«Кӱс сында» поезд – Хакас чирінде
17.04.2024
Хабарлар
Эшелон пастығы, генерал-майор Сергей Приймак (сол саринаң ікінҷізі) республика пастыхтарына Росcияның «Тигр-М» кӧп кӧстегліг автомобильні кӧртісче. Аннаң ідӧк «Арбалет ДМ» чаа модульынаң ырахтын устирға чарир
Чӧрім. Пу позырахта, хосхар айының 14-ҷі кӱнінде, Ағбандағы тимір чол вокзалында «Кӱс сында» поезд турған
Ағбанда тимір чол вокзалында Россияның арачыланыс министерствозының «Кӱс сында» поезді 10.00 – 14.00 частарда турған. Ол ӧнетін чаа операциязының араласчыларына хабазығнаң тиксі хазнаҷа чӧрче. Ідӧк ол Россияның сын тархынын сабландырарына кӧстелген.
Поездті удурлирға кил парғаннар ағбандағылар ла нимес, Хакасияның пасха даа город-аймахтарының чуртағҷылары: сӧбіренең, класснаң, арғыс-ӧӧрелернең хада. «Кӱс сында» тиксі Россиядағы агитация-пропаганда чӧрімінің митингінде Хакасия пазы Валентин Коновалов, Ӧӧркі Чӧптің кнезі Сергей Сокол, эшелонның пастығы, генерал-майор Сергей Приймак, Ағбандағы орындағы гарнизон пастығы – 01662 чааҷы частьының командирі, полковник Андрей Баринов араласханнар. Россияның, Хакасияның паза Юнармияның флагтары кӧдірілген, анаң Россияның паза Хакасияның гимннері толдырылған.
– Пӱӱн Россия сын ӱчӱн, полғаныбыстың на пос чуртазы ӱчӱн кӱрезігні апарча. Пістің хазнабыстың ирткен чылларда матыр тудынғаны таңдағызына ізеніс пирче. Республиканың прай чуртағҷылары адынаң Россияның арачыланыс министерствозына пу тузалығ чӧрімні иртірчеткен ӱчӱн алғызым читірчем. Кӱс сында, чиңіc, тізең, хайди даа пісти полар! – теен Валентин Олегович.
– «Кӱс сында» поезд – ол улуғларыбыстың махачызын сағысха кирҷең паза пір оңдай. Оларның посха айабаанын паза махачызын хумартхылирға. Че ам даа, 21 чӱс чылда, нацизмні чох идіп, тархындағы сын киректі алыстырарға, хазнабысты изелдірерге хайдағ даа кӱстеніске хыйыстыра турып, Россия чиңістерінің сабланыс тархынын пазарын узаратчабыс. «Кӱс сында» проект – ол, чиит тӧлібіске паза пасхазына чааҷыларыбыстың матыр тудынғанына теелер оңдай, Ада чир-суубыстың пос чуртазына, суверенитедіне правоны хайдағ паанаң турызарға киліскенін сағысха кирер оңдай, – таныхтаан чооғында Сергей Михайлович.
Сергей Приймактың таниинаң, «Кӱс сында» поезд, Москвадаң азығ айының 23-ҷі кӱнінде сығып, андар Чиңіс кӱніне айланарға кирек. Пу тус аразына ол 67 регионның 75 городында, тимір чол станциязында, пол парыбызарға кирек. Чолның тиксі узуны – 34 муң азыра километр.
Пастыхтар чоох тутхан аразында орындағы чааҷы частьтарының чааҷыларына, СВО араласчыларына, оларға полысчатхан ӧмелерге паза ӧткін ипчілерге хазна сыйыхтары читірілген: Суворовтың медальы – пір кізее, Жуковтың медальы – ӱс кізее, Россияның арачыланыс министерствозынаң «Полызығ паза аллығ чӱрек ӱчӱн» медаль – тӧрт кізее.
Хакасияда юнармеецтер санына 5000 азыра оол-хыс хозылған. Сергей Приймак Таштып аалның юнармеецтер отрядына, юнармеецтернің пірcі Анастасия Назароваа, Россия Матыры, ефрейтор полған Аймир Миягашевтің ады пирілчеткеннеңер киречілег пічиин читірген. Митингох тузында 30 оолах-хызыҷах Юнармияа хозылған. Олар юнармеецтің сын омазына турызарына сӧс пиргеннер, анаң пастыхтар оларға книжкаларны паза танығлар читіргеннер. Оларның аразында Н.Ф.Катановтың адынаң Хакас национальнай гимназия-интернаттың ӱгренҷілері полған. Cын ӱчӱн кӱрезіп, хайдағ даа сидіксіністерні тобырарға, ӱгредігде паза спортта чидіглерге чидерге, хазых чуртас апарарға, патриот поларға паза Россия гражданинінің адын турыстыра ал чӧрерге сӧс пирген национальнай гимназияның 8-ҷі класстың ӱгренҷізі Дмитрий Котожеков.
Н.Ф.Катановтың адынаң Хакас национальнай гимназия-интернаттың ӱгренҷілері Илбек Ада чааға чарыдылған хоостарнаң танысчалар
Илбек Ада чаа тузында 1941 чылда кічіг хырлас айында Ағбанда хараазын чара чачырастардаң чаалапчатхан 679-ҷы авиация полкы тӧстелген. Полк Карелия фронтында паза Заполярьеде чааласхан. 1943 чылда ӱртӱн айының 29-ҷы кӱнінде СССР-ның Ӧӧркі Чӧбінің чарадиинаң ағаа Хызыл Знамя читірілген. Митинг тузында ол Хакасияа, аның ӧӧн музейіне, хайраллаларға читірілген.
Митинг иртчеткен туста поезд вагоннарынҷа чуртағҷылар экскурсияа ирт сыхханнар. Пастыхтар оларға хозылғаннар. Іди олар пастап килкім чаа техниказынаң танысханнар, ол санда Украина чааҷыларынаң холға кирген «Брэдли» М2 БМП-ны (США сығарча). БМП-ны пістің чааҷылар ирткен кӱскӱзін Авдеевка саринда, «Центр» гранатометнаң чаалап, холға киргеннер. Таныхтирға кирек, чаалазыға ол таарлағ машиназынаң наа ла читірілген полтыр, аннаңар тиксі 240 километр ле чӧр салтыр. Россияның, тізең, нинҷе-де техниказы кӧзідіге сығарылған: З-СТС паза «Спартак» броньнығ машиналар паза «Арбалет ДМ» ырахтын устаҷаң чааҷы модульлығ «Тигр-М» кӧп кӧcтегліг автомобиль.
Вагоннар аймах кӧстегліг полғаннар: пірсінде садығ туразы, ікінҷізінде – Юнармияның вагоны, аннаң андар хығыртығ, чаа-талай флодының, инженер войсколары, «Стрижи» пилоттар ӧмезінің паза чаа-десант войскозы, Илбек Ада чаа тузына чарыдылған вагон паза пасхазы. Чуртағҷылар Россияның Тирігліг Кӱстерінең тиксі дее танызып алғаннар. Чаа корабльларының, суғ алтындағы кимелернің, истребительлернің аймах модельлерінің кічіг кӧрімнерінең паза істі-тастындағы пӱдізінең танысханнар. Амғы инженерлер хайдағ наа тиріглер сағынып алчатханын кӧргеннер. Мына хайда пістің кӱзібіс.
Пірее войсколар кӧстегліг вузтардаңар искіріг тимнеп салтырлар. Чииттер оларның ӱгредіг оңдайларынаң чағын танысханнар. Пір платформада кӧрігҷілер алнынзар чайаачы ӧмелер чаа тузындағы чааҷының сидік ӱлӱзінеңер, матырынаңар, хыныстаңар, Ада чир-сууна хыныстаңар сарыннарны толдырарға сыхханнар. Перронда ідӧк чазы кухнязы тоғынған: кӧрігҷілернің ізіг чей паза чааҷы кашазын чіп алар оңдай полған.
Тиксі алза, тӧрт час аразына «Кӱс сында» поездте 8400 чуртағҷы пол килген. Аннаңар даа вагоннарзар улуғ нимес теестер полған, че пірдеезі хоптанмаан алай хомзынызын читірбеен. Улуғ-кічіглер теестерін сағааннар.
Сомнар Альбина Чистогашевани
Автор :
Наталья Сюптерекова
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде