Сынында чон ӱлӱкӱні!
28.02.2024
Хабарлар
Аалҷыларны ізіг чейнең паза чааҷы кашазынаң сыйлааннар
Чӧрім. Ада чир-суубыс арачылағҷызы кӱнінде республиканың ипподромында, ӧнетін чаа операциязының араласчыларына хабазып, «Чон паза армия – пірге!» пайрамнығ мероприятие ирткен
Ипподромда пу чӧрімге аал хонии ярмарказы, ат паза адай чарызы, концерт чарыдылғаннар. Аалҷыларға ідӧк чааҷы кухнязы тоғынған. Тасхар соох таа полза, Ада чир-суубыс арачылағҷызы кӱнінде иртірілчеткен танығлығ кирекке кізі илееде чыылысхан. Оларның аразында палалығ сӧбірелер, пархаларынаң хада килген аға-ууҷалар, «Юнармияның» араласчылары полғаннар. «Чон паза армия – пірге!» пайрамнығ мероприятиені азар алнында, чыылысхан чон Россияның паза Хакасияның гимннерін азах узында тыңнаан.
Ӱлӱкӱн мероприятиезінде Хакасия пазы Валентин Коновалов, Ӧӧркі Чӧп кнезі Сергей Сокол паза Россия Федерациязының сенаторы – Россияның Федеральнай Чыылииның Федерация Чӧбіндегі Хакасия Правительствозының кізізі Олег Земцов араласханнар. Полғаны ла, чыылысхан чон алнында чоох тудып, оой нимес туста пірге тудынғаны ӧнетін чаа операциязының араласчыларына хайдағ кӱс пирчеткенін таныхтаан.
– Прайзын Ада чир-суубыс арачылағҷызы кӱнінең алғыстапчам. Пайрам полған на сӧбіреде таныхталча. Ол сынында чон ӱлӱкӱні, ол Чир-суубысха хынысты киречілепче. Хаҷаннаң чир-суубыс арачылағҷылары, посха айабин, сындырлығ тудынғаннар, махачы чааласханнар. Амды оларның санына ӧнетін чаа операциязының араласчылары хозылчалар. Мин прай ветераннарыбысты алынҷа алғыстирға сағынчам, хайзыларының сылтаанда піс читіре парарға киректелчеткенін паза андада ла чиңіс поларын оңарчабыс. Ідӧк кӱннің сай пос тоғызынаң тылны пиктепчеткеннерні паза фронттарда чиңісті чағыннатчатхан, пос хазиина паза чуртазына айабинчатхан чааҷыларны алғыстапчам. Пу оларның ӱлӱкӱні!
Арғыстар, прайзына хазых, часка паза пістің хазнаа пос чуртас алғапчам! Ӱлӱкӱннең! Ура!
Кӧрігҷілер ідӧк хысхырғаннар: «Ура!»
Анаң Сергей Соколға сӧс пирілген:
– Арғыстар, кӧп чӱс чыллар тархынында Россия хаҷан даа матырларынаң сабланған. Хазнаны, амыр чуртасты, ырысты, туған-чағыннарны арачылиры – ол полған на иреннің хайди даа толдырҷаң ызых кирее. Республикадаң ӧнетін чаа операциязында служба иртерге парған паза Чир-суу алнындағы ӧдізін нандырығлығ толдырчатхан оолларға, алғыс! Махачы тудынғаны, посха айабааны – президент турғысчатхан пӧзік пӧгіннерні толдырарға полысчатхан чахсы сариларыбыс. Арғыстар, ӱлӱкӱннең, 23 февральнаң, сірерні прайзын! Прай ниме чахсы ползын!
Чылығ алғыс сӧстері соонаң «Чон паза армия – пірге!» пайрамнығ мероприятиені тиксі республиканың казак пірігістерінің чайаачы ипчілері ыр-сарыннарнаң паза теелбектернең узаратханнар. Анаң город чуртағҷыларын паза аалҷыларын ат паза адай чарызы сағаан.
Сом Альбина Чистогашевани
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
