Оларның сылтаанда Хакасиядаңар пасха хазналарда даа пілчелер
03.07.2024
Хабарлар
«Чыл экспортёры-2023» марығның чиңісчілері паза сыйыхтығ орынға турысханнар
Сыйыхтас. Хакасия правительствозының туразында «Чыл экспортёры-2023» марығның республика синінде чиңіс тутханнарны паза сыйыхтығ орыннарға турысханнарны чеестееннер
Пайрамнығ тоғазығны Хакасия пазы Валентин Коновалов асхан:
– Пӱӱн позының тӱзімніг тоғызынаң, кӱстенізінең, талантынаң республикабыстың экономиказына улуғ хозым итчеткен кізілернің чидіглерін таныхтапчабыс. Экспортнаң айғасханы регион экономиказын тилітчеткен кӧстеглернің пірсі полча. Сірернің кӱстенізіңернең Хакасияда сығарылған ниме-нооны Россия регионнарында ла нимес, че ідӧк пасха хан чирлерінде таныпчалар. Полғаныңар ла пасхазына кӧзідім полчазар. Сірернің чиңізіңер тиксі республикаа танығлығ полча. Пасха хазналардаң садығ апарчатхан идінҷектер саны хозылып одырза, экономика ідӧк ӧткін тилир. Мыннаң мындар наа, пӧзік чидіглерге чидерге алғапчам, киректерің уламох чахсы парзын!
Пу марығ хазнабыста паза республикабыста 5-ҷі хатап иртірілче. Пу тус аразына анда Хакасияның чӱс азыра кічіг паза ортын бизнес компаниязы аралазарға маңнанған. Пӱӱл «Чыл экспортёры-2023» марығда аралазарына 20 сурыныс пічии кірген. Оларның санынаң 12 финалист табылған.
Марығ тӧрт номинацияҷа ирткен. Промышленность кӧстегҷе 3-ҷі орынға «Сибирский вкус» ООО турысхан, ікінҷізінде «Барит» ООО пол парған, чиңісті «СНЭК» ООО холға кирген.
Агропромышленность кӧстегҷе 2 орында «ЧерногорТехСнаб» ООО, 1 орында «Раф Сервис» ООО полыбысхан.
Полызығлар кӧстегде 3 орынға «Гладенькая» город тастындағы отель турысхан, 2 орынға – идінҷек Ирина Астанаева, «Анзас» гостиница, 1 орынға – «Абакан» отель.
«Ипчі-экспортёр-2023» номинацияда 3 орында идінҷек Олеся Мохор полыбысхан, 2 орында – «Барит» ООО. Чиңісті идінҷек Илона Изотова холға кирген.
Сыйыхтығ орын ал полбааннарны, че постарын марығда турыстығ кӧзіткеннерні таныхтааннарох. Олар – «Чалпан» гостиница паза «Абаканский камнеобрабатыващий комбинат» ООО.
Марығ чиңісчілерін паза призёрларын ідӧк Хакасия пазының орынҷызы Михаил Побызаков, «Российский экспортный центр» АО-ның кізізі Яна Станевич, республиканың идінҷектер праволарын арачылирынҷа уполномоченнайы Василий Кудашкин алғыстааннар. Олар, организациялар устағҷыларынзар, идінҷектерзер айланып, Россия синіндегі марығда хайди даа аралазарға чӧптееннер. Сибирьдегі федеральнай округ синінде сыйыхтас Иркутскта орғах айының 22-ҷі кӱнінде иртер, Россия синінің салтарлары Москвада чарыс айында иділерлер.
Хайди таныхталған, Хакасияның компаниялары пасха хазналарнаң садығ апарарында постарын уғаа чахсы кӧзітчелер. Ирткен чылда пу кӧзідігҷе Сибирь регионнары аразында Хакасия ӱзінҷі орында пол парған. 2023 чылда 17 компаниянаң 3,4 млн долларға 24 экспорт чӧптезии тимнелтір. 2022 чылнаң тиңнестірзе, ол 4,5 хати кӧп. Садығ ӧӧнінде Хыдатнаң, Казахстаннаң, Узбекистаннаң, Монголиянаң, Киргизиянаң, Белоруссиянаң апарылчаттыр.
Сом Альбина Чистогашевани
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
