Пірдеезі харығ полбинча
27.02.2024
Хабарлар
![Пірдеезі харығ полбинча Пірдеезі харығ полбинча](/upload/iblock/146/20vjxfa0deg5henjcqxp1zfsxjpchveb.jpg)
Табығлар-2024. Республиканың чуртағҷылары Россия президенті табығларында аралазардаңар сағыс-кӧрістерінең ӱлесчелер
Игорь ТАШТАНДИНОВ, Хакасияның Л.Р.Кызласовтың адынаң чир-суғ ӱгренҷең музейнің ученай хачызы:
![](/news/таштан-1057.jpg)
– Россия президенті алай Хакасия пазы табылчатса, ӱн пирерге хайди даа парчам. Полған на табығҷының позының кӧрізі, паалаа, киртінчеткен кізізі. Ол утып алза, ӧрініс паза хайдағ-да ізеніс поладыр.
Итсе, тоғыс хоостыра кӧр килзе, амғы туста даа киректер хомай ла нимес. Тиксі хазна синінде аймах нацпроекттер, фондтар тоғынчалар, гранттар тӧстел парғаннар. Позың на арғаастанма, хыймыран, кӧзідімнеріңні уламох чахсыландырарға харас. Пірдеезі харығ полбинча.
Пістің музейде экскурсоводтар тимнепчеткен пӧлік пар. Андар сурыныс пічіктері кӧп кірче. Кізiлер олаңай ла экскурсоводтар поларға сағынминчалар, постарының киректерінең айғазарға пӧгінчелер, ээзі чох танығлығ орыннарны алып аларға, анда туристтернi удурлап турарға, парыстанарға тимделер.
Амғы сидік туста Россияның чуртағҷылары уламох чағын пірікчелер, Украина чирінде ӧнетін чаа операциязында араласчатхан махачыларыбысха полызығ пирчелер, чиңicнең айланарға алғапчалар.
Пір ынағ сӧбіре чіли тудынчатханы хазнабысты тилітче паза тыытча. Сағам Чир-суубыс тилекейдегі иң кӱстіг, экономиказы сыбыра ӧсчеткен 10 хазна санына кiрче. Аннаңар табығларға хайди даа парарға, турыстығ кізі ӱчӱн ӱн пирерге кирек, прайзынзар iди тудынарға чӧпнең айланчам.
Николай КОТЮШЕВ, «Асхыр» хакас чииттернiң халых пірігізінің кнезi:
![](/news/DSCF6101.jpg)
– Кiчiг полғанымда, паба-iҷем минi табығларға сыбыра хада ал чӧрҷеңнер. Олар мағаа чаҷында таңма турғызарға чаратчаңнар. Мағаа ол уғаа поғдархастығ паза морсымнығ пiлдiрген. Аннаңар даа, неке, 18 час толдыр салғанымда, мин позым сыбыра табығларға чӧр сыххам. Амға теере аны пiр дее иртiрбеем. Хайди чонда тидiрлер, полған на кiзiнiң ӱнi улуғ кирексiнiсте. Аннаңар пасха даа чииттернi табығларда аралазарға хығырчам.
Халғанҷы чылларда хазна синiнде чиит улусха улуғ хайығ айландырыл сыхты, хабазығ программалары кӧп алыл парған. Чииттернi дее, сым одырбин, хазнаның таңдағызын пӱдiрерiнде ӧткiн аралазарға хығырчам. Улам амды, хаҷан ӱннi, ибдең сыхпин, «Хазна полызығлары» портал пастыра пирiбiзерге чарир.
Сомнар Альбина Чистогашевани паза интернеттең алылған
Автор :
Пазып алғаннар Анатолий Султреков, Оксана Сунчугашева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде