Ниме имнепче онкоуролог?
04.04.2024
Хабарлар
![Ниме имнепче онкоуролог? Ниме имнепче онкоуролог?](/upload/iblock/492/w9bqrjdlmc9ky0cbo68zv2n1py916ekx.jpg)
Чиит онкоуролог Владислав Райков
Имнег кирее. Республиканың онкология диспансерінде чиит имҷі-онкоуролог Владислав Райков маңнаныстығ істен парча
Чиит тее полза, ол улуғ опыттығ имҷі, уғаа чахсы имнепче тіпчелер пациенттер. Хайди олар санапчалар, имҷі поларға ағаа Худайдаң пирілген. Андағ махтағлығ чоохтарны истіп, аннаң хайди даа танызып аларға чаратхам.
Владислав Райков, Ағбанда тӧреен-ӧскен кізі, пастап городтағы 14-ҷі школада, анаң Хакас гимназияда ӱгренген. Школа соонаң 2007 чылда, Томсксар чол тудып, Сибирьдегі хазна имнег университедінзер ӱгренерге кіріп алған.
– Итсе-де, туған-чағыннар аразында имҷі кізі чох полған. Кічігде мин пӧзік нимес сыннығ, оох сӧӧктіг пала полғам. Іҷем, миннеңер матап сағыссырап, улуғ ӧс парза, аар тоғыста істенмезін, ах халаттығ тоғынҷы ползын тіп сыбыра сағын чӧртір. Аннаңар имҷі профессиязы миизіме сиип парған, неке. Ағаа хоза, школада мин биология паза химия предметтерні хынып ӱгренгем, – теен Владислав Сергеевич.
Іҷезі Светлана Анатольевна Райкова пос киреенең айғасхан. Тай іҷезі Галина Васильевна пархазына уғаа кӧп хайығ салҷаң. «Ол полбаан полза, ам имҷі полар ӱлӱс мағаа тӱспесчік, неке», – тіпче пархазы. Галина Васильевна пастап ӱгретчі, анаң хабарҷы полып тоғынған. Владиславты паза аның ачы харындазы Максимні тынағ кӱннерде ибде орыс тілінең диктант пастырҷаң, книга кӧп хығырдырҷаң. Саарбахтар, тізең, тасхар ойнирға сағынҷаңнар, тай іҷезі оларны іди ӱгретчеткені кӧңнілеріне пір дее кірбеҷең. Оолағастар, пір чирде ӧзіп, ідӧк пір школазар чӧріп, пір класста ӱгренгеннер. Музыка школазынзар хадох ла чол тутчаңнар. «Че тай іҷемнің іди хыйға хылынғаны мағаа паза харындазыма вузсар ӱгренерге кіріп аларға уғаа туза полған», – ам ӧрініснең таныхтапча пархазы.
Владислав Райковха, имҷі специальнозын алар ӱчӱн, алты чыл ӱгренерге киліскен. «Имнег кирее» факультетті тоозып, ол, пір чыл интернатура иртіп, хирургияҷа опыт алынған. Анда «урология» курста ӱгренчеткенде, пу кӧстег кӧңніне кірген. Чиит оол уролог поларға чаратхан, аннаңар пу кӧстегҷе ординатурада пілізін ікі чыл алғытхан. Анда аның устағҷызы полған профессор, Томск облазының ӧӧн урологы паза Сибирьдегі ӧӧн олған урологы Александр Владимирович Гудков. Владислав Сергеевич ординатура тузындох позын чахсы специалист чіли кӧзіткен. Аннаңар В.С.Райковты Томскта пу имнег университедінің урология кафедразында имҷі-уролог поларға артыс салғаннар. Университетте ікі клиника тоғынча, оларның пірсінде урология кафедразы пар, хайзында пілістер алған паза істенген чиит имҷі. Кафедрадағы урология пӧлиинде иң не сидік операциялар иділчеттір. Пеер кізілерні имненерге Томск облазының прай пулуңнарынаң ысчалар. Урология – ол ідӧк хирургия профессиязы. Владислав Сергеевичке анда кӱстіг имҷілер ӧмезінде тоғынарға ӱлӱс тӱскен. Андада уғаа чахсы опыт алынғам тіпче.
Ол Томскта 2016 – 2020 чылларда істенген. Ағбанда, тізең, тоғысха усанабас кіріп алған. Пеер ол 2020 чылда сентябрьда отпуск тузында тынанарға кил партыр. Ікі-ӱс кӱн пазынаң, ирістіг полыбысханда, аның республикада істенчеткен урологтарнаң танызып аларға сағыс пол килтір. Пурун городтың имнег туразындағы урологтарнаң танызып алтыр, соонаң республиканың ӧӧн имнег туразындағыларнаң чоох алыстыр, анаң республиканың онкология диспансеріндегі имҷілернең. Халғанҷызында ӧӧн имҷі Олег Борисов орынҷызынаң хада хакас урологты сах андох постарынзар тоғынарға хығырғаннар, онкоуролог киректелче тееннер. Чал ахчазы кӧдіре тӧлелер тіп молҷааннар. Че ӧӧні – аны «онкология» кӧстегҷе cағамох ӱгренерге ызарлар. Хызылчардағы имнег университедінде ӱгредиин узарадар оңдай пиргеннер. Владислав Сергеевичке чахсы cағынып аларға, чуртазын алыстырыбызардаңар чарадығ аларына пір ле сутка киректелген. Ол ӱгренерге ынабысхан, ибде ипчізінең, улуғларынаң чӧптезіп алып, табыраанҷа нандырған. Андада вузта ӱгредіг чылы пасталыбысхан, ол курстарға пір-ікі кӱнге орайлатчатхан нооза. Томскта тоғызынаң ідӧк чапчаң саназыбысхан, Хакасиязар айлан киліп, сах андох ӱгренерге чӧрібіскен. Паза чир-суунзар айланҷаң сылтағларның пірсі хомзыныстығ кирекнең палғалыстығ полған. Томскта чахсы чӧлег полчатхан профессор А.В.Гудков 2020 чылда, аар ағырыбызып, сын чирзер парыбыстыр.
Хакасияда ол туста ӧнетін ӱгредігліг онкоуролог чох полтыр. Онкодиспансерде «урология» кӧстегҷе тӧреміл операциялар итчеткен имҷі полбаҷаң тіпчелер. Кізілерні ол кӧстегҷе, ӧнетін специализация иртіп, хирург-онколог Сергей Мусияченко имнеп турған. Че пу имнег учреждениезінзер Владислав Райков онкоуролог поларға килгеннең, Сергей Петрович диспансернің поликлинказында онколог полып тоғынча. Владислав Сергеевич диспансернің абдоминальнай паза торакальнай онкология пӧлиинзер тоғысха 2020 чылның халғанҷызынзар алылған. Пазағы чылдаң январьдаң кӧӧлҷе операциялар идіп пастаан.
Амды ол тӧртінҷі чылы онкоуролог полып тоғын парир. Анда ол пӱгӱрек, хоох рак ағырығларынаң ирееленчеткен кізілерні имнепче, иреннерні дее, ипчілерні дее. Паза пӱгӱректердең сідік сығарчатхан тамырның (мочеточник), предстательнай мирсі, иреннің ызых ит чардыхтарының рак ағырығларын. Диспансер поликлиниказында онкоуролог неделяда ікі кӱн кізілернің хазиин сыныхтапча, ӱзінҷі кӱнінде – хада тоғынчатхан арғызы Дмитрий Парков. Кӧзідімге, имҷі, поликлиникада иртеннең сығара тоғынып, обед соонаң, стационарзар киліп, пӧлікте пірее операциялар идерге маңнанчаттыр.
– Піс поликлиникада хирургия операциязы киректелчеткен пациенттерні талластырчабыс. Анаң пістің пӧлікте оларға хирургия операцияларын, кізі идін кизіп, олаңай оңдайнаң паза лапороскопия оңдайынаң даа, итті киспин, улуғ нимес ӱт идіп, ӧнетін имнег тиріглерінең тузаланчалар, идерге килісче. Ікінҷі оңдайы «малоинвазивная хирургия» адалча, анда электроскальпельнең тузаланчабыс, ол тамырларны кисче паза сах андох «хабыстырып» чапсырып одырча. Іди кізі иді істінзер хан даа чайылбинча паза операция чігінде улуғ нимес ле сорып халча. Поликлиникада пістің кабинетсер сыбыра улуғ теес поладыр. Ағырчатханнарны имнеп, піс стационарда кӱннің сай операциялар итчебіс. Айда 60 – 80 алай 100-че дее операция иділче, неке. Пірее кӱнде улуғ нимес 3-4 операция иртіріл парадыр, че пірееде пір сидік операция тӧрт часха даа сӧӧ тартыл парча алай аннаң кӱн тооза, саңай азах узында турып, айғасчабыс.
Піссер кӧбізін иреннер предстательнай мирсі рак ағыриинаң айланчалар. Оларға орта диагноз турғызарынҷа тоғызыбысты оңдайлап алғабыс. Рак ағырии пар ба тіп, пурун биопсия алылча. Чоохтирға кирек, ПСА-тесттің сині илеедезінің пӧзік поладыр. Андағ пациенттернің полғанына ла имненчең килістіре оңдай орта таллап аларға кирек. Анзы ідӧк пір дее оой нимес тоғыс. Сынап істезіглер полызиинаң рак ағырии ілезіне сығарылза, піреезіне операция даа чох лучевой терапия ла чарап парча, кемге-де операция хайди даа киректелче, кем-де химия терапиязы полызиинаң имнен сыхча. Анзы-мынзы хайди даа пациентнең ӱзӱрілче, – таныхтаан имҷі.
Пу ағырығ онкоурология ағырығлары аразында пастағы орында полтыр. Аннаң ирееленчеткеннер саны пістің республикада паза хазна синінде пір дее пасхалалбинчаттыр. Ікінҷі орында – хоох рак ағырии. Пӱгӱрек рак ағыриинаң ирееленчеткеннернің саны сала асхынах арах полтыр. Тилем учурабинчатхан ағырыға ир кізінің ызых идіндегі рак саналча.
Амғы туста ағырчатханнарның саны кӧптең кӧп ле полып одырча. Ноғадаңар? Имҷі чооғынаң, пу кӱнде УЗИ, скринингтер прай даа чирде иртірілчеткен сылтаанда, ол-пу ағырығлар наа ла пасталчатса табыл парчалар. Паза узах частығларның саны хойыпча. Кирі кізінің ит-сӧӧгіндегі геннер (ДНК) тоғызы сайбалча. Онкология – ол ӧӧнінде геннер синіндегі сайбағлар. Че ідӧк онкология ағырығлары, алюминий, сырлар, нефть ниме-ноолары сығарылчатхан, радиациялығ заводтарда істенчеткен чонның удаа сығыс килче. Кӧзідімге, алюминий заводында істенчеткен кізілер чиит тустох имҷілерзер айланчалар. Ідӧк ағырығ тӧлдең тӧлге пирілчетсе, рак сығыс килерге айабас.
Имҷі чӧп пирче, сідікте хан сизін салзаңар, хайди даа урологсар алай онкоурологсар айланыңар. Сідікте кизектіг хан полза алай ол хызамдых ӧңніг пол сыхса, че кізі ам даа пір дее ағырсынминчатса даа, соона салдырарға чарабас. «Свекла чеен соонаң іди cідік кӧмес хызар парча», – сылтанча піреезі. Анаң пір кӱн ирт парча, пір дее ниме ағырбинча, ӱс ай алай чарым чылҷа амырап парадыр, че соонаң тың улғаат сыххан ағырығнаң ирееленчелер. Анҷаға аны тузында имнеп алҷаң оңдай даа халбинча. Постың идін, пірее орында сіс сыхча ба тіп, холнаң тутхлап, сыбыра сыныхтап турарға киректелче. Пірее дее хатығ тӱӱнҷегес пілдірчетсе, пурун терапевтсер айланарға киректелче, анаң ол пасха специалисттерзер ысча. 50 час ас парған иреннерге сыбыра, ПСА-тест иртіп, хазиин сыныхтанарға кирек. Ипчілерге 45 час алтабысхан соонаң тӧреміл имҷі-гинекологта сыныхтан турарға. Диспансеризация иртерінең тоғыр полбасха. Хазыхха тузалығ ас-тамах чирге. Хазыхха ӱрег ағылчатхан заводтарда тоғынмасха кӱстенерге.
Таныхтирға кирек, В.С.Райков республиканың онкология диспансерінде тоғын сыхханда, хоох паза предстательнай мирсі рак сістерін эндоскопия операциялары полызиинаң имнеп пастааннар. Алында, андағ сісті имнир ӱчӱн, пациенттерні Хызылчарзар алай пасха даа городтарзар ысчаңнар. Алай пациенттер республиканың ӧӧн имнег туразындағы алай городтағы урологтарзар чӧр турғаннар. Ам ағырығ хоохты эндоскопия операциязын идіп алай химтерапия полызиинаң даа имнеҷең оңдай чох полза, аны хыйа ал тастабызып, наа хоохты ічегедең ит пирчелер. Іди диспансердӧк имнеп алчалар. Предстательнай мирсі рак ағыриин Хакасияда операция идіп ідӧк имнебеҷеңнер. Чиит онкоуролог, тізең, амды ідӧк лапараскопия оңдайынаң тузаланып операциялар ит полча. Пӱгӱрек рак сізін олох наа оңдайнаң ӧткін тузаланып имнирге кӱстенче.
Ол кӱстіг имҷі-онкоурологтарның ӧмезінде тоғынчатханына ӧрінче. Абдоминальнай паза торакальнай онкология пӧлиинде ӱc онколог тоғынча. Оларға пӧлік устағҷызы Геннадий Стрижапков чахсы хабас турча. Халғанҷы чылда диспансерзер ікінҷі чиит онкоуролог Дмитрий Парков тоғынарға килгенде, Владислав Сергеевич кӧмес тынам істен сыхты. Ам ікӧлеңе пір тоғысты толдырарға хай-хай оой тіпче.
Томскта чуртапчатханда, ол, хоных хонып, сӧбіре тӧстеен. Ипчізі Ксения Юрьевна Ефимова Казахстанда ӧскен, ол провизор полча. Ирепчі ікі пала ӧскірче. Тун палазы Алиса 7 частығ. Очызы – Леонид, ӱр ниместе ікі час толдыр салды. Пірсінде Томскта сӧбіре пазын город чуртағҷылары, ӱн пиріп, иң чалахай докторға санабысханнар. 2020 чылда анда «Мария-Ра» садығ компаниязы «Чалахай доктор» марығ иртіртір. Чиңісчіні городтағылар, ӱн пиріп, таллап алғаннар. Владислав Сергеевич андағ марығ иртірілчеткеннеңер, чон аның ӱчӱн матап ӱн пирчеткеннеңер пір дее пілбиндір. Ағаа Сірер марығда утып алғазар тіп сығдыратханнарында, алаң ас парған. Кӱҷӱрлер хаңыртыпчалар тіп, пастап киртінминдір дее. Аны идінҷектер грамотанаң таныхтааннар.
Хакасияда чиит имҷіні пылтыр республиканың хазых хайраллаҷаң министерствозы тіспен істенізі ӱчӱн ідӧк грамотанаң сыйыхтаан. Ирткен чылдох Владислав Сергеевич онкоурологтың ІІ категориязын арачылап алған. Анаң І категориялығ, соонаң пӧзік категориялығ специалист полыбызарға пӧгінче. Науканаң даа айғазар сағыс тутча. Улуғ пӧгіннердең – Хакасияда эндоскопия хирургиязын аннаң андар тилідері. Амғы туста тиксі тилекейде хирургтар Да Винчи робот полызиинаң аймах операциялар итчелер. Россияда килкім городтарда ла андағ кӱстіг аппарат пар. Аннаң ноо даа хирург тоғын кӧрерге сағынча полар, че андағ сағысты кічіг регионнарға толдырар кӱс чидіспес тіп санапча. Диспансерде прай имнег оборудованиезі пар тіпче. Онкологтарның тоғызын, радиология корпузы пӱдіріл парғанда, сала нииктеп пиргеннер, кізілерні имнир оңдай сала алғып парған. Урология рак ағырығларын даа лучевой терапия полызиинаң имнепчелер. Аны физиотерапиядағы чіли иртчелер тіпче имҷі. Пациенттің иді пір дее чирде кизілбинче. Аны анда чатыр салчалар, ол арада аппарат кізі ибіре 10 – 15 минута ибіріл чӧрче, пір дее ниме ағыртпинча.
Ӧӧн тоғызынаң пасха, В.С.Райков идінҷектернің ікі клиниказында чуртағҷыларға имнег полызиин пирерге маңнанчаттыр. Кізілерні чахсы имнепчеткен чиит специалистті улуғ городтарда істенчеткен арғыстары постарынзар тоғынарға хығырчаттырлар. Ол сағам чир-суунда чонға туза ағыларға кӱстенче. Пос туста футбол даа ойнирға маңнанча. Чалахай имҷее туған-чағыннары тың поғдархапчалар. Ол санда 10 класста ӱгренчеткен Артём туңмазы, хада ӧскен пиҷезі Лариса, іҷезі, ууҷазы, ӧӧй пабазы. Прайзы ізенче, ол аннаң андар, ідӧк маңнаныстығ тоғынып, улуғ чидіглерге чит турар.
Сом В.С.Райковтың архивінең
Автор :
Инора Боргоякова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде