Кӧрігҷілер сіліг ариялар истіп алғаннар
26.06.2024
Хабарлар
Георгий Васильев, Александра Черпакова, Вячеслав Инкижеков паза симфоническай оркестр
Чайаачы иир. В.Г.Чаптыковтың адынаң Хакас филармониязының пайрамнығ 35-ҷі чайаачы сезоны махалығ концертнең чабылды
Филармонияның чайаачы сезоны чапсых мероприятиелерге пай полды. Полған на иир кӧрігҷілернің, чӱректерінде тирең іс артызып, сағыстарында ӱрге халар. Пайрамнығ чайаачы сезонның халғанҷы иирінде филармония пазох чуртағҷыларны морсымнығ концертнең хайхатты. Олар аймах хазналар композиторларының операларын паза сарыннарын истіп алғаннар. Сценада таныс паза прайзы хын парған ариялар, дуэттер чайылғаннар. Симфоническай оркестр паза «Каданс» хор илбек чайаачы устарның хит пол парған кӧг-ырларын толдырғаннар. Иирнің ӧӧн матырлары Москвадаң килген аалҷы Георгий Васильев паза Хызылчардаң килген Александра Черпакова полғаннар.
Таныхтирға кирек, пӧзік чайаачы устығ ырҷы Георгий Васильев Хакасияның сценаларында кӧп хати сарнаан, аннаңар пу концертте аның чайаачызына хын парған кӧрігҷілер илееде чыылыс парған. Георгий Васильев хайхастығ тархыннығ ырҷы паза музыкант полча. Ол кӧглепчеткен цыган Васильевтер родының тоғызын узаратча. Аның ағазының пабазы Иван Васильев саблығ «Цыганочканың» авторы полча. Георгийнің пабазы Николай Васильев Россияда саблығ цыган хорының устағҷызы полча.
Георгий Васильев Москвадағы В.Поповтың адынаң хор искусство академиязын тоосхан. Пір туста хор ӧмезінең устаан паза Мосфильмнең хада-пірге тоғынған. Пӱӱнгі кӱнде ол Россияда саблығ паза улуғ кирексініснең тузаланчатхан тенорларның пірсі полча паза «Новая опера» театрда ырлапча. Аны тиксі тилекейдегі театрлар чайаачы иирлерге паза ойыннарға тӧреміл хығырчалар.
Хакас филармониязының ӱс час парған чайаачы иирі ікі чардыхха чарылған. Пастағы чардығында Георгий Васильев симфоническай оркестрнің дирижёры полған. Концерт В.А.Моцарттың «Свадьба Фигаро» операзының увертюразынаң азылған. Арияларны филармонияның ырҷылары Артур Марлужоков, Наталья Гилёва, Дарья Белозёрова, Анастасия Сеслер хайхастығ толдырғаннар.
Концерт тузында операларның мындағ ӱзіктерін истіп алҷаң оңдай полған: композитор В.А.Моцарттың «Дон Жуан» операзының ӱзіктерін, композитор Джузеппе Вердинің «Риголетто» операзының Джильданың ариязын. Илбек композитор Сергей Рахманиновтың консерваторияны тоосхан дипломнығ тоғызы сценаларда чӱс чыл азыра истілче. Хакас филармониязында ідӧк аның «Алеко» саблығ операзының ӱзігі толдырылған. Композитор Николай Римский-Корсаковтың «Ночь перед Рождеством» операзының Оксананың ариязын Хызылчардағы опера театрының артизі Александра Черпакова ніске ӱнінең кееркестіг ырлаан. Саблығ учёнай-химик Александр Бородин паза нанҷылары музыка аның олаңай ӱтертізі тіп санааннар. Че тус ол илбек ӱтертіс полғанын кӧзіткен. Концертте композитор А.П.Бородиннің «Князь Игорь» операзының половецкай хыстарның хорын «Каданс» хор чӱрексіністіг толдырған.
Саны чох опера арияларының аразында хаҷан даа иң чахсылары пар поладыр, оларның сілии чӱзерлеп чыл успинча. Антракт соонаң композитор Пётр Чайковскийнің «Евгений Онегин» операзының Ленскийнің ариозозын Москвадаң килген аалҷы Георгий Васильев морсымнығ толдырған. Кӧрігҷілер аны истіп, «Браво! Супер!» хысхырып, ізіг айа сабызынаң морсымнығ ӱнніг ырҷыны сценадаң позыдарға хынминчатханнар.
Таныхтирға кирек, чайаачы иирнің ікінҷі чардығында филармонияның аалҷылары Георгий Васильевнең хада Александра Черпакова, сценазар теестезіп сығып, сіліг сарыннарын сыйлааннар. Полғанын на кӧрігҷілер улуғ хайхаснаң удурлааннар. Ол арада симфоническай оркестрнең Хакасияның чон артизі, республика искусствозының саблығ деятельі Вячеслав Инкижеков устаан. Соонаң Москвадаң паза Хызылчардаң килген артисттер дуэтнең сарнааннар, анзынаң залға чыылысхан чонны улам ӧріндіргеннер.
Сом Хакас филармониязыни
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
