Ирепчінің марғысханы
03.07.2024
Хабарлар
«Ікі ир пір паанаң» ойынның араласчылары
Тун ойын. Хандых айының халғанҷы кӱннерінде А.М.Топановтың адынаң Хакас драма театры чайаачы сезонын Лилия Моцарьның пьесазынҷа турғызылған «Ікі ир пір паанаң» кӱлкістіг ойыннаң чапты
Кӧрігҷілердең пір ле хати нимес истерге килісчең, режиссёр Юрий Майнагашевтің спектакльларын пасталғаннаң тоозылғанҷа алай харах час тооладып ала, алай тохтап полбин, хатхырып ала кӧрерге килісче. Оларның чоохтанғаннары сын полтыр. 2022 чылда режиссер «Мыннаң мындар сымзырых...» ойынны чон алнына сығарған. Анда кӧп пала ӧскір салған, че киріп парған ирепчідеңер кӧзіділче, хайди олар, прай кӱстерін, хыныстарын иркелеріне пир салып, соонаң пірдеезіне кирек чох пол парчалар. Ол ойын тооза кӧрігҷілер харах частарын сым-туйуххан чызынчатханнар. Арса, постарының чуртастарынаң даа тиңнестірген поларлар.
«Ікі ир пір паанаң» тун ойын ідӧк пӱӱнгі чуртаснаң пик палғалыстығ. Спектакль кічіг сӧбіредеңер. Сӧбіре пазы Виталийні артист Андрей Тюкпиеков ойнапча, аның ипчізі Ленаны – артист Дарья Тачеева. Олар пір палалығлар, че уғаа эрістіг чуртапчатхан полчалар, отпусктарын тузалығ даа иртірбинчелер. Виталий телефонында ла одырча, хайдағ-да ойын ойнапча, ипчізіне пір дее хайығ салбинча. Иртен Лена аны стол кистінзер одыртып азырапча, че телефондағы ойынға сабыл парған ирен ниме чеенін дее сизінминче.
Хонҷых Сергей, тізең, Ленаның татхыннығ чиизін чирге сыбыра кил парча. Аны артист Валентин Ульчугачев хынығ ойнапча. Ипчізі чох чиит оол, арса, позына чиис пызырарға даа кӱскінче полар. Харын, Ленаның чіҷең нимезін махтаҷаң кізі пар. Ипчі кізі хонҷығына ирін хоптап салып одырча, аны пір орыннаң тибірет полбинчам тіп. «Мындағ тадылығ плинелер ӱчӱн мин сині нинҷе дее истербін, Лена», – амырат салып одырча Сергей, позы плинелердең пір дее азырылбинча.
Тосханҷа азыранып алып, Сергей хонҷыхтарына сӧбіреңерде романтика чоғыл тіп харахтарын ас пирче.
– Мин сӧбіреме хынчам, Ленаның паза хызыҷаамның ӱчӱн пӱгӱректерім дее садыбызарға тимдебін, – чараспинча Виталий.
– Синің ливерің кемге кирек, – ахсын чаба тібіскен хонҷығы.
– Йа, Виталий, син мағаа хайығ салбинчазың, позыңның чуртазыңнаң чуртапчазың. Синің хыриңда пасха ипчі пол парған полза, син анзын даа сизінмессің, – хазалған хонғанына Лена. – Кӧзідімге, син пӱӱн иртен ниме чідің?
– Чей іскем, плюшкалар чеем, – нандырған Виталий.
– Чох, хынғаным, син пӱӱн чуға плинелер чеезің! – хазырланған Лена.
Сарыза килгенде, ирепчі марғыс салған. Олар пір кӱн удур-тӧдір таныс нимес полыбызарға кирек полғаннар. Андағ сағыс Сергейге килген.
– Виталя, син Харатас городсар вахтаа парыбысхан поларзың, – теен Сергей.
– Йа, Виталя, анаң пір кӱн пазынаң минзер килерзің, наа кип-азах кис саларзың, тадылығ суғнаң пырғыдын саларзың. Лиза хонҷыхсар парчадып, ізікті алҷаастабызып, минзер килерзің. Іди піс «танызып» аларбыс, – хозылған Лена.
– Сірер удур-тӧдір таныс нимес полыбызарға кирексер, че кем паладаңар алай ипотекадаңар чоохтаныбызар, ол утыр салар, – теен Сергей.
– Чарасчам, мин утып алзам, чыы тартчатхан ахчаа пасха хазназар тынанарға парарбын. Син, Виталя, утып алзаң, ол ахчаа наа машина алып аларзың, – чӧптеен ипчізі.
Виталий пастап ынабинчатхан, че наа машинадаңар ис салып, марығлазарға чарадыбысхан.
Пазағы кӱнінде кӱнӧрте «вахтадаң айланчатхан» Виталий, квартираны алҷаастабызып, Леназар килерге кирек полча. Че ол кӱн Ленаның кӱр хылых-оңдайлығ Нина чаҷазы Светлана хызынаң хада килібісче. Нинаны Россияның саблығ артизі, Хакасияның чон артизі Татьяна Майнагашева ойнапча, Светлананы – чиит артист Камилла Кокова. Нина идінҷек полча, ӱреен кізілерні чыы тартчаң бюро тутча. Света хызы библиотекада тоғынча, кинделер кӧп хығырча, ирге пір дее пар полбинча.
Сағыбаан туғаннар Леназар ааллап килібіскенде, спектакльның хынии пасталыбысхан. Пу хормачы ойынны чуртағҷыларға театрның пазағы чайаачы сезонында кӧріп алҷаң оңдай полар. Андада ойын ноға «Ікі ир пір паанаң» тіп адалчатханын, марғыста Виталий алай Лена утып алғанын піліп аларға чарир.
Таныхтирға кирек, А.М.Топановтың адынаң Хакас национальнай драма театры пу ирткен чайаачы сезонда ӧткін тоғынған. Аның репертуары мындағ наа ойыннарға пайып парған: М.Булгаковтың «Мастер паза Маргарита», А.Сагатаевтің «Махачы ооллар» (Россия президентінің грантына), Ч.Моринің «Балаган» («Кічіг чир-суубыстың культуразы» проектче), Л.Моцарьның «Ікі ир пір паанаң» кӱлкістіг ойын, А.Толстойның нымахтарынҷа «Буратиноның полған киректері». Кічіг кӧрігҷілерге ӧнетін программалар тимнелгеннер: Саяна Ултургашеваның «Чааны сағысха киреелер» паза «Ӱс хынған сағыс», Дарья Тачееваның «Ура, каникуллар» паза «Чебурашканың Наа чылы», Андрей Тюкпиековтың «Алтын клӱсті тілеп».
Чайаачы сезонда тоғыс хоостыра театрзар саблығ театр критиктері Глеб Ситковский паза Екатерина Морозова кил парғаннар. Олар, Т.Майнагашеваның «Хуу инейнің тӧллері», А.Сагатаевтің «Махачы ооллар», М.Булгаковтың «Мастер паза Маргарита», А.Плотниковтың «Сарын. Тайма хорғыстаңар нымах» тун ойыннарын кӧріп, режиссерларның паза артисттернің тоғыстарына паалағ пиріп, постарының кӧрістерінең ӱлескеннер.
Ідӧк Хакас театр «Улуғ гастрольлар» Регионнар аразындағы программада араласхан, хайзын Россияның культура министерствозы полызиинаң «РОСКОНЦЕРТ» кӧглер паза фестивальлар программаларының федеральнай дирекциязы иртірче. Аны хоостыра Татарстан Республиканың Хазан городының чуртағҷылары хосхар айында А.М.Топановтың адынаң Хакас драма театрының ойыннарын кӧріп алғаннар. Татарстандағы К.Тинчуриннің адынаң драма паза комедия театрын пістің кӧрігҷілер Хакас чирінде ідӧк чылығ удурлааннар, ойыннарын хынып кӧргеннер.
Ирткен чайаачы сезонда театрның пасха даа чидіглері илееде полған. Наа сезонда республиканың чуртағҷылары пазох тун ойыннарға чӧрерлер.
Сом А.М.Топановтың адынаң Хакас драма театрыни
Автор :
Татьяна Тютюбеева
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде