Хакасия правительствозы «Россия почтазы» АО-наң чӧптезіг иткен
03.04.2024
Хабарлар
«Россия почтазы» АО-ның устағҷызы Михаил Волков паза Хакасия пазы Валентин Коновалов пірге тоғынардаңар чӧптезігде хол салчалар
Тоғыс чорығы. Хакасия пазы Валентин Коновалов пу кӱннерде Москвада тоғынған. Тоғысчы тоғазығларның пірсі почта тоғызынаң палғалыстығ ағырсымнығ сурығларны пӧгеріне чарыдылған
Хакасия пазы Валентин Коновалов Москвазар тоғыс чорығы тузында «Россия почтазының» устағҷызы Михаил Волковнаң тоғасхан.
Пу тоғазығда олар алынҷа кӧстеглерҷе пірге тоғынҷаң чолларны ӱзӱрібіскеннер, акционерлер пірігізі паза Хакасия правительствозы аразындағы пірге тоғынардаңар чӧптезігде хол салғаннар.
– Амғы чуртас-экономика саринаң оой нимес туста почта позының социальнай функциязын толдырарын узарадарға, инфраструктуразын тилідерге, иң не пурун республиканың аалларында, істеніс оңдайларын чахсыландырарға, чал ахчазы синін кӧдірерге кирек, – таныхтаан республика пазы.
Валентин Коновалов регионның правительствозы ол кӧстегде прай кӱзінең хабазарға тимде тіп ізендірген.
Ідӧк Хакасия пазы Сибирьнің 2035 чылға теере Тиліс стратегиязын чуртасха киреріне чарыдылған чыылығда араласхан. Пу килкім проектті тимниріне Сибирьнің прай регионнары хозым иткеннер. Россия правительствозы аны 2023 чылның октябрьында чарадыға алыбысхан.
Стратегияда 147 мероприятие. Олар Сибирьдегі федеральнай округтың инфраструктуразын, энергетиказын, ниме-ноо сығарчатхан промышленнозын, аал хониин паза науказын тилідеріне кӧстелгеннер.
Регион пазы Тиліс стратегиязы проектінзер, пістің республиканы тилітчең ӧӧн кӧстеглер хоостыра, алызығлар кирерге чӧпнең чоох тутхан.
Республика правительствозы 2019 чылдох Валентин Коноваловтың устаанынаң Хакасияның 2030 чылға теере Тиліс стратегиязын тимнебіскен.
Аның тӧстеенде пис ӧӧн кӧстег: кізі, чуртасха, тоғысха, ӱгредіге паза тынаға истіг оңдайлар тӧcтирі; экологияны чахсыландырары, чир-чайаанға ӱрег ағылбинчатхан экономиканы тилідері, чир алтындағы ис-пайны анирынаң палғалыстығ полчатханыбысты хызырары; инфраструктураны тилідері; культура-тархын ис-пайын хайраллиры.
– Республиканың прай чуртағҷыларынаң хада піс стратегиябыстың кӧстеглеріне чидеріне кӧп ниме ит салғабыс. Піс чуртасха кирек объекттерні пӱдірчебіс, чолларны тыхтапчабыс, киизер оолығ ниме-ноо тасталчатханын хызырчабыс, городтарны паза аалларны иптепчебіс, наа производстволар тӧстепчебіс.
Хайдағ даа кризис – ол алнынзар хаалирына наа оңдай. Пӱӱн, санкциялар тузында, тӧреен республикабысты, Сибирьні паза прай хазнаны тилітчең прай оңдайларнаң тузалан халарға кирек, – таныхтаан Валентин Коновалов чыылығның салтарларынҷа.
Сом r-19.ru cайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
