Хакасияа хозым идерлеріне ізеніс
03.07.2024
Статья
Диана Боргоякова паза Михаил Кичеев
Танығлығ кӱн. Н.Ф.Катановтың адынаң Хакас национальнай гимназияда 11 класс тоосханнарның пайрамы ирткен
Пӱӱл пу ӱгредіг учреждениезін 61 оол-хыс тоосча. Оларның санында 31 ӱгренҷі алтын паза кӱмӱс медаль алған, сигізіне «Хакасияның алтын ізенізі» медаль пирілген. Кибірге кір парған оңдайҷа, ӱгреністе, школаның халых чуртазында пӧзік чидіглерге читкен чииттер хызыл аттестаттарны, медальларны Хакасия пазы Валентин Коноваловтың холынаң алғаннар.
– Хакас национальнай гимназия республиканы Россия синіндегі паза пасха чоннар аразындағы мероприятиелерде аймах-пасха кӧстеглерҷе, ол санда наукада, халых чуртаста, чайаачыда, спортта, тӧреміл турыстығ кӧзітче. Аны тоосчатханнар – Хакасияның поғдархазы, ис-пайы. Ізенчем, олар таланттарынаң республикабысты пір ле хати сабландырбастар паза Хакасияны мыннаң мындар тилідерлер паза ӧңнендірерлер. 11 класс тоосчатхан аарлығ олғаннар, пӱӱнгі кӱнге сірер оой нимес паза хынығ чолны иртібіскезер, амды кӱстенізіңер, матлама ӱгренізіңер ӱчӱн турыстығ сыйыхтар алчазар. Алныңарда сірерні аннаңох хынығ, чапсых тус сахтапча. Ідӧк аарлығ ӱгретчілерге, іҷе-пабаларға, хыйға, чылығ сӧстер таап, палаларыңны орта чолға кӧстееніңер ӱчӱн алғыс сӧстерін читірчем, – таныхтаан Валентин Олегович.
Пайрамнығ иирде гимназияны тоосчатханнарны танығлығ кӱннең алғыстирға кил парғаннар: Хакасиядаң Россия сенаторы Олег Земцов, Россияның пасха хазналар киректерінҷе министерствозының Хызылчардағы пӧлиинің устағҷызы Артём Захаров паза ікінҷі хачызы Денис Макин, республиканың ӱгредіг паза наука министрі Анатолий Бутенко.
– Кем паза хайдаң полчатханыңарны ундутпаңар. Хайда даа ползаңар, сірер постарыңның сӧбіреңерні, гимназияны, родтарыңны паза тиксі республиканы кӧртізерзер. Аннаңар хаҷан даа турыстығ тудыныңар. Алныңарда пӧзік, толдырарға оой нимес пӧгіннерні турғызарға чалтанмаңар паза оларны хайди даа чуртасха кир турыңар. Іҷе-пабаларыңны, чағыннарыңны, ӱгретчілеріңні ундутпаңар. Піліңер, гимназия чидіглеріңе поғдархапча, пірее киректерің киліспинчетсе, сірернең хада сағыссырапча. Чуртазыңарда сидіксіністер тоғазар ла, че, оларны тобырып, сірер сыдамах, пик хылыхтығ ла полып одырыңар.
«Хакасияның алтын ізенізі» медальны алғаннарзар айланчам. Ол тиктең нимес іди адалча. Ол сірернің пӧзік ӱгредіг алған соонаң Хакасиязар айланарларыңа паза аның тилізіне хозым идерлеріңе ізеністі таныхтапча, – чииттерге чахаан гимназияның директоры Лилия Ахпашева.
«Хакасияның алтын ізенізі» паза алтын медальлар, ідӧк хызыл аттестат алған 8 оол-хыстың аразында Диана Боргоякова паза Михаил Кичеев полчалар.
Диана Ағбаннаң, пасталығ класстарда 24№ школада ӱгренген. Прай 11 чыл саңай «пистер» ле ал турған. Ол Хакасияның олған искусство школазын «Хореография» специальностьча тоосхан, ідӧк хызыл аттестат алған. Гимназияда ӱгренчеткенде, чиит хыс аймах олимпиадаларда ӧткін араласхан. Пӱӱл ол Уралдағы федеральнай университет иртірген орыс тілінҷе олимпиадада сыйыхтығ орынға турысхан. Диана Москвазар алай ба Санкт-Петербургсар ӱгренерге парарға сағынча, чуртазын юриспруденциянаң алай ба хазна службазынаң палғалыстырарға пӧгінче.
Михаил ідӧк саңай «пистерге» ӱгренген. Ол Шира аймааның Наа чир аалынаң. Оол биология, обществознание паза тархын предметтерҷе Россия синінде паза чоннар аразында иртірілчеткен аймах олимпиадаларда ӧткін араласхан. Михаил пос туста спортнаң айғазарға хынча, ол санда волейболнаң, тенниснең. Ол хазнабыстың ӧӧн городынзар ӱгренерге парарға сағыс тутча, Диана чіли юриспруденция специальностьты таллирға пӧгінче.
Татьяна Кыштымова
Сом Альбина Чистогашевани
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде