Пір муң артиинаң кізі араласхан
15.03.2024
Хабарлар
![Пір муң артиинаң кізі араласхан Пір муң артиинаң кізі араласхан](/upload/iblock/e66/ubl27yzfknt3kdpc0rr4mm1kp556657k.jpg)
Спортсменнер чарғыҷыларның чарадиин чӱрексініп сағыпчалар
Марығ. Ағбанда чир cпортча Сибирьдегі федеральнай округтар первенствозы паза чемпионады ирткеннер
Пістің хазнада чир спорт алай чирлидинг наа спорт кӧріміне саналча. Аны Россияда 2007 чылда ла пічікке киргеннер. Ол хоос гимнастиканы, акробатиканы паза теелбектерні піріктірче. Хакасияда чир спорт 2016 чылда тиліп пастаан. Мында тренер Виктория Толстопятованың хозымы улуғ. Амғы туста чирлидинг секциялары Ағбанда, Харатаста, Ағбан пилтірі поселокта, Чапаев паза Тазоба пилтірі аалларда тоғынчалар. Хакасиядағы чирлидерлернің чидіглері илееде. Олар аймах-пасха синде иртчеткен марығларда тӧреміл сыйыхтығ орыннарға сыхчалар. Кӧзідімге, 2023 чылда Анастасия Шишпанованаң Мария Кононцева Россия первенствозында алтын медальны холға киргеннер.
Хакасия чир спортча Сибирь марығларын пылтыр пастағызын на удурлаан. Пӱӱл пістіңнерге пазох оң полды. 9-10 мартта Ағбанда СФО-ның первенствозы паза чемпионады ирткеннер. Турнирде 8 регионның, 36 клубтың спортсменнері араласханнар. Тиксі алза, 1177 кізі. Оларны марыға 115 тренер тимнептір. Хакасия ӱчӱн 400 артиинаң спортсмен турысхан. Первенствода паза чемпионатта спорт разрядтығ ла улусха кӱс сынирға чарадылча. Чирлидингте пастағы хаалағлар итчеткен палалар «Сойаннарның кӱзі» фестивальда устарын кӧзіткеннер. Таныхтирға кирек, чир спортта 20 артиинаң дисциплина. Олар ікі улуғ кӧстеге чарылчалар: чир паза перфоманс. Пастағызы акробатика паза спорт гимнастиказының элементтеріне пай. Перфоманссар кірчеткен дисциплиналар – чир-джаз, чир-фристайл, чир-хип-хоп – оңдайларынаң теелбектерге алай хоос гимнастикаа тӧӧйлер. Программанаң танысханда, харахха тасталған: сибирьдегілер ӧӧнінде перфоманста кӱстерін cынапчаттырлар. Марығ тузында чарғыҷылар 398 номерні паалааннар. Олардаң 82 чир кӧстегҷе полған, пасхазы – перфомансча.
Номер ікі минута парчаттыр. Ол син тус аразына араласчылар улуғ нимес ойын кӧзіт пирчелер тирге чарир. Чирлидингте чалғызан марығлазарға чарадылбохчаттыр. Че спортсменнер ікілер алай ӧменең сыхса, уламох морсымнығ кӧрінчелер. 20 кізее пір тиңе шпагатха одырарға алай кірлектенерге оой нимес, неке. Тиктең нимес тренерлер, чӱрексініп, номерлернің кӧбізін ӱгренҷілерінең хада толдырғаннар. Алина Боргоякова Ағбан пилтірі поселоктаң. 19 частығ хыс «Ника» клубта тренер полысчызы полып істенче. Ол чоохтаан:
– Тӧрт чыл чир спортнаң айғасхам. Пӱӱнгі кӱнде ХГУ-да юристке ӱгренчем, тренер Виктория Васильевна Тодышеваа полысчам. Клубсар чӱс артиинаң пала чӧрче. Алында Сибирь мариинда чир-джаз-ӧмелер паза чир-фристайл-ӧмелер дисциплиналарда чиңіс тутхабыс. Россия мариинда кӱстерібісті сынаабызох. Ол Пермьде ирткен. 20 иң кӱстіг клуб аразында пизінҷі орынға сығып алғабыс. Ӱгренҷілерібіс клубсар неделяда пис хати чӧрчелер. Полған на тренировка ікі-ікі час чарым парча.
