Соған таңмаа теерте атылған
26.04.2024
Хабарлар
![Соған таңмаа теерте атылған Соған таңмаа теерте атылған](/upload/iblock/cb1/vk4bpw4iwub3yva7phrshijnqlgqzs3x.jpg)
Хызыҷахтар охчаадаң таңма атчалар
Спорт. Ирткен неделяда Полтах аалда Истегі культура туразының спорт залында охчаадаң атарынҷа Асхыс аймааның азых марии ирткен
Охчаадаң атары – спорт кӧрімі, хайзынаң прайзына даа айғазарға чарир, кічігдең сығара улуғ частыға теере. Охчаадаң атарға ӱгренерге сидік нимес, пу спорт кӧрімінең кинектер дее айғасчалар, улуғ чидіглерге читчелер. Хазии уйан спортсменнерге килістіре охчааны паза хайдағ ырахтын атарын таллап аларға чарир.
Полтах аалда ирткен марығда 70 артиинаң кізі араласхан. Спортсменнер прай даа Хакасиядаң килгеннер, аннаң пасха, хонҷых Тува Республикадаң аалҷылар арға-мӧрійде араласханнар. Олар аймах кӧрімнерде чичең атарынҷа марығласханнар.
Пастап иң кічіг спортсменнер устарын кӧзіткеннер. Оларның піреезі пу спорт кӧрімінзер наа ла килген. Айселина Боргоякова охчаадаң атар секцияа пастағы чылы чӧрче. Пу марығ ағаа ікінҷізі.
– Мин кӧп чыл мини-футболнаң айғасчам. Тренер Юрий Ильич Аёшин мині охчаадаң атар секциязына чӧрерге хығырған. Амды ол мині ікі спорт кӧрімінҷе тимнепче. Охчаадаң атары кӧңніме уғаа тың кірче.
Евгения Тумоякова пу спорт кӧрімінең ӱс чыл айғасча. Амды ол 1-ғы разрядтығ спортсмен полча. Республика синіндегі марығда Евгения, таңма атып, 520 сан чыып алған. Аны хоостыра ағаа спорт разряды пирілген.
– Охчаадаң атары, минің кӧрізімнең, уғаа сіліг спорт кӧрімі, – таныхтаан Евгения. – Пастап иң кічіг спортсменнер, 2011 чылда паза аның соонаң тӧреен оол-хыстар 12 метр ырахтын таңма атханнар. Олар, 20-лер хати сығып, ӱзер соғаннаң атып, иң улуғ саннығ таңмаларға тееп парарға кӱстенгеннер. Кибірліг охчаадаң атарынҷа ооллар аразында сыйыхтығ орыннарны Тувадаң килген аалҷылар утып алғаннар. Хыстарның аразында Евгения Тумоякова 457 саннығ ікінҷі орынға турысхан.
2007 – 2010 чылларда тӧреен спортсменнер аразында кибірліг охчаадаң атарынҷа Азалия Топоева чиңісті холға кирген. Блоктығ охчаадаң атып, 1 орында – Айселина Боргоякова, ол 496 санны чыып алған. Наина Какаякова 486 саннаң 2 орынға турысхан.
2006 чылда тӧреен паза аннаң даа улуғ спортсменнер аразында блоктығ охчаадаң атарынҷа Сергей Тумояков кӱмӱс медальны холға кирген. Олох кӧрімде ипчілер аразында сыйыхтығ орыннарны Хакасия спортсменнері утып алғаннар. 1 орында – Дина Адыгаева, 2 орында – Наина Какаякова, 3 орында – Айселина Боргоякова.
Кинек спортсменнер 18 метр ырахтын атханнар. Классика охчаазынаң атарынҷа 2 орынға Иван Аёшин турысхан, ол 469 сан чыып алған. Блоктығ охчаадаң атарынҷа Алексей Боргояков чиңіс тутхан. Ол 559 саннаң марығны тоосхан. Дина Адыгаева блоктығ охчаадаң атарынҷа 559 саннаң чиңіс тутхан.
Марығ салтарларынҷа араласчылар спорт разрядтарының нормативтерін толдырыбысханнар. Чиңісчілер паза сыйыхтығ орыннарға сыхханнар грамоталар паза медальлар утып алғаннар.
Сом авторни
Автор :
Антон Чертыков
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде