Россия спортсменнеріне хабазып
26.06.2024
Хабарлар
Чарғыҷы Андрей Домогашев (оң саринаң) Just Dance дисциплинаҷа марығ хайди парчатханын сыныхтағда тутча
Чӧрім. 21 хандыхта Хакасия тиксі Россиядағы Олимп кӱнін таныхтаан. Чӧрімге 1500 спортсмен хозылған
Политика харығ полча
Олимпиада – полған на спортсменнің сағынған сағызы. Анда аралазарға пӧгініп, оол-хыстар кічігдең ала марығласчалар, устарын таптапчалар. Пӱӱлгі Олимп ойыннары Хакасияа танығлығ. Арға-мӧрійде чир-суғҷыбыс, чоннар аразындағы класстығ спорт узы Наталья Малышева узын сынирға кирек. Хакас абахай ипчілер кӱрезінең 6-ҷы класстаң айғасча. Аны 2016 чылдох Олимпиадаа ызарға пӧгінгеннер. Че Наташа олимп лицензиязын ут полбаан. Россия спортсменнеріне политика матап харығ полча. Оларға аймах-пасха сыныхтағларны иртерге килісче. Кӧзідімге, спорт кӱрезінде пір хазна 18 кізіні арға-мӧрійге сығарарға оңдайлығ. Пістің оол-хыстар 16 лицензия утып алғаннар. Чоннар аразындағы Олимп комитеді (МОК) 10 на кӱресчее, ол санда Наталья Малышеваа, чарадығ пирген. Олимп ойыннарында иң кӱстіг cпортсменнер – Заурбек Сидаков, Заур Угуев, Абдулрашид Садулаев – аралас полбастар. Надежда Соколованаң Ханум Велиеваа ідӧк чол чабысханнар. Велиева Хызылчардаң, ол Россияның саблығ тренері Лидия Карамчакованың ӱгренҷізі.
Спорт кӧрімнерінеңер чоохтаза, Россия спортсменнері велоспортча, батут сегірістерінҷе паза спорт кӱрезінҷе марығларда аралазарлар. Улуғ тенниснең айғасчатханнар хозыларға киректер. Салтарында нинҷе кізі пас меетке сығарын Олимп ойыннары алнында ла піліп аларбыс, неке. Пірее федерациялар, хатығластарнаң чараспин, спортсменнерге Олимпиадаа таллағны иртерге чаратпааннар. Андағ оңдайнаң, 20 артиинаң спорт кӧрімінҷе марығлар пістің оол-хыстар чох иртерлер. Ол санда боксча, спорт паза хоос гимнастикаҷа, суғҷа чӱзерінҷе, ниик атлетикаҷа, фехтованиеҷе паза пасхазынҷа. Россияның спорт кӱрезінҷе федерациязы Олимп ойыннарында аралазарынаң ідӧк тоғыр полыбызар тіп чочыныс полған. Че пірігістегілер чир-суғҷыларына хабазарға чаратханнар. Итсе, Наталья Малышева чіли, МОК-тың чарадиин алып алған кӱресчі хыс Вероника Чумикова Парижсер парарға ынабиныбысхан. Хайдағ сылтағ? Чумикова кинеп партыр, Олимпиадаа теере хазыхтанып аларға маңнанмас.
Тиксі Россиядағы Олимп кӱні 1990 чылдаң иртірілче. Пӱӱл чӧрімнің ӧӧн пӧгіні – прай спортсменнерге хабазары. Ізенерге халча: МОК сағыс-кӧрізін алыстырар, политика пӧзік чидігліг спортха харығ полбас.
Спорт фестивальы
Мероприятиедеңер чоохтаза, ол оңдайынаң фестивальға тӧӧй полған. Араласчыларның ӧӧн чардығы – спорт школаларының ӱгренҷілері. Оларзар Хакасияның физическай культура паза спорт министрі Сергей Кочан, Ӧӧркі Чӧп депутады Андрей Алеев паза республиканың Олимп чӧбінің устағҷызы Пётр Макарчук айланғаннар. Сергей Владимирович чооғында Наталья Малышева Парижтегі кибіске сығарына ізеніснең ӱлескен. Ікі Олимп ойынының араласчызы Пётр Макарчук чыылған чонға чуртаста даа, спортта даа тӧдір пазынмасха, посха киртінерге, чиңістер тударға алғаан.
Спорт фестивальында он артиинаң ачых тоғынған. Пірcінде палалар панна-футболда кӱстерін сынапчатханнар, ікінҷі ачығында спортсменнерні хоббихорсинг сахтаан. ГТО площадказы хаҷан даа улуғ кирексіністе. Тасхар 30 градус ізіг турған, кічіглер паза саарбахтар ағаа пір дее кілебееннер. Спортсменнер нооза. Тиксі Россиядағы Олимп кӱнін Хакасияда 2022 чылдаң алғым таныхтап пастааннар. Пӱӱл программазар пастағызын на фиджитал-спортча марығлар кирілгеннер. Аның оңдайларынаң чарғыҷы Андрей Домогашев таныстырған. Ол теен:
– Фиджитал-спорт компьютер паза спорт ойыннарын піріктірче. Кӧзідімге, фиджитал-футболда араласчылар пастап чазыда ойнапчалар, анаң – компьютер кистінде. Иң кӧп сан чыып алған ӧме чиңіc тутча. Прайзы футбол ойнирға хынминча, пу сылтағнаң Just Dance дисциплинаҷа марығ иртірчебіс. Ол «Ритм-симулятор» спорт кӧрімінзер кірче. Спортсмен, компьютерзер кӧріп, теелбектенерге кирек. Аның холында геймпадтар. Оларның полызиинаң программа араласчы орта теелбектенче бе тіп сыныхтапча, баллар пирче. Чииттер хынып араласчалар.
Кибір хоостыра спорт пайрамында кізілер сӧбіренең араласчалар. Ӱгретчі Диана Бурнакова – ӱс паланың іҷезі. Улии Роберт 5-ҷі классты тоос салтыр, Викторияа 11 час, Александра пӱӱл кӱскӱзін 3-ҷі классха парар. Прайзы спортнаң айғасчаттыр. Итсе, спорт пайрамында Вика ла араласхан. Іҷезі чоохтаан:
– Оолғым паза очы хызым шахмат ойнирға хынчалар. Ікізі дее секцияа чӧрче. Чидіглері пар. Викторияны волейбол секциязына пазындыр саларға сағынғам. Пілчем, Хубачарда Ирина Петровна Золотухина маңнаныстығ тоғынча. Ағбанда «ЦСКА-Хакасия» спорт школазының волейболҷа cекциязы тоғын сыхханда, пала андар чӧр сыххан. Ол пір чыл чарым волейбол ойнапча. Тренировкалар неделяда пис хати иртчелер. Палаларға хада хонғаным чахсы кӧзідім полча. Чиит туста кӱрескен, шахмат ойнап полча. Олғаннарның хылии тыып парыбызар тіп ізенчебіс. Тренерлерге улуғ алғыс. Прай кӧңнілерін салып тоғынчалар.
Че фестивальның ӧӧн матырларына 6 – 12 айлығ иркеҷектерні санирға чарир. Олар ӱмектеп марығласханнар. Спортсменнернің пірсі – Егор Есин. Хайди таныхтаан оолахтың іҷезі Юлия Колмакова, ол марығдаңар интернет пастыра піліп алған. Ол, паланы азах меетке кӧстир пӧгіннең, ойнаҷахты ӧнетін алып алтыр. 9 айлығ Егорның ӱчӱн Юлияның чееннері «ағырғаннар». Сизінгенде, марығлазарға иркеҷектің кӧңніне кірген.
Олимп ойыннарынзар айланза, марығлар от айының 20-ҷі кӱнінде пасталарлар. Анда пістің Наташа Малышеваа оң полар тіп ізенербіс.
Сом Валерия Тамбовцевани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
