Гранттар утып, кӱресті тилітчелер
20.03.2024
Хабарлар
![Гранттар утып, кӱресті тилітчелер Гранттар утып, кӱресті тилітчелер](/upload/iblock/366/bkge6b15nbw8e7ofscwcz3ot185pjk7h.jpg)
Ӱс хати Олимп чемпионы Александр Карелин паза спорт министрі Cергей Кочан проект араласчыларынаң хада
Спорт. Хакасияның спорт кӱрезінҷе федерациязы Президенттің гранттар фондының мариинда маңнаныстығ араласча
Спорт кӱрезінің пірігізі, олғаннарны паза саарбахтарны хазых чуртасха тартып, улуғ тоғыс апарча. Ол пӧгіннең федерация араласчылары Вадим Топоевтің устаанынаң, Президенттің гранттар фондының мариинда аралазып, ікінҷі чылы изере аймах проекттернi чуртасха кирчелер. Пастағызы «Чиңістерге чидіп, таңдағы чуртас ӱчӱн харбас» адалған. Ол сидік оңдайларда чуртапчатхан (толдыра нимес паза чуға чуртапчатхан сӧбірелердең, ӧкіcтер) аалдағы саарбахтарға кӧрілген. 2023 чылда проектте 40 артиинаң чиит кӱресчі аралас полтыр. Амғы туста, тізең, пірігістегілер, ікінҷі проектті чуртасха киріп, маң чохха тӱcчелер. Иділчеткен тоғыстаңар Хакасияның спорт кӱрезінҷе федерациязының вице-президенті Вадим Топоев чоохтаан:
– «Спортта чол таап, таңдағы чуртас ӱчӱн харбас» пастағы проекттің узарааны полча тирге чарир. Ол спорт кӱрезінің секцияларына тӧреміл чӧрчеткен, 9-ҷы класста ӱгренчеткен саарбахтарға кӧстегліг. Піс оларны, проектте араластырып, Олимп резерві училищезінзер (техникумынзар) ӱгренерге кірерге тимнепчебіс. Сборлар каникуллар сай иртче. Программа улуғ. Андар, кӱресче ле нимес, кроссфитче тренировкалар кірче. Саарбахтар сыдасчалар. Олғаннарның спорт тимненізі хомай нимес, че хай піреезі школада чахсы ӱгренминчеттір. Училищеде ідӧк аттестаттар марии парча нооза. Чиит спортсменнің «ӱстер» кӧп полза, ол ӱгренерге кір полбас. Піске ӱгретчілернең, школа директорларынаң чоохтазарға килісче. Олардаң саарбахтарға аттестаттағы паалағларны тӱзедібізерге оңдай пирзіннер тіп сурынчабыс.
Вадим Ильичтің таниинаң, проектте 22 саарбах араласча. Олар Таштып, Шира, Алтай, Пии аймахтарынаңнар. Сборлар Ағбанда Советскай орамадағы, 209-ҷы турада орныхчатхан спортзалда иртчелер. Чиит кӱресчілер мындох чуртапчалар, азыранчалар. Оларның аразында ікі хызыҷах пар. Пірcі cборларға Ағбаннаң чӧрче. Iкінҷі абахай Индіркі Тӧӧ аалдаң, ол пасхазынаң хада хостелде алынҷа пӧлікте чуртапча.
Пірігістегілер сборларға саблығ спортсменнерні хығырып аларға кӱстенчелер. 2023 чылда часхызын олғаннарға грек-рим кӱрезінің чазыттарын Россияның саблығ спорт узы Адам Курак паза Россияның спорт узы Василий Топоев асханнар. «Спортта чол таап, таңдағы чуртас ӱчӱн харбас» проекттің пастағы сборын ӱс хати Олимп чемпионы Александр Карелин иртірген. Александр Александрович мастер-класс тузында олғаннарны, микелерге ле нимес, чуртаста посха киртінерге, тӧдір пазынмасха ӱгреткен. Саарбахтарның ӧрінізі пу чир полбаан. Хайди таныхтаан Вадим Ильич, проект Александр Карелиннің кӧңніне кіртір, саблығ спортсмен, хабазығ кирек полза, позынзар айланарға чоохтаптыр.
Пӱӱл мартта проект араласчыларынаң Россия чемпионадының хола призерлары Гаврил Анжигановнаң Тимур Чепчигашев тоғасханнар. Ікізі дее аалдаң, пос тілін матлама пілчелер, аннаңар саарбахтарнаң чоох алызарға оларға сидік полбаан. Амғы туста спортсменнер, Хызылчарда чуртап, тренер Владимир Покояковтың холында устарын таптапчалар. Таныхтирға кирек, Владимир Петрович ӱгренҷілерін чыл сай Ағбанзар сборларға ағылча. 3 – 9 мартта Хакасияда спорт тимненізін 16 кізі ирткен. Тренер Анжигановнаң Чепчигашев килер чайғыда чоннар аразындағы марығларда аралазарлар тіп ізенче. Ооллар, сборларға парыбыспазалар, Тун пайрамда кибіске сығарға пӧгінчелер. Гаврил Анжиганов теен:
– «Хакас чирі» газетаның социальнай сетьтеріне пазын салғам. Оңдай полза, хабарларны хығырчам. Пістің ӱчӱн «ағырған» улусха улуғ алғызым читірчем. Кізілер сағаа киртінзелер, тренировкаларда паза марығларда уламох кӱстенчезің. Хола медальлар тилекей турнирлерiне чол ас пирдiлер. Кирек киліссе, чахсы поларҷых.
Грантсар айланза, федерация 877 552 салковай утып алған. Ідӧк пірігіс проектке позының ахчазын хозар. Салтарында 15 саарбах У(Т)ОР-зар сыныхтағлар тудыбызарға кирек. Пастағы проекттің араласчыларынаң Алтаир Табурчиновнаң Руслан Торточаковты таныхтирға кирек. Олар 2024 чылда Сибирь первенствозында сыйыхтығ орыннарға сыхханнар. Табурчинов алтын медаль холға кирген, Торточаков хола призер полыбысхан.
Сом Вадим Топоевтің архивінең
Автор :
Майя Кильчичакова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде