Харатастағы техникум – «Россия» кӧзідіг-форумда
19.04.2024
Хабарлар
![Харатастағы техникум – «Россия» кӧзідіг-форумда Харатастағы техникум – «Россия» кӧзідіг-форумда](/upload/iblock/356/634jf42d79dg256ne47ym8pytkk9b2zj.jpg)
Ӱгредіг. Харатастағы отрасльлар технологиялары техникумының ӱгретчілері паза студенттері Москвада иртчеткен «Россия» чоннар аразындағы кӧзідіг-форумда Профессиялар фестивальында араласханнар
«Пасталығ класстарда ӱгредіг апарары» кӧстегҷе 3-інҷі курста ӱгренчеткен студенттер Кира Радченко паза Марина Крестьян ӱгретчілері Ольга Прыгуннаң паза Светлана Попованаң хада «Профессионалитет» федеральнай проекттің «Педагогика» ӱгредіг кластері республикада хайдағ оңдайнаң чуртасха кирілчеткенінеңер чоохтааннар.
С1 павильондағы Россияның істеніс министерствозының «Сӧбіре. Тоғыс. Узах чуртас» кӧзідиинде чиит хыстар паза оларның ӱгретчілері форум аалҷыларына «Профессионалитеттің» иң ӧткін ӧмелерінің агитациязын кӧзіткеннер. «Піс – хазнабыстың таңдағызы» кӧзідігде олар ортын профессиональнай ӱгредігнің тузазынаңар, кирек полчатханынаңар искіргеннер.
Ідӧк аалҷыларны «Ӱгретчі – кізінің чайағҷызы» чапсых ойында аралазарға хығырғаннар. Ойын амғы тустағы ӱгретчінің пілістерін сыныхтабызарға полысча. Ол тусты хынығ иртірерге оңдай пирген паза аның полызиинаң кӧрігҷілер, аймах сурығларға нандырып, ӱгредіг киреенеңер кӧп хынығ ниме піліп алғаннар, сағыстарынаң ӱлескеннер.
– Хакасияны паза Харатастағы отрасльлар технологиялары техникумын мындағ килкім мероприятиеде кӧзіткенібіске поғдархапчабыс! Техникумға мында араласханы уғаа танығлығ. Мында піске чонға позыбыстаңар чоохтир, чидіглерібісті кӧзідер паза ӱгредіге кирген наа нимелерібістеңер искірер оңдай пирілген. Ідӧк піс пасха-пасха регионнарда пу кӧстегҷе тоғынчатхан кізілернең танызып алғабыс, – сағыстарынаң ӱлескен техникум директорының ӱгредігліг тоғысча орынҷызы Ольга Прыгун.
Ольга Леонидовнаның чооғынаң, Харатастағы отрасльлар технологиялары техникумы «Россия» чоннар аразындағы кӧзідіг-форумда алған пілістерін ӱгредіг учреждениезін тилідерінде ӧткін тузаланар:
– Піс наа сағыстарны паза проекттерні чуртасха кирерге сағынчабыс, пасха ӱгредіг учреждениелерінең паза компанияларнаң палғалыстарыбысты тыыдарбыс. Ідӧк студенттернің пілістерін кӧдірерге, оларны чуртасха кӧніктірерге уламох кӱстенербіс.
Таныхтирға кирек, Россияның просвещение министерствозының «Профессионалитет» федеральнай проекті хазнаның 2030 чылға читіре чуртас-экономика тилізінің иң танығлығ пастағларының пірсі полча. Аның ӧӧн пӧгіні – ортын профессиональнай ӱгредігде пӧзік пілістіг специалисттерні наа оңдайларнаң тимнирі. Тоғынҷыларның пілістері экономика секторының амғы тустағы кирексіністеріне килістіре поларға кирек.
Автор :
Валентина Кабардина
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде