Наа мастерскойлар тӧстелче, специальностьтар азылча
29.05.2024
Статья
Асхыстағы 18 № училищенің студенттері
Абитуриенттер хайиина. Асхыстағы 18 № училищезер аймахтағы ааллардаң кӧп чиит оол-хыс ӱгренерге кірче. 2024-2025 ӱгредіг чылында пу профессиональнай организация тӧрт кӧстегҷе абитуриенттерні алар
Оларның санында ӱс профессия паза пір специальность. Профессиялар: «Мастер отделочных строительных и декоративных работ», «Электромонтёр по ремонту и обслуживанию электрооборудования», «Повар, кондитер». Оларны аларға сағынчатханнар училищеде ікі чыл ӱгренерлер. Ідӧк чииттерге «Техническое обслуживание и ремонт автотранспортных средств» специальность алып аларға чарир. Олар тӧрт чыл ӱгренерлер.
Училищезер абитуриенттер 9 класс соонаң алылчалар. Полған на кӧстеге 25 орын кӧріл парған. Ӱгредіг прай тикке, тӧлеп ӱгренеріне нинҷе-де ле орын полча. Ахчазы кӧп нимес, чылда ортымахти 30-ча муң салковай сых парча.
– Ӱгредіг чылы тузында хай пірее студенттер, ӱгренерге хынмин, парыбысчалар, оларның орныларына ахча тӧлепчеткеннерні алып алчабыс, – чарытча училище директоры Игорь Чебодаев.
Алындағы чылларда училищеде кӧп студент ӱгренген, общежитиеде прайзына орын чидіспинчеткен. Хайди чарытча Игорь Олегович, амды училищезер кіріп алғаннарға прайзына орын читче. Ағаа хоза, ПУ-да студенттерні иртен паза кӱнӧрте тикке азырапчалар. Чахсы ӱгренчеткеннер стипендия алчалар, хай піреезіне социальнай стипендия кӧріл парған.
Паза «Техническое обслуживание и ремонт автотранспортных средств» специальностьча ӱгренчеткеннерге училищеде «С» категорияа тикке ӱгреніп алар оңдай пар.
«Чиит профессионаллар» федеральнай проект хоостыра ирткен чылларда училищее субсидия позыдылған. Ағаа «Повар, кондитер» профессия алчатханнарға мастерской тимнелче.
– Амды піc кабинеттерні тимнепчебіс. Анда хайди даа вентиляция системазы тартылых, полда паза стенелерде плиталар тӧзелік, чарытхы, ізіг паза соох суғ тартылых поларға кирек. Анаң наа электроплиталар, пароконвектоматтар, холодильниктер, столлар паза даа пасха оборудование турғызылар. Наа мастерскойда «Повар, кондитер» кӧстегҷе ӱгренчеткеннерге «Профессионаллар» марыға паза сыныхтағларға тимненерге чахсы оңдай полар.
Аның алындағы чылларда піс пасха даа мастерскойларыбысты иптеп алғабыс, наа оборудование турғысхабыс. Амды ас-тамах тимнеҷең усха ӱгренчеткеннерге орын тимнеп алзабыс, полған на кӧстегнің позының иптіг мастерскойы полар. Олар прайзы хазна стандарттарына нандырарлар. Ол піске уғаа улуғ чидіг. Пістің палаларыбыс, пасха техникум-колледжтернің студенттері чіли, чахсы оңдайларда ӱгрензіннер. Ізенчем, наа ӱгредіг чылына піс прай тоғысты тоозып аларбыс, студенттер нааҷылалған мастерскойда ӱгреніп пастирлар.
Ідӧк Россияның просвещение министерствозы чарадиинаң, амды колледж-техникумнар студенттерге ӱгренчеткен профессия хоостыра ахча тоғынар оңдайлар тимнирге киректер. Аны хоостыра піс училищеде улуғ нимес шиномонтаж тӧстепчебіс. Кічіг вагончик тимнеп салғабыс, андар чарытхы тартып алғабыс, оборудованиебіс пар. Ол ідӧк наа ӱгредіг чылынаң тоғынып пастирына ізенчебіс. Анда автомеханикке ӱгренчеткен студенттер занятиелер соонаң тоғын турарлар.
Итсе-де, пістің студенттернің кӧбізі занятиелер соонаң даа тоғынчалар. Тоғыс ӱгредіге харығ полбинчатса, піс тее тоғыр нимеспіс. Олар Асхыстағы чон азыраҷаң кафе-столовайларда істенчелер. Чиис тимнепчелер.
Амғы чииттер пасха сағыс-кӧрістіглер. Олар асхынах тӧлепчеткен орынзар тоғынарға парарға хынминчалар, практика иртер орын тілепчетселер дее, ахча тӧлелчеткен орыннарны таллапчалар.
2025-2026 ӱгредіг чылында училище наа кӧcтег азар – Асхыстағы профессиональнай организацияда чииттерні «Бригадир, путеец» профессияҷа ӱгредерлер. Пу кӧстегҷе ӱгренгеннерге «Монтёр пути» квалификация пирілер. Таныхтирға кирек, пу профессияны Хакасияда пір дее профессиональнай ӱгредіг организациязы пирбинче.
ПУ-зар абитуриенттер ідӧк 9 класс соонаң кірерлер. Тиксі 20 пала алылар, ӱгренері – ӱc чыл.
– Пу кӧстегні піс тиктең аспинчабыс. Асхыс аймаанҷа тимір чол иртче. Ағаа хоза, ікінҷі линия пӱдірілче. Анда орындағылар кӧп істенчелер. Аннаңар пістің абитуриенттер пу кӧстегҷе ӱгренерге кірерлер тіп сағынчам. Диплом алып, профессияҷа тоғынарлар, – чарытхан 18-ҷі ПУ-ның директоры Игорь Чебодаев.
Сом Игорь Чебодаевти
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде
