Чӱгӱріс – ол ӧрініс, чӱгӱріс – ол чуртас
11.04.2024
Хабарлар
Саблығ тренер Михаил Хоботов Александр оолғынаң паза Екатерина хызынаң хада
Спорт. Чоннар аразындағы класстығ спорт узы Михаил Хоботов Хакасияда иң чахсы тоғынчатхан тренерлернің санына кірче
Прай ниме кічігдең
Хазии уйан спортсменнер, улуғ марығларда аралазып, Хакасияа медальлар тӧреміл ағылчалар. Чир-суғҷыларыбыстың ниик атлетикада, стол теннизінде, охчаадаң атарында, ат спортында чидіглер илееде. Олар Россия чемпионаттарында ла нимес, чоннар аразындағы марығларда кӱстерін сынапчалар. Кӧзідімге, пӱӱл мартта теннисисттер Александр Соколовнаң Григорий Исаков Астанада (Казахстан) ирткен турнирде ӱзінҷі орынға сыхханнар.
Пістің республикада кинек спортсменнернең иң пурун ниик атлетикаҷа чоннар аразындағы класстығ cпорт узы Михаил Хоботов тоғынарға пастаан. Анзына ікі сылтағ: Михаил Дмитриевич хазии уйан сӧбіредең. Аның паба-іҷезі паза пиҷезі туных, тілі чох (глухонемые) тӧрееннер. Пу ағырығ тӧлдең тӧлге пирілче. Ағаа хоза тренер санапча: ниик атлетикадаң артых спорт кӧрімі чоғыл. Аннаң айғасчатхан кізі хаҷан даа пик хуйахтығ паза хазыхтығ поладыр. Михаил Хоботов чоохтапча:
– Олған тузым часкалығ полған. Пабамнаң іҷем Роза пиҷеме паза мағаа прай паарсас-хынызын читірҷеңнер. Хазии уйан сӧбіреде тӧреен-ӧскені мағаа кинек улустың кирексіністерін чахсы оңарарға оңдай пирген. Ідӧк мин салааларнаң «чоохтазып алчам».
Чир-суғҷыбыс спортха кічігдең хынҷаң. Олғаннарнаң хада марығлазарға хынығ нооза. Итсе, кӧңніне кірчеткен спорт кӧрімін ол илееде тус таллаптыр. Оолағас меспектіг ойыннарда, cпорт кӱрезінде кӱзін сынаан. Пос туста конькиліг чӱгӱр чӧрерге хынҷаң. Школада Хоботовты аймах марығларға тӧреміл сығарҷаңнар. Пір хати физкультура ӱгретчізі 11 частығ паланы аал хонии техникумындағы ниик атлетика манежінзер город мариинда араластырарға ағыл килген. Ол тусха арға-мӧрій тоозыл партыр, оолағас турнирде аралас полбаан. Че ӱгретчі чідірінмеендір. Ол андағы тренерні Мишаны сыныхтабызарға сурынған. Михаил Дмитриевич таныхтапча:
– Физкультура ӱгретчізі Лариса Васильевнаны улуғ аарласнаң сағысха кирчем. Ол ниик атлетикаа хынызымны тыытхан. Галина Дмитриевна Дребнева пастағы тренерім полча. Аның хада хонғаны – Анатолий Иванович Дребнев. Ирепчі хада тоғынҷаң. Оларның устаанынаң спортта улуғ чидіглерге читкем.
Пастағыох марығлар киречілееннер: Хоботов чӱгӱрерге тӧреен. Часха тиңнернің аразында Михаил прайзын даа утчаң. Ол ортымах паза узун дистанцияларда узын сынаҷаң. Пастағы улуғ чидіглердеңер чоохтаза, 17 частығ спортсмен 1990 чылда СССР ӱгренҷілерінің спартакиадазында ӱзінҷі орынға сыххан, 1991 чылда чииттер аразында ирткен СССР чемпионадында алтын медаль холға кирген. Москвада 1992 чылда СНГ паза Германия командалары аразында матч ирттір. Анда аралазып, чиит кізі 5000 метрде хола призер полыбысхан. Соонаң Михаил Хоботов ниик атлетикаҷа Россия кубоктарында, чемпионаттарында кӱзін cынаҷаң. Аның дистанциялары – 3000, 5000, 10 000 метрлер, чарым марафон паза марафон.
Марафоннар
Че кӧбізі Михаил Дмитриевичті марафоннар араласчызын чіли таныпча. Тренернің таниинаң, пастағы марафонны ол 25 частығда чӱгӱрген. Спортсмен азах меетке читінҷізі читтір. Чиит кізі 42 километр 195 метрні 2 час 23 минута аразына тобырыбысхан. Хайди Хоботов чоохтапча, пастағы марафонны, пастағы хынысты чіли, ундударға сидік. Чир-суғҷыбысты Омскта чахсы таныпчалар. Ол пу городта иртчеткен Сибирьдегі чоннар аразындағы марафонда пис хати чемпион атха турысхан: 1999, 2000, 2003, 2004 паза 2005 чылларда. Спортсмен сағысха кирче:
– Омскта чахсы марафон. Анда ахча хомай нимес тоғынып аларға чарир. Пастағы ікі чыл мағаа ниикке чӧрҷең машиналар сыйлааннар, аның соонда ахча читіргеннер. Халғанҷы чылда дистанцияны чӱгӱрерге сидік полған. Кӧрігҷілер, мині танып салып, ӧтіг хысхырыстарынаң кӧңнімні матап кӧдіргеннер. Санапчам, оларның хабазиинаң алтын медальны утхам.
Михаил Дмитриевич Россиядағы ла нимес, хырығ озариндағы марафоннарда кӱзін тӧреміл сынаҷаң. Кӧзідімге, 2005 чылда ол США-дағы Остин городта ирткен арға-мӧрійде чиңіс тутхан. Пір чыл пазынаң Лос-Анджелестегі марығда узын кӧзіткен. Тилекейде пу иң танығлығ марафоннарның пірcі полчаттыр. Спортсмен, дистанцияны 2 час 15 минута паза 5 секунда аразына тобырып, азах меетке читінҷізі читкен. 2007 чылда чир-суғҷыбыс пазох ӧріндірген. Ол Хьюстонда (США) кӱмӱс медаль холға кирген. Тиксі алза, Михаил Хоботов 10 артиинаң марафон чӱгӱрібіскен. Ол чоохтапча:
– Чылда марафонны ікі хати чӱгӱрерге чарир. Аннаң кӧп полза, кинеп парарға ӱр нимес. Марығлар ӧӧнінде часхызын паза кӱскӱзін иртчелер. Ноғадаңар? Марығласчатхан улус, ізігде чӱгӱріп, ирееленмезін тіп. Арға-мӧрійде сыйыхтығ орынға сығарға пӧгінчетcең, дисциплинаа тудынарға, орта азыранарға кирек. 37 частығда чӱгӱрерін тохтат салғам. Ол тусха теере тренировкалар неделяда алты хати, иртен паза иирде, иртчеңнер. Тынағ кӱн – позырах. Диетадаңар чоохтаза, марафонны чӱгӱрчеткеннерге хаарған чиис чирге чарадылбинча. Ӧӧнінде оорда тимнелген ас-тамахты чіҷеңміс. Че олох бодибилдерлернең тиңнестірзе, пістің диетаа хай-хай оой тудынарға. Кӧзідімге, менюда конфеттер пар. Піске ӱс чапсынминча, тренировкалар паза марығлар тузында «хайыл парча». Хазых паза сылағай поларға сағынчатсаңар, чӱгӱр чӧріңер.
Тренер тоғызы
Саблығ спортсмен таңдағызынаңар тӧреміл сағынҷаң. Ол пір ле ниме пілген: хаҷан даа тренер полып тоғын полбас тіп. Чир-суғҷыбыс чооғын узаратча:
– Мин ниик атлетикаа сабылған кізібін. Ол мағаа ахча тоғынып аларға, сӧбіремні азырирға оңдай пирген. Чииттӧк Ағбандағы Олимп резерві училищезін (техникумын) тоосхам. Мағаа анзы читкіҷе полған. Хада хонғаным Лариса Ивановна аннаң чараспаан. ХГУ-да физкультура ӱгретчізіне заочно ӱгренерге оңдай тӧстелгенде, сах андох вузсар пічіктерімні апар салған. Ирік чох ӱгренгем. Диплом ӱчӱн ипчіме улуғ алғыс. 2010 чылда чӱгӱрерге тоос салғам, тоғынарға кирек. Пекиндегі Паралимпиада соонда пістің хазнада хазии уйаннарның спорты чахсы тиліп сыххан. Хакасия пу чӧрімге хозылғанох. Спорт министерствозында кинектернең хада Алексей Маслов тоғынған. Алексей Владимирович коляскалығ чӧрҷең, шахматча тренер полып істенҷең. Ол туста спорт министрі полған Валерий Васильевич Денщиковсар парып, тренер тоғызына аларға сурынғам. Іди испинчеткен олғаннар школазының ӱгренҷілерінең хада тоғын сыххам.
Чарым чыл пазынаң, таң, арғыстары Михаил Дмитриевичті Ағбан пилтірі поселоксар спартакиада иртірерге хығырғаннар. Турнир хол-азаа чахсы тоғынминчатхан (ДЦП), оорха-мойнын сындырған, азаа алай холы кинеп парған улусха кӧрілген. Марығ соонда Алексей Маслов тренер Хоботовты ӱс кізіні, тимнеп, Чебоксарызар Россия мариина апар килерге сурынтыр. Чир-суғҷыбыс таныхтапча:
– Алаң ас парғам. Оолларны пастағызын на марығда кӧргем. Первенство, тізең, ікі неделя пазынаң иртер. Спортсменнернің пірcі Вадим Трунов полған. Ол Чебоксарызар пір дее парарға хынминчатхан, чадап чӧптеп алғабыс. Марығ тузында ол ікі алтын паза пір хола медаль утып алған. Іди піс хада тоғын сыххабыс.
Вадим Трунов – улуғ чидіглерге читкен Хакасияның хазии уйан пастағы спортсмені. Ол Харатастаң, аның пір холында протез. Чиит кізі Харатастағы техникумда ӱгренгенде ниик атлетиканаң айғазарға пастаптыр. Спортха физкультура ӱгретчізі Лидия Ивановна Помигалова кӧӧктірген. 2010 чылда Вадим 21 час толдыр салған, олох чыл тренер Михаил Хоботовтың устаанынаң улуғ спортта пастағы хаалағлар иткен. Трунов – спринтер, ол хысхаҷах дистанциялар чӱгӱрерге кӱс. Россияның піріктірілген командазынзар 2013 чылдаң кірче.
Танығлығ чидіглердеңер чоохтаза, тилекей чемпионаттарында Вадим Трунов арғыстарынаң хада эстафетада ікі хати ӱзінҷі орынға сыххан. Пастағы арға-мӧрій 2013 чылда Лионда (Франция) ирттір, ікінҷізі – 2015 чылда Дохада (Катар). Хакас спортсмен Европа чемпионаттарынаң медальлар чох айланмаҷаң. 2014 чылда олар Великобританиядағы Суонси городта марығласханнар. Анда Трунов ікі хати хола призер полыбысхан. 2016 чыл ідӧк чидіглерге пай. Чиит кізі Европа чемпионадында арғыстарынаң хада эстафетада ікінҷі орынға сыххан, 100 паза 200 метрлерде Россияа хола медальлар ағылған.
Хомзынысха, Вадим Трунов Паралимпиадада аралас полбаан. 2016 чылда чир-суғҷыбыс Рио-де-Жанейродағы арға-мӧрійге таллағ иртібіскен. Паралимпиадаа пір неделя халғанда, Россияның прай командазын марығлардаң суурыбысханнар.
Вадим Андреевич – чоннар аразындағы класстығ спорт узы. Пістің республикада 2016 чылда «Ирбис» спорт школазы тоғынарға пастаан. Ол хазии уйан улусха кӧрілген. Пу школа азылғанында тренер Михаил Хоботовтың паза аның ӱгренҷізі Вадим Труновтың хозымы улуғ.
Амғы туста Михаил Дмитриевичтің холында 30-ча кізі узын таптапча. Олардаң 5 спортсмен Россияның піріктірілген командазынзар кірче. Ӱр ниместе Сергей Вяткин Россия кубогында хола призер полыбысхан, Иван Кулаженков Россияның спорт узына нормативті толдырыбысхан. Чидігні киречілепчеткен пічікті паза танығны Кулаженковха 2023 чыл тоозылчатханда читіргеннер. Ізестіг спортсмен – 17 частығ Даниил Кашин. Вадим Труновтаңар чоохтаза, 35 частығ чир-суғҷыбыс амға теере марығласча, ідӧк ол Ағбандағы ниик атлетикаҷа Олимп резерві cпорт школазында тренер полып істенче. Михаил Хоботов тӱзімніг тоғызы ӱчӱн 2021 чылда «Хакасияның физическай культуразының паза спортының саблығ тоғынҷызы» аарластығ атха турысхан.
Чӱгӱріс клубы
Михаил Дмитриевичтің кізілерні чӱгӱріс полызиинаң хазыхтандырарға сағыс чох полған. Ол чоохтапча:
– Пис-алты чыл мының алнында минзер идінҷек Дарья Белендинова айланған. Ол Хакасияда «I Love Supersport» чоннар аразындағы спорт школазының орындағы пӧлиин азарға пӧгінген. Анда улуғлар, ахча тӧлеп, чӱгӱріснең айғазарҷыхтар. Мині тренер тоғызына хығырғаннар. Кӧні чоохтаза, кирек килізер тіп ікінҷілеем. Саба сағынтырбын. Чӱгӱріс клубы амға теере тоғынча. Андар 60-ҷа кізі тӧреміл чӧрче. Оларны ӱс ӧмее чарыбысхабыс. Наа ла килген улуснаң Глеб Ромащенко тоғынча, ікінҷі ӧме Вадим Труновтың холында узын таптапча, иң кӱстіглернең мин айғасчам. Амғы туста Ағбанда пасха даа клубтар пар. Ӧмедегілер хайди даа «Чилдең табырах» чӱгӱріc фестивальында араласчалар. Пӱӱл ол 26 майда иртер. Чӱгӱріснең айғасчатханнарның саны ӧсчеткені ӧріндірче.
Сӧбіре
Михаил Хоботовтың таниинаң, аның чидіглерінде сӧбірезінің, туған-чағыннарының хозымы улуғ. Оларның киртінізі, хабазии ағаа кӱс хосча. Пабазынаң іҷезі паза пиҷезі чеенінең хада 10-ҷы чылы Нюрнбергте чуртап парирлар. Тренер таныхтапча:
– Іҷемнің хыс фамилиязы – Кайзер. Минің хыс чеенім ідӧк туных, тілі чох тӧреен. Роза пиҷем, палазына чахсы оңдайлар тӧстирге пӧгініп, Германиязар кӧзерге чаратхан. Оларның чуртас оңдайлары чахсы. Хазна чурт пирген, полысчы пар.
Хада хонғаным Лариса Ивановна Хоботова-Атанаева ӧкпе ағырии диспансерінде илееде чыл имҷі-фтизиатр полып істен парир. Ол хакас чонның хызы. Позымның ікі пала. Саша оолғым пастағы хонығымда тӧреен. Ол 1993 чылдаң. Мин чіли ниик атлетикада узын сынаан, физкультура ӱгретчізі специальнозын алған. Пӱӱнгі кӱнде пасха сферада істенче. Катя хызым 1999 чылда тӧреен. Ол іҷезінің чолын пасча. Пастап Ағбандағы имнег колледжін тоосхан, амды имнег вузында пілістерін алғытча.
Сом Михаил Хоботовтың архивінең
Автор :
Майя Кильчичакова
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде