Ӱр cағаан чиңіс
14.02.2024
Хабарлар
Хоккеисттер меспекті пыласчалар
Меспектіг хоккей. 13 февральда «Саяны» команда Свердловск облазындағы «СКА-Уральский трубник» хоккей ӧмезінең тоғасхан
Ирткен ойынның ӧӧн тании барабан полған тізе, саба полбас, неке. Матч тооза аның «табызы» хоккеисттернің дее, кӧрігҷілернің дее кӧңнін кӧдірген. Хынчатхан команданың киректері уйан парчатса, симфония оркестрін дее хығыр килерзің. Пістің ооллар соон сӱрістіре ӱс командаа – «Ак-Барс Динамо», «Динамо» паза «Водник» – утыр салғаннар нооза.
13 февральда «Саяны» Первоуральсктағы «СКА-Уральский трубник» ӧменең тоғасхан. Пу команда илееде тус турнир таблицазының халғанҷы орнында парған. Че ӱр ниместе ирткен ойыннарда «СКА-Уральский трубник» пик хылиин кӧзітті. 6 февральда первоуральсктағылар «Мурманнаң» хада хайым (тиңни) ойнабысханнар. Сан – 5:5. Ирткен пятницада, тізең, олар Хазандағы «Ак-Барс Динамоны» 6:5 саннаң чиңіп алғаннар. Андада пілдістіг пол парған: тоғазығ тузында «Саяныға» хатығ чуғар.
Ойын ирткен кӱнде соохтар турған. Анзы «ағырчатхан» улусты хайди тохтат полар. Трибунада чон чахсы чыылысхан. Кізілер «Саянының» таңмазынаң чазалған шарфтарны мойыннарына ораан салып турчатханнар, команданың чаламазын ағыл килгеннер полғаннарох.
Хоккеисттер, пуссар сыххандох, ӧткін хайынғаннар. «СКА-Уральский трубник» ӧме «Саянының» ӧӧн «ыырҷызына» саналча. Пылтыр ноябрьда піcтіңнер, первоуральсктағыларны 4:1 саннаң утчадып, 4:5 cаннаң утыр салғаннар. Амды ойын хайди парар ни? Ӧс ал поларбыс па? Матчтың пизінҷі минутазында «Саяны» аалҷыларның хаалхазынзар меспекті кире сабысты. Сан – 1:0, піcтіңнер алнында. Кӧрігҷілернің чӱреенде ӧрініс паза поғдархас. Голның авторы – Руслан Гавричков, ағаа пасты Денис Петров читірген. Пу чидіг хоккеисттерібіске кӱс хосхан, таң. Олар, пір орында турбин, атакаа парлачалар. Че «ыырҷы» тӧдір пазынарға сағынминча. 34-ҷі минутада «Саянының» хаалхазынзар пастағы меспек кире учухча, 35-ҷі минутада – ікінҷі меспек. Сан – 1:2. Утырчабыс.
Оолларыбыс чідірінмееннер. Руслан Гавричков арғызы Виталий Шнайдернің хабазиинаң санны тиңнестірібісті. Че ӧрінізібіc ӱр полбады. «СКА-Уральский трубниктің» хоккеизі Артём Вшивков «Саянының» хаалхазынзар ӱзінҷі меспекті кире сабысхан. Валидоллығ матч! Ол тоозылғанҷа кізінің пазы прай хырал парар. Че 45-ҷі минутада сан 3:3 пол парған. Голны 12 метрдең Денис Соловьёв кире сабысхан. Ікінҷі таймда ікі ӧмее ойынны хатап пастирға килізер.
Матчтың ікінҷі чардығында спортсменнер кӧрігҷілерні майыхтыр салғаннар тирге чарир. Пуста чӱгӱр чӧрчелер, тузазы, тізең, чоғыл. «Саянының» ӱсче хати гол сабызар оңдайы полған. Пірсiнең дее тузалан полбааннар. Итсе, ойынға соох чил харығ полған. Ойынның ӱзінҷі чардығы тиктең ирт парғанда, кізілер чоохтас сыхханнар: «Саяны» хайым ойнабысса, чахсы поларҷых». Барабанның «табызы» ла тӧдір пазынмасха, посха киртінерге, чиңіс ӱчӱн харбазарға хығырған. Музыканың кӱзі илбек полтыр. 72-ҷі минутада сан 4:3 пол парған. Анзы Никита Терёхиннің чидии. Кӧрігҷілернің ӧрчіліг хысхырыстарын прай Ағбан искен, неке. Ӱс минута пазынаң пазох гол. Сан – 5:3. Меспекті ойын матыры Никита Терёхин кире сабысхан. Пасты читірген Денис Петров. Салтарында ойын 5:4 саннаң тоозылған. 90-ҷы минутада «СКА-Уральский трубниктің» хоза пір гол сабызар кӱзі читкен.
Тиксі алза, ікі команда чыылған чонға чахсы ойын кӧзіт пирген. Матч тооза харбазығ парған. Сизінгенде, «Саянынаң» «СКА-Уральский трубник» тиңни ойнапчаттырлар. Аннаңар оларның тоғазығлары тӧреміл хынығ иртчелер. Пӱӱнгі кӱнде «Саянының» 11 сан, «СКА-Уральский трубниктің» – 10 сан. Таңда 15 февральда оолларыбыс Ульяновсктағы «Волга» команданаң ойнирлар. Прайзын «ағырарға» хығырчабыс. Ізенчебіс, чиңіс тударға полысхан барабан пазох ӧтіг «табызынаң» чонның кӧңнін кӧдірер.
Сом «Саяны» клубти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
