Марығ пӧзік синде ирткен
28.02.2024
Хабарлар
Табырах чӱгӱріске тулуңнары ла чилбестенчелер
Спорт. 23-24 февральда Н.Г.Булакиннің адынаң «Абакан» спорткомплексте Хакасия пазының сыйиина 16 часха читкелек оол-хыстарның аразында тиксі Россия синіндегі ниик атлетикаҷа марығлар ирткеннер
Марығда аралазарға прай 169 спортсмен килген – Алтай крайындағы Барнаул городтаң, Кемеров облазындағы Анжеро-Судженск, Прокопьевск, Междуреченск городтардаң, Хызылчар крайындағы Зеленогорск, Сосновоборск, Лесосибирск, Железногорск, Минсуғ городтардаң, Курган облазындағы Курган городтаң, Хакас Республикадағы Ағбан паза Саяногорск городтардаң.
Марығлар ниик атлетиканың мындағ кӧрімнеріне чарылғаннар: 60, 200, 400, 800, 1500, 3000 метрге чӱгӱрістер, ядроны ідері, пӧзікке паза узунға сегірері, ӱс хадыллығ сегіріс.
Пастағы кӱнде ооллар паза хыстар 60 метрге чӱгӱрісте чарысханнар, ядроны ідіп паза пӧзікке сегіріп марығласханнар.
Ниик атлетикаҷа марығны Хакасия пазы Валентин Коноваловнаң республиканың физическай культура паза спорт министрі Сергей Кочан пайрамни асханнар.
– Хакас чирінде ниик атлетикаҷа марығ парчатханынаң прай марығҷыларны, республика аалҷыларын, кӧрігҷілерні алғыстапчам. Ол 23 февральда, Ада чир-суубыс арачылағҷызы кӱнінде, азылчатханы уғаа танығлығ. Пӱӱнгі кӱнде ооллар ӧнетін чаа операциязында Чир-суубыстың амыр чуртазы ӱчӱн кӱресчелер. Марығны піc оларға чарытчабыс. Аарлығ нанҷылар, прайзын ӱлӱкӱннең! Марығҷыларға чиңіс алғапчам! – теен В.О.Коновалов.
Анаң регион пазы паза министр пылтыр тиксі Россияның ниик атлетикаҷа марығларында араласхан саарбахтарға спорт экипировказын читіргеннер. Сыйыхтарны алғаннар Ағбан городтағы ниик атлетикаҷа Олимп резерві спорт школазының ӱгренҷілері Марк Шрейдер, Арсен Савин, Ксения Лыжина, Саяногорсктағы спорт школазының ӱгренҷілері Алина Бессонова, Кира Жаврина паза Хакасияның В.И.Чарковтың адынаң Олимп резерві спорт школазының ӱгренҷізі Артём Сиротин.
Россияның паза Хакасияның гимннері ойнаан соонаң марығлар аннаң андар узарадылғаннар. 60 метрге чӱгӱрісте чарызарға 8 оол турыбысхан. Пистолет атылғанда, олар, орыннарынаң чапчаң тибіреп, ух чіли ӱкӱс салғаннар. Хысха чарыста чир-суғҷыбыс Егор Баглюк араласхан, че ағаа оң полбаан, дистанцияны 7,89 секундаа тобырып, азах меетке иң халғанҷызы читкен. Иң пурнада Алтай крайының оолғы читкен, салтары – 7,28 секунда. Аның соонҷа Хызылчар крайының спортсменнері Артём Гранин (7,48 секунда) паза Максим Шабанов (7,61 секунда) читкеннер.
Хыстарның аразында 60 метрге чӱгӱрісте ідӧк сигіс марығҷы араласхан. Чир-суғҷыбыс Юлия Куралес азах меетке ідӧк халғанҷызы читкен, аның салтары – 8,28 секунда. Прайзын асхан Алтай крайының чӱгӱрік хызы Валерия Князева (7,86 секунда), аның соонда Кемеров облазының спортсмені Мария Бородич (7,93 секунда).
Оолларның аразында 1500 метр дистанцияда марығ хазыр парған, хайзында ікі чир-суғҷыбыс Александр Саяпиннең Максим Тохтобин араласханнар. Манежке толдыра пистолет атылғаны истіл парғанда, спортсменнер чӱгӱр сыхханнар. Пастағы кругтарда Хызылчар крайынаң килген Александр Бурмакин прайзын ізестіг асчатхан. Максим Тохтобин аннаң пір-ікі хаалаға ла соонда тудынчатхан, че «хулаана чағын тынчатхан». Халғанҷы кругта чир-суғҷыбыс улам чапчаң чӱгӱр сыххан, іди Александр Бурмакинні оой ла аза халған. Азах меетке Максим Тохтобин 4:36,33 минутаа читкен, Александр Бурмакин – 4:40,33 минутаа. Чир-суғҷыбыс Александр Саяпин ӱзінҷізі читкен, аның салтары – 4:45,37 минута.
Олох дистанцияны чӱгӱрерге пір саңай 13 хыс турыбысхан. Оларның аразында ӱс чир-суғҷыбыс, Алина Бессонова, Полина Кичекова паза Елизавета Чуб, полған. Марығда хыстар постарының кӧңнілерін чабыра пазынминчалар, ӧӧрелері ӱчӱн «ағырчатхан» абахайлар манежке толдыра хысхырысханнар.
Хызылчар крайының хызы София Шелестова прайзынаң пурнабысхан паза позының орнын пірдеезіне алдыртпаан, азах меетке пастағызын читкен (4:49,67 минута). Аның соонаң чир-суғҷызы Арина Мордвинцева чӱгӱрчеткен, че анаң, тыны хызылып, майың чӱгӱр сыххан. Ӧӧрелері «Арина, давай!» тіп кӧдіре алзалар даа, кӱзі сығыбысхан хыс паза полын полбаан, азах меетке читінҷізі ле читкен.
«Полина, работай!» тіп, хыстар матап хысхырғаннар кӧрігҷілер одырчатхан орыннаң. Іди ӧӧрелерінің прай чӱреенең «ағырчатханнарын» истіп, Кемеров облазының спортсмені Полина Самодурова улам кӱстеніп чӱгӱрген, че алнындағы узун азахтығ София Шелестованы ас полбаан, азах меетке ікінҷізі читкен, салтары – 4:52,07 минута. Пістің чир-суғҷыбыс Алина Бессонова, тізең, 1500 метр дистанцияны 5:05,05 минутаа тобырып, ӱзінҷі орынға сығып алған.
400 метрге пастағы чӱгӱрісте чарысчаң чолзар алты оол сыххан. Оларның аразында чир-суғҷыбыс Алексей Козин араласхан, че ол чиңіске сых полбаан. Олох дистанцияның ікінҷі чарызында Хакас чирінең сыххан ооллар Арсен Савиннең Кирилл Плужник чӱгӱргеннер. Арсен Савин азах меетке прайзынаң пурнада, 55,51 секундаа, чӱгӱр килген. Че, салтарларны кӧрібіскенде, ол пастағы чӱгӱрісте араласхан Артём Касьяновтаң (Кемеров облазы) 0,91 секундаа хала партыр, аннаңар ниик атлетикаҷа марығда ікінҷі орынға сығып алған.
Хыстарның аразында 400 метр дистанцияда Хакасияның ӱчӱн чир-суғҷыларыбыс Арина Лебедева, Диана Целищева, Елизавета Чебунина турысханнар, че, ачырғасха, сыйыхтығ орынға сых полбааннар.
Чӱгӱріс марии парчатханда, пасха спортсменнер узунға сегіріс мариинда араласчатханнар. Че анда пістің оол-хыстарға оң полбаан.
Іди ирткен пастағы кӱнде Хакасия пазының сыйиина Тиксі Россия синіндегі ниик атлетикаҷа марығлар.
Ікінҷі кӱнде, 24 февральда, оол-хыстар 200, 800, 3000 метр дистанцияларда чӱгӱріп чарысханнар паза ӱс хадыллығ сегіріcте марығласханнар. Андада чир-суғҷыбыс Максим Тохтобин 3000 метрге чӱгӱрісте пазох І орынны холға кирген, Алина Бессонова 800 метрге чӱгӱрісте ӱзінҷі орынға сығып алған.
Сом Альбина Чистогашевани
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
