Прай чиңістіг орыннар сыдамах хылыхтығ спортсмен оолахти
26.06.2024
Статья
Виктор Чаптыков
Кӱн матыры
Пӱӱн піс спортсмен оолах Виктор Чаптыковтаңар чоохтап пирербіс. Ол Асхыс аймаандағы Пуланнығ кӧл аалда Александр Климентьевич паза Марина Васильевна Чаптыковтарның кӧп палалығ ынағ паза кӱстенҷік сӧбірезінде тӧреен. Амыр хылыхтығ, че олох туста ӧткін оолах пӱӱл 7 классха сыхты.
Виктор 3 класста грек-рим кӱрезіне чӧр сыххан. Андада Пуланнығ кӧл аалзар чиит тренер Эдуард Петрович Барашков, сӧбіре тӧстеп, чуртирға, істенерге кӧс килген. Алында оолағастарға спорт секциялары иртірілбинчеткен полған. Кӱрес секциязы азылғандох, Виктор пастағы кӱннең сығара андар хынып чӧр сыххан.
Пастағы марығларға чӧрчеткенде, Витя тың чӱрексіҷең. Че, андағ даа полза, тіспен тренировкалар чахсы салтарларға ағыладыр, ӱс чыл аразына оолахтың медаль-кубоктары толдыра.
Пастап Виктор школа алай аал чӧбі иртірчеткен ниик атлетикаҷа марығларда араласчаң. 2021 чылда «Кросс нации» чӱгӱрісте, 9 – 12 частығ оолахтарнаң чарызып, азах меетке прайзынаң пурнада читкен. Аның ӱчӱн аал чӧбі пазы полған Николай Васильевич Чебодаев ағаа грамота читірген.
Анаң тренер Эдуард Барашковтың холында грек-рим кӱрезінің микелерін ӱгреніп, пик иде таптап, оолах саңай кӱрес марығларына чӧр сыххан. 2022 чылда, милицияның улуғ лейтенанты Николай Николаевич Доможаковтың хумартхызына чарыдып, Ағбан пилтірі аймаанда иртірілген азых турнирде Виктор Чаптыков кӱмӱс медаль утхан, пазағы чылда олох марығда алтын медальға чидінген.
2022 чылның сілкер айында Виктор Илбек Чиңістің 77 чылына чарыдылған Асхыс аймаа синіндегі марығда алтын медаль холға кирген. Улуғ хырласта СССР-ның спорт узы Семён Самуилович Мамышевтің хумартхызына чарыдылған Асхыс аймаа турнирінде оолах пастағы орын алған. Іди аның грек-рим кӱрезінде пастағы чидіглері пасталған.
2023 чылда Чыл пазы ӱлӱкӱнде Виктор, хакас спорт кӧрімнерінде аралазып, сыйыхтар алған. Ол армреслингте, кӱзін сынап, ІІ орын алған. Хазых ойында ідӧк ІІ орын холға кирген. «Ағаснаң тартыс» марығда чапчаң оолах, прайзын утып, І орынға сығып алған.
Олох чылда Виктор Чаптыков ниик атлетикаҷа марығларда чиңісчі полыбысхан, І орын аниох пол парған. Пуланнығ кӧл аал чӧбіне кірчеткен аалларның кічіг чуртағҷылары аразындағы грек-рим кӱрезінде, ӧткін аралазып, Виктор пазох І орынны холға кирген. Кибірге кір парған марығда оолах Соох апсахтың сыйиин утып алған.
Спортсмен оолахтың сыйыхтары
Спортнаң тирең айғас сыхханда, Виктор «Серебряный ключ» спорт лагерьінзер чыл сай чӧрче. Анда кӧп нанҷы таап алған. Пылтыр ол олған лагерьінде арғыстарынаң хада, «Хулиганы» команда тӧстеп алып, пейнтболҷа пасхаларын хыра утханнар.
Асхыс аймаанда саарбахтар аразындағы грек-рим кӱрезінің первенствозында араласханда, алтын медаль пазох Викторни пол парған. Ідӧк оолах Абаза городта паза Полтах аалда ирткен марығлардаң І орыннығ айланған.
Дмитрий Амзараковтың хумартхызына чарыдылған республика синіндегі турнирде матыр оолах, ІІІ орынға турызып, Хакасияның физическай культура паза спорт министрі Сергей Кочанның холынаң грамота алған. Ідӧк ол Хакасияның первенствозында ІІ орынға сығып алған.
Пылтыр Таштып аймаандағы Пыдырах аалда СССР-ның спорт узы, Россияның саблығ тренері Геннадий Султрековтың хумартхызына чарыдылған грек-рим кӱрезінҷе марығ ирткен. Анда Виктор Чаптыков кӱмӱс медаль утхан. Пӱӱл олох марығда, прайзын хыра утып, алтын медальға чидінген.
Кӱреснең айғас сыхханда, оолах чыл сай Минсуғ городсар Илбек Ада чааның Чиңізіне чарыдылған марығларға чӧрче. Пылтыр ол андартын хола медальлығ айланған, пӱӱл ідӧк хола медаль утып алған. Ирткен чылда Илбек Чиңістің 78 чылына чарыдылған «Кӱрес» марығда иң чахсы техника ӱчӱн грамотаны Виктор Чаптыковха Ӧӧк пилтірі аал чӧбі пазы Н.Н.Спирин читірген.
Пӱӱл Краснотуранскта «Русич» спорт ӧргезі азылғанда, Хызылчар крайының паза Хакасияның спортсменнері илееде чыылыс парған. Виктор Чаптыков анда ідӧк араласхан. Ол, позынаң тиң кӧдірімніг оолахтарнаң харбазып, ІІІ орынға сыххан.
Часхызын хосхар айында Асхыстағы С.З.Карамчаковтың адынаң спорт школазында Илбек Чиңістің 79 чылына паза Асхыс аймааның пайрамнығ 100 чылына чарыдылған марығ ирткен. Виктор Чаптыков, анда прайзын утып, пазох алтын медальның ээзі полыбысхан.
Таныхтирға кирек, Хакасияның физическай культура паза спорт министерствозы иртірчеткен Хакасияның первенствозында оолах ікі чыл изере чемпион полыбысхан. Іҷе-пабазы оолахтары Хакасияда чемпион пол парғанына матап хайхааннар, ам даа ӧрінчелер.
– Ағбанда Витянаң пасха тренер айғасча, Юрий Альбертович Боргояков. Ол оолаамны 2-3 неделяа сборларға сыбыра ал чӧрче. Ам палам Таштып аймаандағы «Серебряный ключ» спорт лагерьінде тынанча. Андартын айланза, Юрий Альбертович аны Шира аймаандағы Пілӧ кӧл хазындағы спорт лагерьінзер тренировкаларға апарар. Анда тиксі Россиядаң спортсменнер чыылысчалар.
Витя спортха саңай сабыл парған. Ол кічіг класстарда чахсы ӱгренҷең, «4-5»-тер ле алҷаң. Кӱреснең айғас сыхханда, ӧӧн ӱгредии сала уйан пар сыххан, – чоохтаан іҷезі Марина Васильевна.
Кӱрестең пасха, Виктор ідӧк футбол чахсы ойнапча. Нанҷыларынаң хада, школада чыылызып, мерчік соонҷа чӱгӱр чӧрчелер.
Хайди ӱстӱнде таныхтаабыс, оолах кӧп палалығ ынағ сӧбіреде ӧсче. Тун пиҷезі Валерия Ағбанда чуртапча, сӧбіреліг. Тимур харындазы ідӧк постаң оол, Ағбандох чуртапча, пӱдіріг киреенең айғасча. Алексей аҷазы 9 классха сыхты, Асхыстағы школада ӱгренче. Анаң Викторның ікі хыс туңмаҷағы парча. Эвелина 6 классха, Алина 3 классха сыхтылар. Чайаачы хызыҷахтар чахсы хоостапчалар, сіліг тоғыстарын «Хола пырғыҷахха» ысчалар.
Оолах, іҷе-пабазына полызып, ибінде хайынарға маңнанча: иирде хойларны удурлапча, чайғызын ӱӱҷік суғлапча, пуртах оттарны чулча, одың чарча. Сӧбіренең Пуланнығ кӧл хазынзар тынанарға чӧрчелер.
Викторның іҷезі палаларын кізілерге паарсах хайарға, улуғ частығларға полызарға ӱгретче. Аннаңар оолах нанҷыларынаң хада аалдағы пір ууҷаа полызарға ибінзер сыбыра чӧрчелер: суғ тазып пирчелер, одың чар пирчелер, чиис аларға садығ туразынзар пар килчелер. Тасхар изі чохтаныбысхан кізізер хаҷан даа полызығ пирерге пастыр турыңар тіп ӱгреде чоохтапча иркелеріне Марина Васильевна. Палалары іҷе кізінің чооғын чахсы исчелер, аның хоостыра тудынчалар.
Сомнар сӧбіре архивінең
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