Марығласчатхан улустаң Мария Шулбаеванаң Кира Фролова хайиимны тартханнар. Хызыҷахтар чир спортнаң алтынҷы чылы айғас парирлар. Олар «Gold’S Tеam» клубсар чӧрчелер, оларның тренерлері – Виктория Толстопятованаң Ирина Носкова. Машаа 11 час, ол Ағбанның 11 № школазында ӱгренче, 13 частығ Кира – 9 № школада. Ӧӧрелер чир-джазта устарын кӧзіткеннер. Кірлектеніп, сегіріп, хызыҷахтар ӱзе майых партырлар. Олар аймах марығларда тӧреміл араласчалар. 1 мартта Москвада ирткен турнирде 30 дуэттің аразында 9-ҷы орынға сығып алғаннар. Первенствода Машанаң Кира хола медаль утханнар.
Спорт «чылтыстарына» Анастасия Шишпанованы паза Мария Кононцеваны санирға чарир. 10-ҷы класстың ӱгренҷілері Хакасияда чирлидингче Россияның пастағы спорт устары полчалар. Аарластығ атты киречілепчеткен танығны паза пічікті саарбахтарға 9 мартта, турнир пайрамни азылғанда, читіргеннер. Настя Шишпанованаң чоох алысханда, ол теен:
– Машанаң пу чидіге ӧрінчебіс паза поғдархапчабыс. Піске паба-іҷебіc, туған-чағыннарыбыс киртінгеннер. Тренерлерібіс Виктория Олеговнаа паза Ирина Олеговнаа улуғ алғыс. Нормативті толдырыбызарға пӧгініп, спортзалдаң сыхпаҷаңмыс. Чир спортта улуғ кӱстеніс кирек. Амды піс улуғларнаң хада марығласчабыс, анзы хай-хай сидік полтыр. Сибирь чемпионады соонда ӧӧрелерімнең хада тиксі Россия мариина тимненербіс. Турнир марттың халғанҷы кӱннерінде Нижний Новгородта иртер.
Cалтарлар искіргенде, Хакасияның спортсменнері прай даа дисциплиналарда медальлар утханнар. Анзы ӧріндірче. Чирлидингте араласчылар аразында ла нимес, ідӧк клубтар паза регионнар аразында марығ парчаттыр. Клубтардаң «Gold’S Tеam» (Ағбан) пастағы орынға сыххан, Барнаулдағы «Экстрим» ікінҷізі полыбысхан, ӱзінҷі орында – «Ника» клуб (Ағбан пилтірі поселок). Халғанҷы ӧме Ағбан пилтіріндегі хоза ӱгредіг учреждениезінің хойнында тоғынча. Регионнар аразында иң кӧп сан – 242 – Хакасия чыып алтыр, Новосибирск облазының 198 сан, Алтай крайының 133 сан. Хакасия – чемпион!
Пу чидіглер ӱчӱн республиканың чир-спортча федерациязының президенті Виктория Толстопятованы махтирға кирек. Виктория Олеговна – тыс пілбес кізі. Ол пірігістегілернең хада, спонсорлар таап, марығларны пӧзік синде иртірче, Россия федерациязынаң пик палғалыс тутча. Виктория Олеговна, сағыстарынаң ӱлезіп, таныхтаан:
– Ағбанда СФО марии ікінҷі хати иртчеткені – піске улуғ сыйых. Анзы республикада чир спорт чахсы тиліпчеткенін киречілепче. Хакасияда Россияның спорт устары хозыларына ізенчем. Настя Шишпанованаң Мария Кононцева пасхазына чол ас пирділер нооза.
Cом Владимир Кулымовти
Автор :
Майя Кильчичакова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде