Хакас кип-азаан кизіп, Москвада хоных хонарлар
19.04.2024
Хабарлар
![Хакас кип-азаан кизіп, Москвада хоных хонарлар Хакас кип-азаан кизіп, Москвада хоных хонарлар](/upload/iblock/2f5/9mu3qo0bf7ksne7d3qpcael2osxmy1qw.jpg)
Сабир Боргояков паза Тарина Бытотова
2024 чыл – Сӧбіре чылы. Сілкер айының 15-ҷі кӱнінде Чоннар аразындағы сӧбіре кӱні таныхталча. Андағ танығлығ кӱнге удур «Россия» кӧзідіг-форумда Той фестивальы иртер
Сілкер айының 12-ҷі кӱнінде «Россия» чоннар аразындағы кӧзідігде Той фестивальында тиксі хазнадағы 100 азыра аймах чонның чииттері хоных хонарлар. Ол кӱн чииттерге хаҷан даа танығлығ полар. ВДНХ-дағы «Чоннар ынархазы» фонтан алнындағы ачыхта оларның тойлары пайрамни иртер. Пістің чир-суғҷыларыбыс Сабир Боргояковнаң Тарина Бытотованың хонығы Москвада санға алылар. Чииттернең тоғасханда, олар хайди танызып алғаннаңар паза андағ танығлығ оңдайнаң той иртерінеңер кӧңнілерінең ӱлескеннер.
Сабир Боргояков Ӱс чул аалдаң. Школа тоозып, Ағбандағы олимп резерві училищезінде ӧрт арачылағҷызы специальнозына ӱгреніп алған. Амды Асхыс аймааның Ӱс чул аалдағы ӧрт ӱзірҷең пӧлиинің пастығы полча. Москвазар парардаңар чииттер чӱрексіпчелер. Ӱс кӱнге парыбысса, Cабир ідӧк тоғызынаңар сағыссырир.
– Часхызын, кӧк от сыххалахта, ӧрттер сығысчатханы удаа полча. Амды тоғыста амыр нимес тус, чазыдағы ӧрттерні ӱзірерге чӧрчебіс. Аннаңар тоғызымнаңар сағыссырапчам, – чоохтаан Сабир Боргояков.
Тарина Бытотова Полит аалдаң. Ол ідӧк Ағбандағы олимп резерві училищезін физическая культура специальнозынҷа тоосхан. Анаң Хакас хазна университедінде ӱгредиин узарадарға чаратхан.
Чииттер хонҷых аалларда чуртааннар, удур-тӧдір таныс полғаннар. Амғы чииттер интернет пастыра чоох алысчалар, Сабирнең Тарина ідӧк интернет пастыра чағын танысханнар. Чахсы пілісчеткен чииттернің кӧӧленіс оды чари тӱскен. Ирткен чылда чайғызын олар хакас кибірінҷе сас тойын иртіргеннер, че, хомзынысха, чииттернің хоныхтарын андағ-мындағ сылтағларнаң санға ал полбинчатханнар. Кӧрік айында оларның Тамир оол тӧреен. Асхыстағы ЗАГС-сар хоныхтарын санға аларға пічіктерінең айланғаннар. Анда, тізең, чииттерні хайхастығ паза сағыстарында хаҷанға даа халар оңдайнаң тойларын иртірерге чӧптееннер. Итсе, олар, кічіг ыңааҷағын артыс салып, іди ырах парыбызарға чочынчалар, че ууҷалар Тамирні чахсы кӧрерлер тіп ізендірчелер. Аннаңар Сабирнең Тарина, сағыссырапчатсалар даа, Москвазар чорыхха тимненчелер. Оларға тойларына хайди даа хакас чонның кип-азаан кизіп аларға киректелче, аннаңар чииттер танығлығ кирекке килістіре кӧгенектер таап аларға кӱстенчелер.
Сабирнең Тарина сілкер айының 11-ҷі кӱнінде Ағбаннаң самолёттығ учуғыбызарлар. Москвада, тізең, оларға ікі кӱнге гостиница номері тимнел парған. Сілкер айының 12-ҷі кӱнінде ВДНХ-дағы «Чоннар ынархазы» фонтанның алнында тиксі Россиядағы 100 азыра аймах чонның чииттерінің хоныхтарын пайрамни санға аларлар. Танығлығ той соонаң ирепчілерні, ретро автомобильлерге одыртып, Москваның танығлығ паза чапсых чирлерінҷе экскурсияа апарарлар. Иирде пайрамнығ стол салылар, прай чииттер анда, танызып, тойларын таныхтирлар. Наа тӧстелген сӧбіре сілкер айының 13-ҷі кӱнінде Ағбанзар айланар.
Пайрамнығ кӱн чағдапча, чииттернің чӱрее талбырапча, аннаңар оларға амыр паза ниик чол алғапчабыс.
Сом Альбина Чистогашевани
Автор :
Наталья Тюкпеева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде