Чон артисттерiнің саны хозылды
14.02.2024
Хабарлар
«Ӱлгер» паза «Кӱн сузы» ансамбльлар сіліг ыр-теелбек сыйлапчалар
Хакас филармониязына – 35 чыл. 9 февральда В.Г.Чаптыковтың адынаң Хакас филармониязы пайрамнығ чылын драма театрында улуғ концертнең таныхтаан
Иирде, 18.00 час тузында, драма театрынзар чон чыылыс сыххан. Частаныбысхан чуртағҷылар илееде килгенi пiлдiрген. Олар 35 чыл мының алнында филармония азылғанының киречiлерi, неке, аннаңар пайрамнығ иирге хайди даа килерге чаратхан поларлар.
Кӧрiгҷiлер залында пос орын чоғыл. Хай пiреезi концерттi турып таа кӧрерге тимде полған. Прайзы чыылыс парғанда, Хакасия пазы Валентин Коновалов, чон алнынзар сығып, чоох тутхан.
– Хакас Республиканың филармониязының ӧмезiн прай чӱреемнең пайрамнаң алғыстапчам. 35 чыл мының алнында филармония пiстiң республиканың кӧг чуртазында наа чардых асхан. Пӱӱн улуғ паза ынағ ӧме чуртағҷыларны аймах репертуарынаң ӧрiндiрче: классика, фольклор, джаз, хакас сарыннар. Сiрер Россияның паза тиксi тилекейдегi илбек кӧгҷiлернең хада-пiрге тоғынчазар. Пiстiң филармония гастрольларнаң кӧп чӧрче. Пылтыр артисттер хазнаның наа регионнарында пол килгеннер. Мин ӱр ниместе андартын айланғам. Наа регионнарда пiстiң филармониядаңар уғаа чылығ ӱндезiглер пирчелер. Улам поғдархастығ, пу кӱннерде «Каданс» хор федеральнай телеканал пастыра Россияа саблан парған. «Ну-ка, все вместе!» кӧг шоузында араласхан артисттерiбiстi тиксi хазна паза Хакасия кӧрген.
Iдӧк алғыстапчам филармонияның ветераннарын. Олар чахсы кибiрлер артыс салғаннар. Ӧме республиканы хазнаның паза хырығ озариндағы сценаларда 35 чыл изере турыстығ кӧзiтче. Сiрер пiстi кӧг культуразынаң тирең таныстырчазар, тоғыстарыңны оой, сiлiг паза полған на кӧрiгҷее пiлдiстiг иде толдырчазар. Прайзын пайрамнаң! – алғыстаан республика пазы.
Валентин Коновалов филармонияның хай пiрее тоғынҷыларына пӧзiк аттар пирген паза сыйыхтар читiрген. Iди хакас сарыннары искусствозын хайраллирында, саблирында паза тилiдерiнде улуғ хозым ағылчатхан ӱчӱн «Хакасияның чон артизi» аарластығ аттар филармонияның артизi паза ырҷызы Евгений Улугбашевке паза «Ӱлгер» ансамбльның артизi Леонид Ивандаевке пирiлген. Симфоническай оркестрнiң директоры Марина Шутова пӧзiк профессионализмi, аймах чайаачы проекттернi чуртасха кирчеткен паза филармонияның тилiзiнде ӧткiн араласчатхан ӱчӱн «Хакасия культуразының саблығ тоғынҷызы» пӧзiк атнаң таныхтатхан. Iдӧк Валентин Олегович «Ӱлгер» паза «Кӱн сузы» ансамбльларның артисттерi Радж Мандаржапха паза Игорь Шалгиновха Хакас Республиканың Аарластығ пiчiктерiн читiрген.
Регион устағҷызы Валентин Коновалов «Каданс» хорның устағҷызы Марина Штаркты хор искусствозын хайраллапчатхан, саблапчатхан паза тилiтчеткен ӱчӱн алғыстастығ пiчiкнең таныхтаан. Кӧрiгҷiлер Марина Геннадьевнаны сценадаң, iзiг айа сабызын читiрiп, позыдарға хынмааннар. Тың морсымнығ тудынған аның «Каданс» хоры «Ну-ка, все вместе!» телешоуда.
Хакасияның Ӧӧркi Чӧбi кнезiнiң пастағы орынҷызы, хакас чонның Улуғлар чӧбiнiң кнезi Пётр Воронин iдӧк алғыстастығ сӧстер читiрерге сценазар сыххан:
– Хакас кӧг культуразының тархыны паза аның тилiзi 1989 чылның январь айынаң пасталча. Андада Хакас облазының филармониязы тӧстелген. Аннаң сығара пiстiң артисттернiң ыр-кӧглерiн Россияның тастында даа ис сыхханнар. Владимир Чаптыков, Клара Сунчугашева, Владимир Терешков, Зинаида Аршанова, Евгений Улугбашев, Мария Янгулова, Екатерина Кыштымова паза пасха кӧп ырҷы республика культуразының тархынында саңайға халарлар. Симфоническай оркестрнең тың поғдархапчабыс. Ол тилекейдегi саблығ кӧгҷiлернең паза ырҷыларнаң пик палғалыс тутча, хада-пiрге тоғынча, чир ӱстӱнҷе гастрольларнаң чӧрiп, республикабысты саблапча. Оркестрнең Вячеслав Инкижеков 25 чыл устапча. Аның сыдамах хылии ӱчӱн пу хайхастығ ӧме тӧстелген. «Ӱлгер» ансамбль филармониянаң тиң тоғынып пастаан. Аның ӧӧн пӧгiнi – хакас чонның сарыннарын паза теелбектерiн хайраллиры паза тилiдерi. Пӱӱнгi кӱнде ансамбльнаң Хакасия искусствозының саблығ деятельi паза чон артизi Кучен Ай Чарых Сайын маңнаныстығ устап парча. Культура чуртазында «Ӱлгернең» хада «Кӱн сузы» паза «Хан сын» ансамбльлар тиңнең тиңе хаалап парчалар. Iдӧк пiс Артур Марлужоковтың, Ольга Васильеваның, Олег Гриценконың, Мария Сиротенконың паза пасха даа улуғласнаң тузаланчатхан артисттернiң чайаачызынаң чахсы таныспыс. Аарлығ артисттер, республика сiрернең поғдархапча. Хакасия кiчiг дее регион полза, че ол чайаачыларға пай.
Анаң Пётр Воронин филармонияның директоры Вячеслав Инкижековха паза артисттер Дмитрий Султрековха, Василий Боргояковха, Олег Гриценкаа Хакасияның Ӧӧркi Чӧбi-нiң алғыстас пiчiктерiн читiрген.
Хакасияның культура министрiнiң тоғызын толдырчатхан Светлана Окольникова филармонияның тоғынҷыларына, чылығ сӧстер читiрiп, пӧзiк чидiглер алғап, алғыстастығ пiчiктер читiргенӧк.
Хакасия пазы Валентин Коновалов Евгений Улугбашевті «Хакасияның чон артизі» пӧзік атнаң таныхтаан
Пайрамнығ иир iкi чардыхха чарылған. Пастағызында Россияның саблығ паза Хакасияның чон артизi Евгений Улугбашевтiң «Хан сын» ансамбльы кӧрiгҷiлерге кееркестiг сарыннар сыйлаан. Анаң Хакасияның чон артизi Кучен Ай Чарых Сайын устапчатхан «Ӱлгер» ансамбльның артисттерi «Кӧчег» паза «Ағын хустар» программалардаң алылған ырларны толдырғаннар. «Кӱн сузы» теелбек ансамбльының оол-хыстары «Ӱлгернiң» сарыннарын сiлiг теелбектернең чазааннар. Концерттiң iкiнҷi чардығында симфоническай оркестр пастыра Россияның паза Хакасияның саблығ артизi Зинаида Аршанова-Майнашева, Хакасияның чон артисттерi Мария Янгулова, Артур Марлужоков, Екатерина Кыштымова паза пасхазы опера ырлааннар.
Сом Хакас Республика филармониязыни
Автор :
Татьяна Тютюбеева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде