Пайрамнар «чылтызағы»
26.06.2024
Статья
![Пайрамнар «чылтызағы» Пайрамнар «чылтызағы»](/upload/iblock/35f/cxbggm2l5z30as7nvw0owtbgyavead11.jpg)
Анара Субракова
Чайаачыларыбыс
Анара Субракова «Час ханат» олған студиязының хызыҷахтарынаң хада аймах чайаачы иирлерде удаа сарнапча. Аны республика пайрамнарындағы сценада кӧрерге чарир. Пӱӱл хызыҷах 3 классха сыхты. Ол Ағбандағы 29№ школада ӱгренче. Пылтыр «Час ханат» студиязар чӧріп пастаан.
– Хызым, «Варенька» олған садына чӧрчеткенде, 2021 чылда «Час ханат» марығда позының номинациязында пастағы орын алған. Ол композитор Павел Михайлович Боргояковтың «Хозанах» хакас сарынын толдырған. Аны орта сарнирға позым ӱгреткем, – чоохтаан іҷезі Карина Львовна.
Пір чыл чарым ирт парғанда, Карина Субраковаа «Час ханат» олған студиязынаң сығдыратханнар, хызыҷахты сарнирға ӱгренерге чӧрзін тіп хығырғаннар. Андада Анара 1 класста ӱгренчеткен. Іҷезі чаратхан. Чоохчыл хызыҷах, студиязар чӧріп, хысха тус аразына позына наа ӧӧрелер оой таап алған.
– Анара ідӧк Ағбандағы музыка школазынзар чӧрче. Хызыҷаам 1 класста ӱгренчеткенде, хыныға ла музыка школазынзар пар килгебіс, анда тимнегліг курстар пар тееннер. Пастап андар чӧргізіп аларға сағынғам. Пір урокка пар килгенде, ӱгретчі сығдыратхан, ноо сірер тимнегліг курста пір чыл чідірерзер, піс хызыҷахты 1 классха алчабыс теен. Іди Анара хор пӧлиинде ӱгренче, – ӱлесче Карина Субракова.
Школаа наа ла чӧр сыхханда, іҷезі Анараны чолны орта кизерге, лифтнең тузаланарға прай ӱгрет салған, че олох туста, телефоннаң сығдырадып, хызыҷаан сыныхтап турған. Амғы туста Анара артист чуртазынаң чуртирға кӧнік тее парған. Ӧӧн паза музыка школаларындағы уроктарға пар киліп, «Час ханаттың» репетицияларына маңзырапча. Студияда аны Хакасия искусствозының саблығ деятельі Татьяна Алексеевна Маслова сарнирға кӧніктірче. Ол вокалҷа кӱстіг ӱгретчі паза кӧстегҷі полча.
Анара улуғ сценазар «Часхы» сарыннаң сых киледір. Пасха ырларны ансамбльнаң хада толдырча. Чайаачы ӧме ӧӧнінде Хакасия искусствозының саблығ деятельі, композитор Игорь Фёдорович Боргояковтың сарыннарын сарнапча. Чағдапчатхан Хакас Республика кӱнінде Анара Хакасияның чон артизі Артур Марлужоковнаң хада «С чего начинается Родина» сарыннаң чон алнынзар сығарлар. Пылтыр Республика ӱлӱкӱнінде Пастағы май ачығындағы сценада чайаачы хызыҷах «Час ханаттағы» ӧӧрелерінең хада Т.А.Маслованың «Хакасия» сарынын сарнаан. Анара ідӧк Ағбандағы ипподромда иртірілген Ӱртӱн тойы пайрамда ырлаан. С.П.Кадышевтің адынаң чон чайаачызы кіні концерттер иртірзе, хызыҷах анда тӧреміл араласча.
Анара ибінде музыканаң кӧп айғасча, фортепианонаң ойнапча. Пу кӧг тириин ағаа тай ууҷазы Валентина Гавриловна паза тай ағазы Лев Леонидович Субраковтар сыйлап пиргеннер. Олар Асхыс аймаандағы Индіркі Тӧӧ аалда чуртапчалар. Пархаҷахтары чайаачы чолҷа парчатханына ӧрінчелер, постарыох хызыҷахха сцена костюмнарын тіктір пирчелер.
Хызыҷахтың іҷезі Карина Львовна чахсы сарнапча, ол Наталья Семёновна Бурнакованың «Хағба» ансамбльына чӧрче. Анараның пабазы казах чоннаң сыххан. Ол, тізең, тӧреен чир-суунда, Казахстанда, музыка студиязын тутча, уc кӧгҷі полча. Іди хызыҷах чайаачы саринаң іҷе-пабазына кӧктеп парған.
– «Хағба» ансамбльнаң хада Ӱc чул паза Индіркі Тӧӧ аалларзар концертнең чӧргенде, Анараны хада алып алғам. Ол, позының сарыннарын сарнап, программабысты пайыт пирген, – теен іҷезі.
Маң тус полза, Анара аймах сіліг кип-азах хоостирға хынча паза кӧклӧлеріне костюмнар тікче, дизайнер поларҷыхпын тіпче. Иб аразында іҷезіне хайынарға полысча. Чайғызын Индіркі Тӧӧ аалда тай ууҷазында паза тай ағазында ааллапча. Анда ӱӱҷіктегі пуртах оттарны чуларға, ідіс-хамыс чууп саларға, таңағастарны азырирға, пызоларны сӱр килерге сыданча. Аалда ідӧк ӧӧрелер тапхлап алған, иирде футбол ойнирға чӧрчелер.
Анараның іҷезі Карина Львовна республиканың олған библиотеказында чир-суғ ӱгренҷең пӧлиинде істенче. Библиотекадаң чапсых кинделер алып, ибінде хызыҷаанаң хада хығырчалар, анаң ол киндені ӱзӱрчелер. Іди швед писатель Астрид Линдгреннің паза армян писатель Наринэ Абгарянның кӧп киндезін хығыр салғаннар. Анараа ӧӧнінде чуртаста тоғасчатхан киректердеңер кинделер кӧңніне кірче.
Сом сӧбіре архивінең
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде