Ах чарыхха тöреелек палаларның чуртазын арачылирына кöстелчеткен социальнай реклама Хакасиядағы городтарның орамаларында пастағызын на турғызыл сыхты.

Орыстарның тиксi тилекейдегi чон соборы (ВРНС) кӱстенiзiнең Хакасияда социальнай рекламалығ билбордтар паза баннерлер тимнелген. Оларда «Чуртас ал хал» психологтар фондының телефоны пирiлче, хайзынзар кинен харынап парған ипчiлерге, полызығ киректелчетсе, хараа-кӱнöрте айланарға чарир. «Iӌе полары – часка» сағысты искiрчеткен социальнай реклама Ағбанда паза Харатаста чон кöп хайынчатхан чирлерде хызылған.

Аннаң пасха, Хакасияда ипчiлер поликлиникаларына öнетiн афишалар тимнелген. Олар iдöк ам даа тöреелек харын хурчузындағы палаӌахтың чуртазын ал халарына кöстелче. Андағ афишаларны имнег учреждениелерiнде психологтарның паза имӌi-гинекологтарның кабинеттерiнде хыс саларлар.

Ипчiлер поликлиникаларындағы психологтарға иртiрiлчеткен теестегi семинар-тренингтер тузында специалисттерге чаӌында тимнелген материаллар тикке пирiлер. «Пала кöрiнер тузындағы ипчiлерге психология чöптерi» семинар Хакасияның хазых хайраллаӌаң министерствозы полызиинаң иртiрiлче.

Прай социальнай реклама пiр тööй оңдайлығ тимнелген, ол чахсы ла кирекке кöстелче. Паза иң ööнi – ол иркеӌектер чуртазын ал халарға полызар.