Тойлығ ипчілерге – теелбектіг флешмоб
12.04.2024
Хабарлар
Флешмобтың араласчылары теелбек салчалар
Чӧрім. Республиканың перинатальнай кіні алнындағы ачыхта Тойлығ ипчілернің тиксі Россиядағы кӱніне чарыдылған мероприятие ирткен. Анда пастағы иркеҷекті сағыпчатхан ипчілер паза палалығ іҷелер араласханнар
Тасхар чылығ паза айас кӱн турған. Перинатальнай кіннің алнынзар илееде кізі чыыл парған. Хайдағ мероприятие паза хайдағ оңдайнаң ол иртірілгеннеңер чарыт пирген кіннің ӧӧн имҷізі Ольга Любчич:
– Пістің перинатальнай кінде Тойлығ ипчілернің тиксі Россиядағы кӱніне чарыдылған улуғ нимес концерт кӧзіділген. Паза пістің учреждение пуох кӱнге чарыдылған тиксі хазнадағы чӧрімге хозылған. Аны ӧнетін иртірчебіс, ибіркі чон пала сахтапчатхан ипчілерге хайығ салзын тіп. Хазна оларға аймах хабазығлар пирче. Кӧзідімге, он ікі неделяа читкелек тойлығ ипчілер санға тур салзалар, оларға пособие тӧлелче. Ӧӧні – азах аар ипчілер иртеезін имҷілернің хайиинда полчалар, тузында сыныхтағлар иртчелер, киректелзе, имненчелер. Россия президенті чарадии сылтаанда «Родовой сертификат» программа тоғынча. Пістің хазнада тойлығ ипчілерге хаҷан даа чахсы хайығ салылҷаң, оларны ниик істеніске ызарына пічік пирілче, анзы харааларда, аар тоғыстарда паза компьютер кистінде ӱр тоғынарға чарадылбинчатханын таныхтапча.
Пістің улуғларыбыс таа иң татхыннығ паза тузалығ чиистің улуғ кизегін тойлығ ипчее пирібізерге кӱстенҷеңнер, анзы тӧлнің таңдағызы паза часказы ипчіде полчатханнаңар. Аннаңар піс ибіркі чонның хайиин тойлығ ипчілерге тартчабыс, улуғ теестерде алнынзар позыт турзыннар алай кӧп чон чӧрчеткен транспортта оларға орыннарын пир турзыннар. Пала табары паза посты іҷе поларына чарыдары уғаа танығлығ кирек. Тойлығ ипчілернің тиксі Россиядағы кӱні пістің хазнада чылда ікі хати таныхталча, 7 апрельде паза 7 октябрьда. Ӧӧні іҷелерге, палаларға чахсы хайығ салары паза тойлығ ипчілернің статузын пӧзік синге кӧдірері полча.
Іҷелерге паза іҷе поларға ам на тимненчеткен ипчілерге улуғ нимес, че чапсых концерт тимнелген. Оларны ӱлӱкӱннең «Версия» теелбек студиязынзар чӧрчеткен олғаннар «Верю – не верю» паза «Эх, Марусенька!» теелбектерінең алғыстааннар. Перинатальнай кінде істенчеткен имҷі-неонатолог Анна Табаева флешмобтың араласчыларын паза ӱлӱкӱнге килген аалҷыларны сарын cарнап ӧріндірген. Таныхтирға кирек, ол позы даа тӱрчедең іҷе полыбызар. Чӧрім теелбектенҷең флешмобнаң тоозылған. Аның араласчылары іҷелер паза тойлығ ипчілер полғаннар. Олар прайзы перинатальнай кіннің пациенттері, прай 30 ипчі. Таныхтирға кирек, ипчілер тренернең хада чахсы тимнен салтырлар, ӧткін теелбектенгеннер. Оларны кӧріп, сағыссырабысчатхабыс таа, пала ол туста хайди полча полар тіп. Че тренер чарытхан, ол теелбек ӧнетін азах аар ипчілерге кӧрілген. Теелбек салғаннарның аразында Хакас хазна университедінде имнег киреене ӱгренчеткен Анастасия Карамчакова полған. Ол позынаңар паза флешмобта араласханнаңар хысхаҷахти чарыт пирген:
– Мағаа 33 час. Минің 6 частығ Кирилл оолғыҷаам пар. Сағам тӧртінҷі курзының студенті полчам, имҷі-терапевт специальнозын алчам. Мындағ чапсых флешмоб иртірілчеткенін піліп алғанда, хада ӱгренчеткен ӧӧрелерімнең аралас кӧрерге чарат салғабыс. Ағаа хоза, ӱлӱкӱннің турғызылчатхан кӧстеглері кӧңніме кірче, іҷе поларын паза пала ӧскірерін кӧдірерге кирек. Паза теелбек сидік нимес, тренернің не соонҷа толдырчазың.
Теелбек толдырылған соонаң араласчылар кӧк тигірзер кӧгілбей, хызамдых паза хызыл сарығ ӧңніг шарлар позыдыбысханнар. Кӧгілбей паза хызамдых ӧңнер хызыҷах алай оолағас тӧрирін таныхтаан, хызыл сарығ ӧңніг шар – перинатальнай кіннің таниин. Мероприятиенің тӧстегҷілері прай араласчыларға тадылығ сыйыхтар читіргеннер. Ӱлӱкӱн тоозылғанда, аалҷылар даа, араласчылар даа чалахай кӧңніліг тарасханнар.
Сом Альбина Чистогашевани
Автор :
Наталья Тюкпеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде