Чииттерге алынҷа хайығ
29.05.2024
Статья
Чииттер политиказының министрі Евгения Майнагашева
Наа министерство. Россия президенті Владимир Путиннің чарадиинаң хазнаның регионнарында чииттер политиказының министерстволары тӧстелче. Пістің республикада андағ министерствонаң Евгения Майнагашева устап пастабысты
Евгения Валерьевна наа министерствоның пӱдізініңер паза пӧгіннерінеңер піснең ӱлескен.
– Амды пістің министерствода 13 специалист істенче. Ікі пӧлік – чииттер политиказы, экономика паза право.
Министерство ӱр ниместе тӧстелген дее полза, пӧгіннері паза кӧстеглері пілдістіг. Пістің чиит специалисттерібісті пасха регионнарда ӱгренген соонаң тӧреен чирінзер айландырарына паза оларның алған пілістерін мында чуртасха киреріне хайығ саларға пӧгінчебіс. Республикаа хыйға, пілістіг, ӧткін кізілер кирек нооза. Ағаа хоза, оол-хыстар ааллардаң парбазыннар тіп, оларға чахсы оңдайлар тимнирге кӱстенербіс.
Ідӧк министерство кӧп чарыдығлығ тоғыс апарар. Чииттер пілерге киректер, оларға республикада хайда чайаачыларын кӧзіт пирерге чарир. Полған на паланың кӱстіг сари пар, оларны орта чолзар кӧстирге кирек. Алынҷа хайығ салылар чииттернің тӧреен чир-сууна хынарға кӧніктіреріне. Пу кӧстегҷе улам кӧп мероприятие иртірілері кӧрілче. Ағаа хоза министерствоның хайиинда чииттернің культура паза спорт чуртазы полар.
Соонаң министерствоның специалисттері, муниципалитеттерҷе чӧріп, чииттер пірігістерінең тоғазығлар иртірерлер. Нимее ол кирек? Мындағ тоғазығларда піс, оол-хыстарнаң постарынаң чоох алызып, оларға ниме кирек полчатханын, сағыс-кӧрістерін піліп ал турарбыс. Піс оларға хабазарға тимдебіс, – тіпче наа министр.
Таныхтирға кирек, чииттер политиказының министрі Евгения Майнагашеваа пу ӱзінҷі организация, хайзынаң ол устапча. Пастағызы – Россиядағы ӱгренҷілернің чӧрімі. Читі чыл мының алнында Хакасияда ол аннаң устап пастаан, 2022 чылда «Движение первых» олғаннарның паза чииттернің тиксі Россия чӧрімінің кнезіне турғызылған, пӱӱл, тізең, опыттығ кізі Хакасия пазы Валентин Коноваловтың чарадиинаң чииттер политиказының министрі полыбысты.
– Тоғыс мағаа пілдістіг, опыт пар. Амды піс ӧменең стратегия планын тимнепчебіс, хайзының хоостыра піс килчеткен чылларда тоғынарбыс. Ағаа хоза, піс муниципалитеттерде министерствоның пӧліктерін азарға сағыс тутчабыс. Анда тоғынар специалисттерні ӧнетін ӱгредіг курстарына ызарбыс. Сағынчам, чыл тоозылғанҷа министерство пӱкӱлее тӧстел парар паза тоғыс пар сығар, – тіпче Евгения Майнагашева.
Сом Альбина Чистогашевани
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
