Президенттi пос хараанаң кӧрген
20.03.2024
Статья
Кирилл Султреков Хызыл площадьта
Чапсых чорых. Таштып аймаандағы Пыдырах аалдағы ортымах школаның 10 класс ӱгренҷiзi Кирилл Султреков улуғ чорыхха пар килген. Ол, «Движение первых» олғаннарның паза чииттернiң тиксi Россия чӧрiмiнiң региондағы пӧлиинiң араласчызы полып, Москвазар чӧрген
Хакасиядаң пу чӧрiмнiң чыылиина 8 олғанны таллап алғаннар. Кирилл, сурыныс пiчиин тимнеп, ирткен чыллардағы нинҷе пар Аарластығ паза алғыстас пiчиин, чыып, марыға ысхан. Анаң интернетче ӱн пирiс пастыра ол чиңiсчiлер санында пол парған. Кириллнiң портфолиозында школа, аал, аймах чуртазында ӧткiн араласчатхан, кӱрес марығларында утхан, хакас тiлiн чахсы пiлчеткен ӱчӱн грамоталар кӧп чыыл партыр нооза.
Андартын айланғанда, школа ӱгренҷiлерiнең хайди пар килгеннеңер ӱлескен. «Хакас чирi» газетаа ідӧк чазыт чох прай ниме чоохтап пирген:
– Пылтыр пiстiң школада пу чӧрiмге прай олғаннарны кир салғаннар, пiснең устапча ӱгретчi Татьяна Витальевна Кулумаева.
Ол чӧрiм хоостыра олғаннар паза чииттер аймах мероприятиелерде, программаларда араласчалар. Москвада 29 январьдаң 2 февральға теере «Движение первых» чӧрiмнiң II чыылии ирткен. Чол ахчазын, 4 чылтыстығ гостиницада чуртаан, азыранған ӱчӱн прай чӧрiм тӧлеен.
– Москвада кӱннернi хайди иртiргезер?
– Пастағы кӱнде пiс позыбыс алынҷа пас чӧргебiс, вожатай килерге кирек полған, че ол кил полбаан. Iкiнҷi кӱнде чыылығны пайрамни асханнар. Анда пiс Россияның президентi Владимир Путиннең тоғазып алғабыс. Пiстi ВДНХ-ҷа экскурсияа апар килгеннер, iдӧк сағыста Москва Ситиҷе, метроҷа чӧргенi халған. Хайхастығ город! Ӱзiнҷi кӱнде концертте полғабыс. Кӱннiң сай пiс мастер-класстарда, азых чоохтазығларда, стратегическай сессияларда араласхабыс, тынанарға маң чох полған.
– Ибзер айланғанда, аалдағылар ниме тееннер?
– «Молодец» ле чоохтан турғаннар. Школадағы палалар, «мин iдӧк Москвазар пар килерге хынчам» тiп, ӱгредiгде, спортта, школа чуртазында уламох ӧткiн аралазарға сiрен сыхханнар.
– Школа тоосхан соонаң хайдар ӱгренерге парарға сағынчазың?
– Омсктағы танковай чаа училищезiнзер кiрiп аларға сағыс тутчам. Ағам кiчiгде мағаа чоохтаҷаң: «Ӧс парзаң, лётчик поларзың». Аннаңар ол саринзар тартыл сыххан поларбын.
Кирилл ӧсчеткен тӧлге, сынап таа, уғаа чахсы кӧзiдiм полча. Кiчiг тустаң сығара халых чуртазынаң хыйа турбаза, чиит туста ниик ле полар нооза. Чыыл парған чидiглерi аннаң андар хаалирға чаратчалар.
Кириллнi ӱгредiге улуғ хайығ саларға паза марығларда аралазарға iҷезi Лидия Максимовна Султрекова матлама кӧнiктiр салған. Ӧткiн, чайаачы, тӧдiр пазынмас кiзi позының палазын даа андағ поларға ӱгретчетпес пе.
Сом Султрековтар сӧбiрезi архивiнең
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде