Музейлерні хайраллап халарға
26.06.2024
Хабарлар
![Музейлерні хайраллап халарға Музейлерні хайраллап халарға](/upload/iblock/9ee/1kllmevy4x5v415q6r9q89cn093f51if.jpg)
Хакасияның культура министрі Светлана Окольникова чоох тутча
Ӧӧркі Чӧп. Хакасияда муниципальнай музейлерні тилідерінҷе программа тӧстирге киректелчеткеннеңер чоох парған культураҷа эксперттер чӧбінің теестегі чыылиинда
Хакасияның Ӧӧркі Чӧбіндегі культураҷа эксперттер чӧбінің араласчылары ол программаны ідӧк республиканың 2030 чылға теере чуртас-экономика тилізі стратегиязына кирерге оңдай табарға чӧпнең сыхханнар.
Музейлер, Хакасияның ыраххы аймахтарының культура чуртазының кіні полып, орындағы чуртағҷылар паза туристтер хайиин тартчатхан орын полыбысчалар. Анда чуртағҷыларның чайаачы оңдайларын тилідерге, культуразын кӧдірерге полысчатхан кӧзідіглер, концерттер, лекциялар паза пасха танығлығ киректер иртірілче. Ідӧк ааллардағы тархын, искусство паза пасха наукаларның специалисттеріне тоғыс орыннары пирілче.
Че Хакасияның муниципальнай музейлерінің кӧбізі нааҷылағ киректепчелер. Тураларда тыхтағ тоғыстарын иртірерге, кӧзідіге сығарылған ниме-нооны нааҷылирға киректелче, тиріглерні, тізең – алыстырарға. Прай ол музей тоғызын иптіг апарарға пирбинче паза кӧрігҷілер хайиин тӱзірче.
– Хомзынысха, музейлернің чахсы оңдайлар полза даа, ис-пайын нааҷылирынҷа сидікcіністер пар. Музейлернің кӧбізіне нааҷылағ паза алызығлар киректелче. Музейлернің сидікcіністерін пірге пӧгерге киректелче, – таныхтаан «Хуртуйах тас» музейнің наука тоғынҷызы Леонид Горбатов.
Хакасияның культура министрі Светлана Окольникованың сӧстерінең, республикада культура учреждениелеріне хабазарға ахча позыдылча. Іди 2023 чылда «Туризм паза аалҷыларны удурлиры» национальнай проектче тигір алтындағы азых музейлерге кӧрігҷілерге истіг оңдайлар тӧстир пӧгіннең инфраструктураларын тилідеріне ахча пирілген. Че ол хабазығны алғыдарға паза республиканың прай музейлеріне тиксі кирерге киректелче.
– Тӧрт чыл аразына, 2021 чылдаң пасти, пістің музейлер тиксі 40 миллион азыра салковай тузалан салғаннар, аннаң андар кӱстіг проекттер тӧстирін узарадарға паза анзына ахча позыдарға пӧгін тутчабыс. Піс музейлерібіссер туристтернің кил парчатханын паза ниме сӧлирге тимдезін істесчебіс. Че ӧӧн пӧгін – музейлерні хайраллап халары, – чоохтаан Светлана Окольникова.
Хакасияның Ӧӧркі Чӧп депутады Оксана Разваринаның кӧрізінең, муниципальнай музейлерні тилідерінҷе пірге программаны чуртасха киргені техниканы нааҷылирға, ідӧк оларның хайығ тартчатханын чахсыландырарға, полызығларны алғыдарға паза аалларда наа тоғыс орыннарын тӧcтирге полызар.
– Хакасияда хаҷанох муниципальнай музейлерні тилітчең программаны тӧcтирінҷе сурығ пыс парған. Пӱӱл пірге программаны тӧстирге орай, че республиканың 2030 чылға теере чуртас-экономика тилізі стратегиязына хоза программаны кирер оңдай пар, – таныхтаан Оксана Разварина.
Эксперттер тоғызы салтарынҷа Хакасия правительствозына музейлерні хайраллирынҷа паза тилідерінҷе программа тимнирге чӧптирге чарадығ алылған.
Сом авторни
Автор :
Хакас Республика Ӧӧркі Чӧбінің пресс-службазы
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде