Ызыхта – наа спорт площадказы
09.02.2024
Хабарлар
Спорт площадказы – посёлок чуртағҷыларына танығлығ сыйых
Танығлығ кирек. Алтай аймааның Ызых посёлогында кӧп кӧстеглiг спорт площадказы пайрамни азылған
Волейбол, баскетбол, хоккей ойнирына кӧрiлген спорт площадказы республика ахчазына пӱдiрiлген. Пу кӧстеге 6 млн салковай позыдылған, аймах позының ахчазын хосханох. Пӱдiрiг ирткен чылның май айында пасталған, че подрядчик хай пiрее тоғыстарны тузында паза кирек синде толдырбааннаңар, аны кӧрiлген тустаң орай тоосханнар тiп чоохтапча Ызых поселок чӧбiнiң пазы Ирина Щепилова.
Сидiксiнiстерге тоғасхан ползалар даа, ноябрьда спорт площадказы тимде полған. Анда баскетбол корзиналары, волейбол сетказына стойкалар пар, чирге ӧнетiн резина тӧзелген. Коробкадаң пасха, чарытхы тартылған.
Спорт площадказы пайрамни азыларына Ызыхсар аалҷылар кил парғаннар. Олар – Хакасияның пазы Валентин Коновалов, физическай культура паза спорт министрi Сергей Кочан, Алтай аймаа пазы Ирина Войнова. Валентин Олегович мындағ объекттер хазна полызии пирiлчеткенi, республиканың нацпроекттерінде араласханы, iдӧк позының программалары чуртасха кирiлчеткенi сылтаанда тимнелчелер тiп таныхтаан. «Кiчiг паза улуғ спортсменнерге спорт площадказынаң ӧткiн тузаланарға алғапчам, ол тикке ле турбазын. Аны пӱдiрерiне республика ахча позытхан даа полза, пӱӱн пiс хуруғ холлығ килбеске чаратхабыс. Олғаннарға шайбалар паза клюшкалар сыйлапчабыс», – чоохтаан ол.
Амғы туста коробкада пус. Палалар даа, улуғлар даа пеер конькилiг чыларға хынып чӧрчелер. Оларнаң чуртағҷыларнаң тоғынарынҷа инструктор айғасча. Iдӧк ӱгренҷiлерге кружоктарны школада физкультура уроктарын апарчатхан ӱгретчi иртiрче. Пастап прай занятиелер иргi хоккей коробказында иртчеңнер. Хысхы туста хоккей ойнаҷаңнар, чылығлар читсе, волейбол, баскетбол паза футбол. Че, Ирина Щепилованың чооғынаң, аны тӧремiл тыхтап турарға киректелген. Аннаңар поселок чӧбi наа спорт объектiн пӱдiр пирер сурыныснаң физкультура паза спорт министрiнзер айланарға чарадығ алған. Амды ол сурығ пӧгiл парған. Алтай аймааның паза Ызых поселоктың пастары республика ӱлгӱлерiне алғыстас сӧстерiн читiргеннер. Чуртағҷылардаң, тiзең, спорт площадказын хайраллирға сурынғаннар. Ирина Щепилова, Сергей Кочанзар айланып, амды пiске футбол ачығы паза чӱгӱр чӧрҷең чолыҷах кирек тiп хормачыланған.
– Мындағ объекттер уғаа кирек, – ӱлескен сағыстарынаң посёлок чуртағҷызы Людмила Назарова. – Олар олғаннарға, чииттерге пӱдiрiлчелер нооза. Спортнаң айғазарынаң оларның пик хазыхтығ полары палғалыстығ. Пу площадканың тимде поларын прайзы тың сахтаабыс. Пiс, улуғлар, олғаннардаң даа артых сағыссыраан поларбыс. Cағынчам, олғаннар мында ӧткiн ойнирлар. Прай даа чуртағҷыларға спорт площадказы азылғаны уғаа танығлығ кирек. Ирина Щепилова орта таныхтаан – iзенчебiс, пу пастағы ла хаалағлар. Площадка орныхчатхан ачыхты «Ызых» разрез, сай тартып, тимнеен. Пӧгiннер улуғ полған. Че хазнада алызығлар полып, прай тоғыстар тохтадылғаннар.
Людмила Назарова ырах ниместе чуртапча, аннаңар прай тоғыстар аның хараа алнында иртiрiлгеннер. Позы ол Ызыхта тӧреен-ӧскен. Амғы туста, тынағда даа полза, Ызыхтағы ТОС-тың кнезi, почта пӧлиинiң устағҷызы полча.
– Посёлок тилирге кирек. Чылдаң чылға ол чахсыланып одырча, пiс анзын прайзы кӧрчебiс. Кӧзiдiмге, олған площадкалары турғызылғаннар. Мин мында 21 чыл чуртап парирбын, чааҷы службазынаң отставкаа парыбысхам. Спорт тилiпчеткенi ӧрiндiрче. Олғаннар, чииттер, аннаң айғассалар, хомай нимее сабылбастар. Iзенербiс, республиканың, аймахтың устағ-пастаа толдыра спорт комплексiн пӱдiрерге полыс пирер, – хосхан поселок чуртағҷызы Анатолий Заика.
Сом Дмитрий Сунчугашевти
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
