Ооллар армияа тимненчелер
10.04.2024
Хабарлар
![Ооллар армияа тимненчелер Ооллар армияа тимненчелер](/upload/iblock/457/oqexqsdlmm8em2hz5rg4e1uknikuu2h8.jpg)
Хакасияның чааҷы комиссары, подполковник Николай Видяйкин
Брифинг. Пу наада Хакасияның чааҷы комиссариадында хабарҷыларны чыып алғаннар. Анда пӱӱл службаа тимненчеткен чииттерні хайдағ наа оңдайлар сағыпчатханнаңар чоох парған
Хакасияның чааҷы комиссариадының пастығы подполковник Николай Видяйкин иң пастап пӱӱл службаа хабылчатхан чииттерні хайдағ наа ниме сағыпчатханнаңар чарытхан.
– Россия Федерациязы 2023 чылда орғах айының 4-ҷі кӱнінде алған чарадии хоостыра, пу чылдаң сығара ооллар 30 часха теере армияа хабыларлар. Мының алнында чииттерні 27 часха читіре алҷаңнар. Кемге пӱӱл кӱрген айында 27 час тол парған, че ол армияа парбаан, закон хоостыра запасха ызылар, службаа хабылбас, – чарытхан подполковник Николай Видяйкин.
Николай Николаевичтің сӧстерінең, Хакасиядаң пӱӱл, ирткен чыллардағы чіли, 400 оол службаа ызылар. Хакасияның чааҷы комиссариадының пастығын пір чахсы кӧзідім ӧріндірче – пір кізі дее армияа парарынаң тоғыр нимес. Анзын ол Украина чирінде парчатхан ӧнетін чаа операциязынаң палғалыстырча. Хазнабыс неонацизмнең тоғыр хазыр харбазығ апарчатханда, чииттер парчан чир-суғҷыларыбыснаң хада поларға сағынчалар.
Оңарылыстығ, мындағ кӧні чоохтазығ парчатханда, хабарҷыларның аймах сурығлар табылғаннар. Оларның пірcі пӱӱл армияа хабылчатхан постаң оолларны Россияа піріккен наа регионнарзар службаа ызарлар ба, чох па тіп сурығ полған. Подполковник Николай Видяйкин Россия Федерациязы алған чарадығны хығыр пирген. Анда кӧнізінең чоохталча – службаа наа хабылған постаң оолларның пірдеезі андағ орыннарзар ызылбас. Піреезі пос кӧңнінең андар парарға сағынчатса, армия соонаң ағаа андағ оңдай пирілер, контракт хоостыра службаны узарадарға чарир.
– Армияа парған чииттер аймах-пасха специальностьтарға ӱгреніп алчалар. Анзы оларға, ибзер айланза, килістіре тоғыс таап аларға полысча. Андағ кӧзідімнердеңер удаа истерге килісче, – чарытча Николай Николаевич.
Пӱӱл Хакасияның чииттерін хаҷан армияа ӱдезердеңер сурығ пиргенде, подполковник Видяйкин аны алғым чарыт пирген. Кибірге кір парған оңдай хоостыра, пістің чир-суғҷыларыбысты хосхар айының 15-ҷі кӱнінде ӱдесчеткен осхастар. Ол хайди даа пайрам кибірли иртірілчеткенін таныхтаан пастых кізі. Іҷе-пабалардаң, туған-чағыннардаң пасха, постаң оолларны службаа ӱдезерге республиканың устағ-пастаанда тоғынчатхан кізілер килчелер. Чииттерні Ағбандох чааҷы кип-азаана тонандырыбысчалар. Чолға азых-тӱлӱк паза банк карталары пирілче.
Россияның арачыланыс министрі Сергей Шойгуның пастаа хоостыра, «Чаалазығлар араласчызы» удостоверениені, паза даа пасха кирек танығларны піріктірчеткен пічіктерні пір электроннай удостоверениезер чыыпчалар. Аның пір саринда «Чаалазығлар араласчызы» чаҷын удостоверениенің парчан танығлары хобырыл парарлар.
– Пӱӱлгі чылдаң сығара андағ удостоверение-карталарны чаалазығлар араласчыларына пиріп пастадылар. Аның ээлері пастағны кӧңнілеріне чағын алчалар, – таныхтаан тоғазығ тузында подполковник Видяйкин.
Пірее пілдізі чох сурығлар табылза, Россияның арачыланыс министерствозының сайтында электроннай удостоверениедеңер піліп аларға чарир. Алай ба «ізіг линиязар» 117 номерҷе сығдырадып, прай нимені сурастырарға кирек.
Сом Альбина Чистогашевани
Автор :
Анатолий Султреков
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде