Полған на секунда ӱчӱн харбазығ парған
28.06.2024
Хабарлар
Ярослав Яркин Хакасияа тӧрт медаль ағылған
Спорт. Пу наада Ағбан «Сибирь Кубогы» суғҷа чӱзерінҷе марығны удурлаан. Арға-мӧрійде 600 артиинаң саарбах узын кӧзіткен
Пас меетте – наа тӧл
Сибирь Кубогы – кибірліг марығ. Ол нинҷе-нинҷе чардыхтаң пӱтче. 18 – 20 хандыхта Ағбанда аның І чардығы ирткен. Пас меетке 10 регионның, ол санда Бурятияның паза Луганск Чон Республиказының спортсменнері сыхханнар. Хакасия ӱчӱн Ағбанның, Саяногорсктың паза Абазаның саарбахтары турысханнар. Турнир араласчылары – 11-13 частығ паза 14-15 частығ ӱгренҷілер.
Турнир пасталғандох, тренерлернің паза кӧрігҷілернің пір ле сурығ: олғаннар хайди чӱзібізерлер ни? Халғанҷы чыллар республикаа медальларны Егор Ваземиллер, Диана Мирошниченко, Иван Косьянов ағылҷаңнар. Че олар амды пӧзік устығ спортсменнер аразында кӱстерін сынапчалар. Наа тӧл позын турыстыра кӧзіт полар ба? Итсе, пӱӱл чидіглернең Ярослав Яркин ӧріндірче. 8 класстың ӱгренҷізі Сибирь первенствозында ӱс медаль холға кирген: ікі кӱмӱс паза пір хола. Ағаа ізенербіс. Чоохтирға кирек, Сибирь Кубогы ікі оңдайлығ марығ чіли ирткен. Андағ арға-мӧрійде спортсменнерге пір оңдайнаң, че аймах дистанцияларда чӱзерге киректелче. Полған на марығда олар саннар чыыпчалар. Иң кӧп сан чыып алған спортсмен чиңіс тутча. Ідӧк программада эстафеталар полғаннар.
Марығ киречілеен: суғҷа чӱзерінде наа «чылтыстар» пар. 14-15 частығларның аразында сыйыхтығ орынға сыххан Ярослав Яркин. Саарбах пос оңдайлығ стильде (100+200) паза комплекс чӱзерінде (200+400) кӱзін сынаптыр. Пастағы дисциплинада ол чиңіс тутхан, аның 1174 сан. Комплекс чӱзерінде Ярославтың хола медаль. Яркин Ағбаннаң, кӧп палалығ сӧбіреде тӧреен. Спортсмен суғҷа чӱзерінең читінҷі чылы айғас парир. Аның тренері – Сергей Вадимович Бережной. Ярославтың арғызы Никита Логинов брасста (100+200) ӱзінҷізі полыбысхан. Кічіглердең Артём Тетюхинні махтирға кирек. Саяногорсктың чуртағҷызы брасста (100+200) алтын медальны утхан, комлекс чӱзерінде (200+200) – хола медальны. Хызыҷахтардаң Елизавета Лайкованы таныхтирҷыхпыс. Лиза, баттерфляй оңдайынаң (50+100) чӱзіп, азах меетке ӱзінҷізі читтір.
Иң хынығ марыға эстафеталар саналчалар. Аның тузында кӧрігҷілер ӱннеріне айабин хысхырчалар. Ағбандағыларның паза саяногорсктағыларның салтарлары тӧӧй. Полған на школа ікілер хола медаль утып алтыр. Ниме чапсытхан? Алында пістің спортсменнер, ӧӧнінде учада чӱзіп, сыйыхтығ орынға сыхчаңнар. Амғы турнирде, тізең, Хакасияның пу ла стильде медальлар чох полған.
Чир-суғҷыбыс Сергей Астанаев чазы хоостыра Сибирь Кубогында араласпаан. Пӱӱл кӱскӱзін ол 10-ҷы классха парар. Аның сағынған сағызы – Россияның спорт узы нормативін толдырыбызары. Алында Сергей ӧӧнінде комплекс чӱзерінде кӱзін сынаҷаң, амды ӧӧн дисциплиназы – брассты 200 метрге чӱзері. Саарбах ӱртӱн айда Киргизиязар сборларға пар килерге, анаң Сибирь мариинда аралазарға пӧгінче. Арға-мӧрій Иркутскта иртер.
ЛНР-ның ӧмезі
2023 чылның сілкер айында Хакасияның паза Луганск Чон Республиказының аразында чӧптезіг иділген. Аны хоостыра пістің республика ЛНР-ның Свердловск аймаанаң пик палғалыс тутча. Іди республиканың спорт организациялары, лугансктағыларға полызып, мерчіктер, cуғҷа чӱзерінең айғасчатханнарға тиріг, спорт кип-азаан ыcханнар. Улуғ хырласта Хакасияның паза ЛНР-ның киберспортсменнерінің аразында «Ынархас тахтазы-2023» онлайн-марығ ирткен. Пӱӱл, тізең, Свердловсктың ӧмезі Сибирь Кубогында араласты. Команданаң устаан СССР-ның спорт узы, саблығ тренер Галина Охрименко.
Галина Михайловна марыға ӱгренҷілерін Виолетта Гайдачукнаң Андрей Бурмистровты сығарған. Виолетта баттерфляйда (100+200) узын кӧзіткен, Андрей – брасста (100+200). Турнир салтарлары ӧріндірче. Хызыҷах 18 кізінің аразында пизінҷі орынға сыххан, Андрей 50 спортсменнің аразында – 31-ҷі орынға. Галина Охрименко сағыстарынаң ӱлескен:
– Сибирьде суғҷа чӱзерінҷе кӱстіг школа полтыр. Олғаннарның узы пӧзік, полған на секунда ӱчӱн харбазығ парған. Ағбандағы бассейн кӧңніме кірген. Улуғ, чарых, прай нормативтерні толдырыбызарға, чоннар аразындағы марығларға тимненерге чарир. Мында ӱгренҷілерім хай-хай чахсы чӱзібіcкеннер. Позым «Шахтер» спорт комплексінде істенчем. Ол Свердловск городта орныхча. Піcтің бассейн хаҷанох тузаланысха кирілген. Суғҷа чӱзерінең 350 пала айғасча. Полған на тренернің ікі-ӱс ӧме.
Ағбанда піске чахсы оңдайлар тӧстееннер. Олимп резерві училищезінде (техникумында) чуртаабыс. Тун пайрамда, Сойан-Сус ГЭС-та пол килгебіс, орындағы спортсменнернең хада тиксі Россиядағы Олимп кӱнін таныхтаабыс. Ізіге сыдазарға сидік арах полған. Луганскта 30 градус ізіг удаа поладыр. Че кӱн пасха ізітче, таң. Марыға хығырған паза чылығ удурлаан ӱчӱн Хакасияның спорт министерствозына улуғ алғыс. Сибирь Кубогында пазох аралазарына ізенчебіс.
Сом суғҷа чӱзерінҷе спорт школазының архивінең
Автор :
Майя Кильчичакова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде