Спортсменнерге хабазығлар тыыдылар
26.04.2024
Хабарлар
![Спортсменнерге хабазығлар тыыдылар Спортсменнерге хабазығлар тыыдылар](/upload/iblock/bf6/b81pneohpipbwzetz52zmgluw2xxjxco.jpg)
Хакасия пазы Валентин Коновалов
Ӱлгӱ. Хакасия пазы Валентин Коновалов республика правительствозының чыылиин иртірген
Хосхар айының 23-ҷі кӱнінде министрлер кабинедінің теестегі чыылии ирткен. Аның пастағы сурии «Хакас Республикадағы физическай культурадаңар паза спорттаңар» законзар алызығлар кирчеткен закон проекті полған.
– Аның ӧӧн кӧcтее – пӧзік чидіглерге читчеткен пістің спортсменнерге, оларның тренерлеріне хоза социальнай хабазығлар пирері, спортнаң айғазарына киліcтіре оңдайлар тӧстирі, – чарытхан Валентин Коновалов.
Хайди таныхтаан Хакасияның физическай культура паза спорт министрі Сергей Кочан, закон проекті Хакасия пазы чахиинҷа республика спортсменнерінің тимненізін пӧзік синде тудар, пасха регионнарзар кӧсчеткенін хызырар паза оларға мында турыстығ оңдайлар тӧстир пӧгіннең тимнелген. Закон проектінҷе аймах-пасха улуғ марығларда чиңіс тутхан спортсменнерні паза оларның тренерлерін пір хати пирілчеткен тӧлегнең таныхтиры кӧрілче.
Ідӧк законзар наа статья кирілче – чурт пӱдіреріне алай квартира аларына пір хати пирілчеткен тӧлег. Пу хабазығ пӧзік чидіглерге читкен (Олимп ойыннарында, Паралимпиадаларда, Сурдлимпиадаларда чиңіс тутхан, тилекей алай Европа чемпионы атха турысхан, чоннар аразындағы марығларда утхан, Россия чемпионаттарында ӱстең кӧп хати сыйыхтығ орын алған) паза чурт оңдайларын чахсыландырарын кирексіпчеткен спортсменнерге, оларның тренерлеріне пирілер.
Чурт оңдайларын чахсыландырарына спорт министерствозы ӧнетін положение тимнеп салған. Аны хоостыра чуртха субсидия Хакасияда тӧреміл паза 10 чылдаң ас нимес чуртапчатхан спортсменнерге, тренерлерге пирілер. Ол тӧлегнең тимде чуртты аларында, алынҷа тура пӱдірерінде, ӱлӱстіг пӱдірігдегі квартираны аларында алай кредитті чабарында тузаланарға чарир полар.
– Пу кӧcтегҷе пір хати пирілчеткен тӧлегнің сині – чурттың рыноктағы паазының 10 процентінең сығара 95 процентіне теере, – искірген спорт министрі.
Ахчалығ тӧлеглердеңер чоохтаза, чоннар аразындағы марығларда чиңіс тутханнарға пір хати 80 муң салковай тӧлелер, 2-ҷі орын ӱчӱн – 50 муң салковай, 3-ҷі орын ӱчӱн – 30 муң салковай. Спартакиадалардағы пастағы орын ӱчӱн пір хати пирілчеткен тӧлег сині 50 муң салковай, 2-ҷі орын ӱчӱн – 30 муң салковай, 3-ҷі орын ӱчӱн – 20 муң салковай. «Азия палалары» чоннар аразындағы ойыннар алай ӱгренҷілер паза чиит улус спартакиадазы чиңісчілеріне 30 муң салковай пирілер, 2-ҷі орын ӱчӱн – 20 муң салковай, 3-ҷі орын ӱчӱн – 10 муң салковай. Россия кубогындағы пастағы орын ӱчӱн 50 муң салковай тӧлелер, 2-ҷі орын ӱчӱн – 30 муң салковай, 3-ҷі орын ӱчӱн – 20 муң салковай.
Сергей Кочан закон проекті прай чӧптезіглерні иртібіскен, спортсменнер аны чидікпин сағыпчалар тіп таныхтаан.
– Сынап, законодательстводағы кирек алызығлар, спортсменнер аны сағыпчалар, – салтарлар иткен Валентин Коновалов. – Чурт аларынҷа піcтің хабазығлар пар полған, че амды ол киректі системаа айландырчабыс. Ол санда спортсменнер ам чахсы пілерлер: хайдағ чидіглер ӱчӱн хайдағ хабазығлар пиріл турар.
Закон проекті тӱрчедең Хакасияның Ӧӧркі Чӧбі ӱзӱриине сығарылар тіп кӧрілче.
Чыылығның ікінҷі сурии республикада суғ тазарынаң паза ӧрт сығызарынаң хорғыстығ тус хайди иртчеткеніне чарыдылған.
– Суғ тазарының ікінҷі чардығын піc тобырып алғабыс, – таныхтаан Хакасия пазы. – Че алнында ӱзінҷі чардығы (тағларда хар хайылғаны), ағаа піс прай саринаң тимде поларға кирекпіс.
Хакасияның гражданскай арачыланысча, сағыбаан саайларҷа паза ӧрт полдыртпазынҷа хазна комитедінің кнезі Владимир Карамашев Ағбан суғның пус тығылызы поларынаң хорғыс ағылчатхан чирлерінде, Хубачар паза Абаза хыринда, чара чачырас тоғыстары толдырылғанынаңар искірген. Абазада сидіксіністер пар полған – анда 11 чирдегі тураның, ікі 2 квартиралығ тураның участоктары паза 4 дача пірігізі чирлері суға кірген. Че амды, эксперттер кӧрізінең, суғ тазарынаң хорғыс чоғыл, прай ағын суғларда пус азыл парған. Республикадағы прай гидротехническай пӱдіріглер сыныхтағда тудылчалар, диспетчер службазы хараа-кӱнӧрте тоғынча.
Ӧрт сығызарынаң хорғыстығ тусха тимненіс хоостыра муниципальнай пӱдіcтерде 388 патруль ӧмезі тӧстелген, чонға искіріг итчең система тимнелген. Аал-городтар ибіре чыл сай ӧрттең тоғыр минераллығ полосалар нааҷылалча, 255 муниципальнай пӱдісте ол тоғыстар амох толдырыл парған.
Хосхар айының 20-ҷі кӱнінең сығара Хакасияда ӧрттең тоғыр ӧнетін режим кирілген. Паза Владимир Карамашевтің искіриинең, чир-чайаандағы ӧрттер саны, ирткен чылдағы пу туснаң тиңнестірзе, пӱӱл 12 %-ке ас.
Хакасия пазы, муниципальнай пӱдістер пастарынзар айланып, суғ тазарынаң паза ӧрттер сығызарынаң палғалыстығ кирек оларның тӧреміл хайиинда поларға кирек тіп таныхтаан.
– Прай хорғыстар тузында чох иділерге кирек, – теен Валентин Коновалов.
Чыылығның паза пір ӧӧн сурии часхыдағы хыра тоғыстары полған. Хакасияның аал хонии паза ас-тамах министрі Сергей Труфанов ӧӧн тоғыстар сілкер айындағы ӱлӱкӱннер соонаң пасталар тіп искірген. Тиксі республикада 239800 гектар чир таарылар. Министрнің чооғынаң, пӱӱл тоңастығларны ӧскірҷең чирлернің улии 2000 гектарға ас полар. Ӧӧн сылтағ – хазнада тамах паазы тӧбін синде полғаны. Рапсха паза ах киндірге, тізең, паалар тӱспинчелер. Аннаңар аал хонииндағылар оларны 2,8 муң гектарға кӧп таарирлар.
Ідӧк яблах паза ӱӱҷік тамаа сала ас одыртылар осхас: 21 паза 30 гектарға. Сергей Труфановтың искіриинең, сылтағларның пірсі садығ сетьтері оларны албинчатханында. Ікінҷі сылтаа – республикада ӱӱҷік тамаан хайраллаҷаң пӱдіріг чох полғаны.
– Пӱӱнгі кӱнде аны пӱдіреріне Алтай аймаанда чир участогы пирілген, – чарытхан министр. – Инвестор энергетиктернең, коммунальнай структураларнаң чӧптезіглер ит салған, экспертиза тоғыстары апарылча. Анаң пӱдіріп пастирбыс, анда 10 муң тонна ӱӱҷік тамаан хайраллирға чарир.
Читкіҷе полбаза, хости ікінҷі ӱӱҷік тамаан хайраллаҷаң орынны пӱдірерге пӧгінчелер. Чир участогының улии андағ оңдайны пирчеттір.
Валентин Коновалов садығ сетьтерінең тоғысты ӧткін апарарға чахығ пирген – аал хонииндағылар ӱӱҷік тамаан сат полар ӱчӱн.
Хакасия правительствозы пу чыылығда ідӧк чол тоғыстарын ӱзӱрібіскен. Пӱӱл республикада 110 километр артиинаң чол тыхтал парар тіп кӧрілче. Пу тоғыстарға чол чыындызында 3,6 миллиард салковай салыл парған.
– Ирткен чылларда піс чолларны тыхтирынҷа, пӱдірерінҷе паза нааҷылирынҷа хомай нимес хаалағларнаң парғабыс, – таныхтаан Хакасия пазы. – Пӱӱнгі кӱнде пӧгін турча – ол хаалағларны хайраллап халары, нимені піс пӧгін салғабыс прай ит салары. Алынҷа хайығны контракттар идеріне саларға кирек. Прай тоғыстар планнар паза графиктер хоостыра апарылар ӱчӱн. Муниципалитет сыданминчатса, ол ахчаны пасхаларына, кем сыданча, ыс турарбыс.
Ідӧк Валентин Коновалов муниципальнай ӱлгӱлерге чоллардағы оймах-осхылларны чох идерінҷе тоғыстарны чапчаң апарарға пӧгін турғысхан. Кӱннер ол тыхтағ тоғыстарын апарарға оңдай пирчелер, че подрядчиктер кирек хаалағларнаң тоғынминчалар.
Халғанҷызын правительстводағылар «Городтағы осхас истіг оңдайлар тӧстирі» федеральнай программа муниципальнай пӱдістерде хайди чуртасха кирілчеткенін ӱзӱрібіскеннер. Піcтің республикада ол программаның ӧткін араласчызы Абаза город полча. Абаза пазы Валентина Филимонова министрлер кабинедіне пу программа хоостыра городта хайдағ тоғыстар толдырылғанынаңар паза пу чылға пӧгіннердеңер искір пирген.
Сом r-19.ru сайттаң
Автор :
Альберт Толмашов
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде