрзар ӱс наа чиит артист килген.
Кiчiг кӧрiгҷiлернi мындағ ӧрiнiстiг кӱннең алғыстирға сценазар сыххан театрның устағҷызы Игорь Окольников:
– Пiс пу кӱннi чидiкпин сахтаабыс. Пӱӱн сынап ӱлӱкӱн. Тиксi тыхтағ тоғызы соонаң пу залзар пастағы кӧрiгҷiлер кiрдiлер. Ам артисттер сiрерге «Тим Талер, или Проданный смех» ойынны кӧзiдерлер. Спектакльның тархыны оой нимес. Пiс аны 2022 чылда тимге сығарғабыс. Репетициялар аар парғаннар. Андада пӱдiрiгҷiлернiң тоғызы хыызында парчатхан. Олар анда-мында тохлатханнар, ниме-де ӱтееннер. Залға тозын толдыра полған. Андағ оңдайда, сырайларын масканаң чаап, артисттер наа нымах тимнееннер.
Игорь Ярославич алынҷа алғыс сӧcтерiн Хакасия правительствозына паза регион пазы Валентин Коноваловха читiрген. Проектте хай пiрее оох-теек читпестер сығысхлап килҷеңнер, че олар кӧклӧ театрының тоғызына хайди даа киректелчелер. Аннаңар театрның устағҷызы правительствозар айланҷаң. Анда ағаа удур парғаннар, айланызын чапчаң толдырғаннар.
Хакасия пазы Валентин Коновалов тура тойында iдӧк араласхан. Ол кiчiг кӧрiгҷiлернi паза iҷе-пабаларны мындағ ӧрiнiстiг кӱннең алғыстаан.
– «Нымах» театр пӧзiк чидiглерге читчеткенi фойедегi стендте чахсы кӧрiнче. Анда чоннар аразындағы паза Россия синiндегi пӧзiк сыйыхтар турғызыл парған.
Театр «Культура» нацпроект полызиинаң нааҷылалған. Ол пiстiң хазнада Россия президентi Владимир Путиннiң чахиинаң ӧткiн тоғынча. Тиксі тыхтаға 250 миллион салковайҷа позыдылған. Президенттiң хабазии полбаан полза, республикаа мындағ улуғ тоғысты толдырарға оой полбасчых, аннаңар Россияның правительствозына улуғ алғызыбыс читiрчебiс.
Iдӧк Хакасияның культура министерствозына, театрның устағ-пастаана, прай труппаа улуғ алғызым читiрчем. Ӧмее пӧзiк чидiглер алғапчам, сағынған сағыстарың толзын, чайаачыларың улам тилiзiн! – чоох тутхан Хакасия пазы В.О.Коновалов.
Тура тойының пайрамнығ чардығы ирт парғанда, олғаннар «Тим Талер, или Проданный смех» (12+) ойынны кӧргеннер. Iди 1970 чылларда пӱдiрiлген тураа iкiнҷi тыныс пирілген. «Нымах» кӧклӧ театры Хакасияның поғдархазы полча.
Сом Хакасия пазы пресс-службазыни
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
