Хазна стипендиязына турысты
19.04.2024
Хабарлар
![Хазна стипендиязына турысты Хазна стипендиязына турысты](/upload/iblock/890/p0bmi694o16hk9qywkyl8mg4qywrv0p7.jpg)
Александр Асочаков
Чидіг. А.М.Топановтың адынаң Хакас драма театрының артизі Александр Асочаков, Россия регионнарының культурадағы паза искусстводағы чиит тоғынҷыларының санына кіріп, Россия Правительствозының хазна стипендиязын алған
Россияның театр тоғынҷыларының пірігізі чыл сай Россия Правительствозының стипендиязын аларына марығ иртірче. Аның ӱчӱн 35 час толдырғалах чайаачы оол-хыстар харбасчалар, андар артисттер, режиссёрлар, театроведтер, хоосчы-сценографтар, драматургтар паза пасхазы кірче. 2024 чылда пу стипендияны хазнаның аймах городтарының 33 чиит специализі утхан.
Чир-суғҷыбыс Александр Санкт-Петербургтағы театр искусствозының академиязын тоосхан. Ол 2011 чылдаң сығара А.М.Топановтың адынаң Хакас драма театрында істенче. 12 чайаачы чыл аразына Александр тилекей классиказынҷа, национальнай паза амғы драматургияҷа отыс азыра ӧӧн паза хоза рольларны ойнаан. Артисттің иң чарых рольлары: М.Булгаковтың романынҷа турғызылған «Мастер и Маргарита» ойында – Азазелло, А.Сагатаевтің пьесазынҷа тимнелген «Махачы ооллар» драмада – аалдағы чағбан чӱректіг оол, Н.Гогольның «Ойынҷылар» хормачы ойынында – кӱҷӱр Ихарев, А.Топановтың пьесазынҷа «Алаахтыртхан Хорхло» хынығ ойында – чон матыры Ӧҷең, Т.Майнагашеваның «Хуу инейнің тӧллері» алыптығ нымаанда – алып Хан Хылыс, А.Цагарелинің пьесазынҷа «Ханума» хормачы ойында – музыка ӱгретчізі Котэ паза пасхазы.
Чайаачы артист Россияның танығлығ мероприятиелерінде тӧреміл араласча. Ол Новосибирск городта ирткен Россияның театр тоғынҷылары пірігізінің Сибирьдегі театр форумына чӧрген. Симферопольда ирткен «Таврида» тиксі Россия синіндегі чииттернің І ӱгредігліг форумының делегады полған. Хакасияның министерстволары паза ведомстволары иртірчеткен Спартакиадаларда ӧткін араласча.
Стипендия ахчазына Александр Асочаков, хакас чонның ойыннарына тӧcтене, «Ах тай – кӧк тай» олғаннарға интерактивнай проект тӧстир.
Пу стипендияның ӧӧн пӧгіні – чииттерге полызары, оларға тоғыста ӧзерге чахсы оңдайлар тӧстирі, чайаачы тоғыстарны чуртасха чапчаң кирері.
Сом интернеттең алылған
Автор :
Светлана Селигеева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде